Yoanne 7 - Baibuli Ekibono kya Katonda 2014

Obutaikiriza bwa baganda ba Yesu

¹ Ebyo bwe byawa Yesu yaasigala mu Galilaaya nga tayenda kutambulira mu Buyudaaya, kuba Abayudaaya baali banoonia kumwita.

² Ekibinuko ky'Abayudaaya eky'Entindi kyali kiri kumpi okutuuka.

³ Baganda be baamukoba bati: “Va ghano oje e Buyudaaya, Abeegeresebwa bo babone ku bino by'okola.

⁴ Ghazira agisa by'akola bw'aba ng'ayenda okumanhibwa. Kale nga iwe bw'okola ebintu bino, weeyoleke eri ensi ekumanhe.”

⁵ Ekyo kyali kityo kuba ni baganda be abo, boona tibaamwikiriza.

⁶ Yesu yaabairamu ati: “Ekiseera kyange kikaali kutuuka, aye imwe ekiseera kyaimwe buliidho kirigho.

⁷ Ensi tesobola kubakyagha, aye nze enkyagha, kuba mpa obudhulizi ku bikolwa byayo ebibi.

⁸ Imwe muje ku kibinuko aye nze tiri kuja ku kibinuko ekyo kuba ekiseera kyange kikaali kutuukira irala.”

⁹ Bwe yamala okubakoba ebyo yaasigala mu Galilaaya.

Yesu ng'ali ku Kibinuko eky'Entindi

¹⁰ Baganda be nga bamaze okuja ku kibinuko, Yesu yeena yaaja aye tiyaja ng'abantu babona, yeiba bweibe.

¹¹ Abayudaaya baamwagala ku kibinuko era baakoba bati: “Ono ali gha?”

¹² Ghaabaagho okuduuduuma kungi mu biyindi eby'abantu nga bamwogeraku. Abandi nga bakoba bati: “Musaadha mukalamu.” Ate abandi bati: “Busa, akiidhamya bwa bantu.”

¹³ Aye nga ghazira amwogeraku mu lwatu olw'okutya Abayudaaya.

¹⁴ Mperaano ekibinuko ghe kituukira ghagati, Yesu yaaja mu isinzizo yaatoolera okwegeresa.

¹⁵ Abayudaaya beewuunhia inho baakoba bati: “Omusaadha ono tabangaku amwegeresa! Bino byonabyona yabyega atya?”

¹⁶ Yesu yaabairamu ati: “Bye ndhegeresa ti byange aye by'oyo eyantuma.

¹⁷ Kiisi aganha okukola oyo by'ayenda, amanha oba nga bye ndhegeresa byange ku bwange oba biva eri Katonda.

¹⁸ Ayogera ebibye ku bubwe anoonia kumusaaka, aye ayenda basaake eyamutuma aba mwesigwa era tabaamu buguya bwonabwona.

¹⁹ Koodhi Musa tiyabagha Mateeka? Aye ghazira ku imwe agagondera. Lwaki musala amagezi okundhita?”

²⁰ Eikuukuubira ery'abantu lyamwiramu liti: “Oliku omuzimu omubi! Naani ali kusala amagezi okukwita?”

²¹ Yesu yaabakoba ati: “Nakola ekyewuunhio kirala mwenamwena mwayasaamirira.

²² Olw'okuba Musa yabalagira okukeketanga kiisi mwana mulenzi, ate nga n'okuba tikyava ku Musa aye kyava ku badhaadha, era mukeketa ku lwa Sabbato.

²³ Oba nga omuntu aghanga okukeketebwa ku lwa Sabbato obutamenha Mateeka ga Musa, lwaki nze muunhiigira olw'okuwonia omuntu ku lwa Sabbato?

²⁴ Mutasalanga musango nga mujiira ku bya ku ngulu, aye musalenga nga mujiira ku kituufu.”

Ono yandiba Kurisito!

²⁵ Abandi ku bantu ab'omu Yerusalemu baakoba bati: “Ono ti ye baagala okwita?

²⁶ Mubone, wuule yeetaire mu bwanga ali kwogera era ghaabula kye bamukobaku! Bwenebwene abakulu baghanga okuba nga bakiidhi bati yandiba Kurisito?

²⁷ Aye twidhi bulungi omusaadha ono y'ava, ate nga Kurisito bw'aliidha ghazira alimanha gh'ava.”

