Yoanne 8 - Baibuli Ekibono kya Katonda 2014

Omukazi ye baagema ng'ali mu bwenzi

¹ Aye Yesu yaaja ku Lusozi olw'Emiti Emyoliva.

² Olunaku olwairirira yaawuuna mu nkyonkyo yairayo mu isinzizo. Abantu boonaboona beesololeza gh'ali, yaatyama yaabeegeresa.

³ Abanamateeka n'Abafarisaayo baamuleetera omukazi ye baagema ng'ayenda, baamwemereza agho mu maiso gaibwe.

⁴ Baamukoba bati: “Mwegeresa omukazi ono agemeibwa mu kikolwa kyene eky'obwenzi.

⁵ Mu Mateeka, Musa yatulagira ati omuntu ng'oti n'oyo ateekwa okukubwa amabaale afe. Mperaano iwe okoba otya?”

⁶ Baakoba ebyo kumuleba nga benda akobe ekinaamuteesaaku omusango, aye Yesu yaakotaamirira bw'aghandiika ku itaka n'olwala lwe.

⁷ Bwe beeyongera okumubuuza, yaakotaamulukuka, yaabakoba ati: “Ku imwe azira kibi n'abe asooke okumukuba eibaale.”

⁸ Agho kabiri yaakotaamirira yaaghandiika ku itaka.

⁹ Bwe yabakoba atyo baatoolera okuvaagho mulala mulala ng'abakaire n'abatoolereza. Yesu yaasigala agho n'omukazi ng'akaayemereire agho.

¹⁰ Bwe yakotaamulukuka yaabuuza ati: “Mukazi iwe, bali gha? Tighabairegho akusalira musango?”

¹¹ Omukazi yairamu ati: “Musengwa, ghazira.” Yesu yairamu ati: “Zeena ni tigukusalire. Golola, aye toirangayo kukola kibi.”]

Yesu n'ekimuliikirira ky'ensi

¹² Yesu yaayongera yaakoba abantu ati: “Ninze ekimuliikirira eky'ensi kiisi annonereza taja kutambulira ghali nzikiiza era aja kuba n'obutangaavu obuleeta obulamu.”

¹³ Agho Abafarisaayo baamukoba bati: “Oli kweghaaku mwene obudhulizi, obudhulizi obubwo mwene tibuba bwa mazima.”

¹⁴ Yesu yaabairamu ati: “Waire neeghaaku obudhulizi mwene, obudhulizi bwange bwa mazima, kuba nze ndidhi ye nava, era ni ye nja aye imwe timwidhi ye nva, oba ye nja.

¹⁵ Musala emisango mu magezi ag'obuntu gonka. Nze ghazira ye nsalira musango.

¹⁶ Aye ate ni bwe mba nga ngusaze, okusalagho kwange kuba kutuufu, kuba tiba zenka mu kusalagho okwo Lata eyantuma aba ninze.

¹⁷ Ate kyaghandiikibwa ni mu Mateeka gaimwe kiti: Abadhulizi ababiri kasita baisania, obudhulizi bwaibwe buba butuufu.

¹⁸ Nze mwene neeghaaku obudhulizi ni Lata eyantuma yeena ampaaku obudhulizi.”

¹⁹ Agho baamubuuza bati: “Lata wo ali gha?” Yesu yaabairamu ati: “Nze timundidhi waire Lata wange, kuba nguli mundidhi ni Lata wange mwandibaire mumwidhi.”

²⁰ Yesu yakoba bino byonabyona ng'ali kwegeresa mu isinzizo agho mu kifo aghaateebwanga ebirabo. Era ghazira yamugema kuba ekiseera kye kyali kikaali kutuuka.

Timusobola kuja ye nja

²¹ Yesu kabiri yaakoba ati: “Nze ndidha kuvaagho mulindhagala, era mwafiira mu kibi kyaimwe. Nze ye nja imwe timughanga kujaayo.”

²² Abayudaaya baakoba bati: “Akobye ati titughanga kuja y'aja, aja kweita?”

²³ Yesu yaabakoba ati: “Imwe muva ku nsi kuno, nze nva mu igulu. Imwe muli ba nsi eno, nze tiri wa nsi eno.

²⁴ Kye nava ni mbakoba nti mulifiira mu bibi byaimwe kuba bwe mutaikiriza muti ninze, muja kufiira mu bibi byaimwe.”

²⁵ Baamubuuza bati: “Niiwe ani?” Yesu yaabairamu ati: “Kye mbaire mbakoberanga okuviira irala ku ntoolo.

²⁶ Ndi n'ebintu kamaala eby'okuboogeraku era eby'okubasalira omusango aye eyantuma wa mazima, era nkobera ensi ebyo byonka bye mpulira okuva y'ali.”

²⁷ Ti baakitegeera nga yali ali kwogera nabo ku Lata.

²⁸ Agho Yesu yaabakoba ati: “Bwe mulighanika Omwana w'Omuntu, olwo lwe mulimanha nga ninze, era nga ghazira kye nkola ku bwange, aye Lata by'andhegeresa bye nkoba.

²⁹ Eyantuma ali ninze, tiyandeka kuba zenka, kuba buliidho nkola ebyo ebimusangaaza.”