²⁸ Agho Yesu bwe yali ng'ali kwegeresa mu isinzizo yaayogerera ghaigulu ati: “Bwenebwene mundidhi era mwidhi ni ye nva? Nze tyaidha ku bwange mwene. Eyantuma yeesigika, aye era imwe timumwidhi.

²⁹ Aye nze mmwidhi kuba y'ali ye nva era n'eyantuma.”

³⁰ Agho baasala amagezi bamugeme aye ghaabula amugemaku kuba ekiseera kye kyali kikaali kutuuka.

³¹ Abantu kamaala mu baali agho baamwikiriza baakoba bati: “Kurisito bw'aliidha, alikola ebyewuunhio kamaala okusinga omusaadha ono by'akoze?”

Abakuumi abaasindikibwa okugema Yesu

³² Abafarisaayo baawulira okuduuduuma mu ikuukuubira ku bigema ku Yesu. Era bano ni Bakabona Abakulu baasindika abakuumi baje bamugeme.

³³ Yesu yaakoba ati: “Ndidha kubaaku n'imwe entangama ntonotono memale nje y'oyo eyantuma.

³⁴ Mulindhagala aye timulimbona, nga ghe ndi timughanga kutuukagho.”

³⁵ Abayudaaya beebuuzagania bati: “Ategeka kuja gha ye tutalimubonera? Ategeka kuja mu bale abeetabika n'Abagureki, ayegerese Abagureki?

³⁶ Agho aba ali kukoba ki bw'akoba ati, ‘Mulindhagala aye timulimbona, nga ghe ndi timughanga kutuukagho?’ ”

Emiiga egy'amaadhi ag'obulamu

³⁷ Ku lunaku lw'ekibinuko olusembayo era olusinga bukologho, Yesu yaayemerera yaayogerera ghaigulu ati: “Kiisi ali endiwo aidhe ye nze anhwe.

³⁸ Era ng'Ebyaghandiikibwa bwe bikoba, ‘Kiisi andhikiriza emiiga egy'amaadhi ag'obulamu giriviira mu mwoyo gwe.’ ”

³⁹ Agho Yesu yali ali kwogera ku Mwoyo abamwikiriza ye baali baja okufuna kuba mu kiseera ekyo Mwoyo yali akaali kugabibwa olw'okuba Yesu yali akaali kutuuka mu kitiisa kya Ise.

Abantu beeyawulamu

⁴⁰ Abantu abandi abaali mu ikuukuubira bwe baawulira ebibono ebyo, baakoba bati: “Bwenebwene ono n'omulanzi.”

⁴¹ Abandi baakoba bati: “Ni Kurisito.” Ate abandi baakoba bati: “Aye Kurisito aja kuva Galilaaya?

⁴² Ebyaghandiikibwa tibikoba biti Kurisito aja kuba ku baidhukulu ba Daudi? Era biti aja kuzaalibwa Bethelehemu ku butaka bwa Daudi.”

⁴³ Kale abantu beeyawulamu ku bigema ku Yesu

⁴⁴ era abandi baayenda bamugeme aye ghazira yamugemaku.

Obutaikiriza obw'abafuzi

⁴⁵ Agho abakuumi bairayo ye Bakabona Abakulu n'Abafarisaayo abaababuuza bati: “Lwaki timumuleese?”

⁴⁶ Abakuumi babairamu bati: “Tebangayo ku muntu eyaali ayogeire ng'oti n'omusaadha oyo!”

⁴⁷ Abafarisaayo baabakoba bati: “Mutakoba muti mwena abakiidhaimya?

⁴⁸ Mwali muwuliireyooku Omuyudaaya omukulu oba Omufarisaayo amwikiriza?

⁴⁹ Aye ekiyindi eky'abantu kino tikiidhi Mateeka ga Musa kale kiraame!”

⁵⁰ Aye ku Bafarisaayo ghaabaagho omusaadha nga bamweta Nikodemo. Ono einhuma ere eyaja n'abona Yesu obwire, yaakoba baine ati:

⁵¹ “Aye Amateeka gaife tigatuganha kusalira muntu musango okutoolaku nga tumaze okuwulirisa n'okumanha ky'akola.”

⁵² Baamwiramu bati: “Iwe weena oli wa Galilaaya? Kinoonereze mu byaghandiikibwa, oidha kubona oti e Galilaaya tesobola kuva mulanzi.” [

⁵³ Agho buli muntu yairayo ewuwe.