³⁰ Yesu bwe yayogera ebyo, abantu kamaala bamwikiriza.

Amazima galibafuula ba idembe

³¹ Yesu yaakoba Abayudaaya abaamwikiriza ati: “Bwe mukalangukira ku kibono kyange, ng'olwo muli beegeresebwa bange beenebeene.

³² Mulimanha amazima era amazima galibafuula ab'eidembe.”

³³ Baamwiramu bati: “Ife tuli ku lulyo lwa Aburahamu era titubangaku bairu ba muntu yeenayeena. Kale okoba otya oti tulifuulibwa ab'eidembe?”

³⁴ Yesu yaabairamu ati: “Bwenebwene ka mbakobere, kiisi akola kibi, aba mugheereza wa kibi.

³⁵ Omwana aba wa ghaka obulamu bwe bwonabwona, aye omwiru taba wa ghaka obulamu bwe bwonabwona.

³⁶ Kale Omwana bw'alibafuula ab'eidembe muliba ba idembe beenebeene.

³⁷ Ndidhi muli ku lulyo lwa Aburahamu. Aye musala amagezi okundhita olw'okuba timwikiriza kibono kyange.

³⁸ Nze ndhogera ku ebyo Lata by'andaga ate imwe mukola ebyo lata waimwe by'abakoba.”

Lata waimwe ni Sitaani

³⁹ Baamwiramu bati: “Lata waife ni Aburahamu.” Yesu yaabakoba ati: “Nguli bwenebwene mwali baana ba Aburahamu mwandibaire mukola ebyo Aburahamu bye yakolanga.

⁴⁰ Nze mbakobera ebituufu bye nawulira okuva eri Katonda. Aye mperaano musala magezi ga kundhita. Aburahamu takolangaku kintu ng'oti n'ekyo!

⁴¹ Mukola bikolwa bya lata waimwe.” Baamukoba bati: “Ife tituli baghambule, tuli ni lata waife mulala ni Katonda mwene.”

⁴² Yesu yaabakoba ati: “Nguli Katonda n'eyali Lata waimwe mwandibaire mungonza kuba ewa Katonda ye nava naidha. Tyaidha ku bwange aye mwene n'eyantuma.

⁴³ Lwaki timutegeera bye mbakoba? Lwa kuba timughanga kuwulirisa kibono kyange.

⁴⁴ Muli ba lata waimwe Sitaani, era mugonza kukola lata waimwe by'ayenda. Oyo okuviira irala ku ntoolo mutemo era tabangaku wa mazima, kuba era azira mazima. Bw'ayogera eky'obuguya aba ali kutuukiriza butuukirize kikula kye, kuba oyo muguya era ise w'obuguya.

⁴⁵ Aye kuba nze mbakobera ekituufu, timundhikiriza.

⁴⁶ “Naani ku imwe anumiriza ekibi kye naali nkoze? Oba nga mbakobera ekituufu lwaki timundhikiriza?

⁴⁷ Ole bw'aba omuntu wa Katonda awulira ebibono bya Katonda, aye imwe timuwulira, kuba timuli bantu ba Katonda.”

Ebigema ku Yesu ni Aburahamu

⁴⁸ Abayudaaya baakoba Yesu bati: “Tituli batuufu okukoba tuti oli Musamaria era oliku omuzimu omubi?”

⁴⁹ Yesu yaabairamu ati: “Nziraku muzimu mubi. Lata wange mmutaamu ekinhagansi aye imwe mumudhuuluusa.

⁵⁰ Tigezaaku kwenooneza mwene kitiisa, ghaligho akiinooneza era akimpa.

⁵¹ Bwenebwene, ka mbakobere yeenayeena akalangukira ku kibono kyange, taja kufa.”

⁵² Agho Abayudaaya baamukoba bati: “Mperaano tukakaisa tuti oliku omuzimu omubi! Aburahamu yafa n'abalanzi boona baafa, aye iwe okoba oti yeenayeena akalangukira ku kibono ky'omugha talifa.

⁵³ Niiwe osinga lata waife Aburahamu eyafa era n'abalanzi boona baafa? Weeyeta ki?”

⁵⁴ Yesu yaabairamu ati: “Bwe neetaamu ekitiisa mwene, ekitiisa ekyo tikibaamu muzindo. Lata wange n'antaamu ekitiisa, imwe ye mwogeraku nga Katonda waimwe.

⁵⁵ Timumumanhangaku aye nze mwidhi. Bwe nkoba nti timwidhi mba muguya ng'oti niimwe aye mmwidhi era ngema by'akoba.

⁵⁶ Lata waimwe Aburahamu yeesumba okubona ebiseera by'okwidha kwange. Yabibona era yaasangaala.”

⁵⁷ Agho Abayudaaya baamukoba bati: “Wabonera gha Aburahamu? Okaali na kugheza myaka makumi ataanu (50); egy'obukulu.”

⁵⁸ Yesu yaabairamu ati: “Bwenebwene ka mbakobere Aburahamu yali akaali kubaagho, nze nga ndigho.”

⁵⁹ Agho baalonda amabaale nga benda bagamukube, aye Yesu yeegisa era yaava mu isinzizo.