Yoanne 6 - Baibuli Ekibono kya Katonda 2014

Yesu aliisa abantu enkumi eitaanu

¹ Ebyo bwe byawa Yesu yaasomoka enhandha Galilaaya, ey'e Tiberia.

² Eikuukuubira ly'abantu lyamunonereza kuba baali bamaze okubona obumanhiso bwe yakola ku balwaire.

³ Yesu yaaniina ku lusozi yaatyama eyo n'Abeegeresebwa be.

⁴ Ekibinuko eky'Okubitizibwa kyali kiseese kumpi.

⁵ Yesu yaja okulinga ati ng'abona eikuukuubira ery'abantu nga bali kwidha y'ali. Yaakoba Filipo ati: “Tunaagula gha emigaati abantu bano balye?”

⁶ Yakoba atyo kumuleba, kuba mwene yali aidhi kye yali aja okukola.

⁷ Filipo yaamwiramu ati: “Emigaati egy'edinari ebikumi ebibiri (200) tigimala kiisi muntu okulyaku akatono.”

⁸ Omwegeresebwa wa Yesu owundi ayetebwa Anderea, muganda wa Simoni Petero yaakoba ati:

⁹ “Ghaligho ghano omwisuka ali n'emigaati etaanu egya sayiri n'ebyenhandha bibiri, aye katyo ebyo bikola ki ku bantu kamaala batyo!”

¹⁰ Yesu yaakoba ati: “Mukobe abantu batyame.” Kale olw'okuba ghaaligho obusubi kamaala obusobola okutyamwaku, abantu boonaboona baatyama; abasaadha baali ng'oti enkumi itaanu (5,000).

¹¹ Yesu yaatoola emigaati yeeyanza Katonda, yaagabira abantu abaali batyaime ku busubi. Mu nsambo n'endala atyo bwe yakola n'ebyenhandha abantu boonaboona baafuna nga bwe baayenda.

¹² Bwe baamala okwiguta boonaboona, yaakoba Abeegeresebwa be ati: “Musoloze ebitundu byonabyona ebitaliiriibwa ghabule ekyonoonebwa.”

¹³ Kale baasoloza, baidhuza ebiibo ikumi na bibiri eby'ebitundu eby'emigaati egya sayiri etaanu ebyalekebwagho, abantu bye bataalya.

¹⁴ Abantu bwe baabona akamanhiso ako Yesu ke yakola, baakoba bati: “Bwenebwene ono n'omulanzi Ole ow'okwidha mu nsi!”

¹⁵ Yesu yaamanha ati baali bali kumpi okumugema bya ntaka bamufuule Kyabazinga. Yaavaagho kabiri yaaja eyo mu nsozi yenka.

Yesu atambulira ku maadhi

¹⁶ Eiguloigulo, Abeegeresebwa be baikirira ku nhandha.

¹⁷ Baaniina mu lyato, baasomoka enhandha, baaja e Kaperinaumu. Obwire bwaziba aye nga Yesu akaali kwidha ye bali.

¹⁸ Empewo ey'amaani yaidha, enhandha yeefuukuula.

¹⁹ Abeegeresebwa be bwe baali bali kukuba enkasi, nga baakajaaku kilomita nga itaanu oba mukaaga, okulinga bati nga babona Yesu ali kutambula ku maadhi aidha y'eryato lyaibwe, era baatya inho.

²⁰ Aye Yesu yaabakoba ati: “Ninze, mutatya.”

²¹ Agho baasangaalira Yesu okubeeyimbaku mu lyato, era mu kaseera keene ako eryato lyatuuka ku bukalu ghe baali baja.

Abantu baagala Yesu

²² Olunaku olwairirira, eikuukuubira ery'abantu abaali basigaire eruuyi ere ow'enhandha, baabona nga ghaligho eryato irala lyonka. Era baidhukira nga Abeegeresebwa baaja bonka, Yesu tiyali nabo mu lyato nga baja.

²³ Ghaabaagho amaato agaava e Tiberia, gaidha okumpi n'ekifo abantu kamaala ghe baaliira emigaati nga Musengwa amaze okweyanza.

²⁴ Mperaano abantu bwe bataabona Yesu waire Abeegeresebwa be, baaniina mu maato ago baaja e Kaperinaumu okumwagala.

Yesu n'omugaati ogw'obulamu

²⁵ Abantu bwe baayagaana Yesu ng'ali eruuyi ere ow'enhandha, baamubuuza bati: “Mwegeresa watuuse li eno?”

²⁶ Yesu yaabairamu ati: “Bwenebwene ka mbakobere, muli kundhagala ti lwa kuba mwabona obumanhiso bwe nakola, aye muli kundhagala lwa kuba mwalya emigaati mwalekerera.

²⁷ Mutakolereranga mere ewaagho, aye mukolererenga emere etawaagho, etuusa ku bulamu obutawaagho. Eyo n'emere Omwana w'Omuntu yaalibagha. Kuba oyo Katonda Lata yamutaaku akamanhiso.”

²⁸ Baamubuuza bati: “Tukole ki okukola Katonda by'ayenda tukole?”

²⁹ Yesu yaabairamu ati: “Katonda ky'ayenda mukole n'okwikiriza oyo ye yatuma.”

³⁰ Baamukoba bati: “Kamanhiso ki k'onaakola tubone era tukwikirize? Oja kukola ki?

³¹ Badhaadha baife baalya mannu mu irungu era nga bwe kyaghandiikibwa kiti, ‘Yabagha omugaati oguva mu igulu baalya.’ ”

³² Yesu yaabakoba ati: “Bwenebwene ka mbakobere, Musa ti n'eyabagha omugaati oguva mu igulu. Lata wange n'agaba omugaati gwene oguva mu igulu

³³ kuba omugaati Katonda gw'agaba, n'omuntu oyo ava mu igulu era n'agabira ensi obulamu.”

³⁴ Agho ni baamukoba bati: “Musengwa, tughenga omugaati guno buliidho.”

³⁵ Yaabakoba ati: “Ninze omugaati ogugha obulamu, aidha ye ndi endhala terimuluma, era oyo andhikiriza taliwulira ndiwo.

³⁶ “Aye nga bwe nabakoba, waire mumbona timwikiriza.

³⁷ Buli muntu Lata y'ampa, aliidha ye ndi ate buli aidha ye ndi tija kumubingira ku luya.

³⁸ Kuba naidha okuva mu igulu ti kukola nze kye nhenda, aye oyo eyantuma ky'ayenda.

³⁹ Era kino, eyantuma ky'ayenda: ku be yampa ndobe kufiirwaku waire mulala aye mbazuukize ku lunaku olusembayo.

⁴⁰ Lata wange ky'ayenda ni kino: buli abona Omwana era n'amwikiriza afune obulamu obutawaagho era mmuzuukize ku lunaku olusembayo.”

⁴¹ Abayudaaya baaduuduuma olw'okubakoba ati: “Ninze omugaati oguva mu igulu.”

⁴² Baakoba bati: “Ono ti ni Yesu, mutabane wa Yosefu? Ise n'inhina tubaidhi. Akoba atya mperaano ati, ‘Naika okuva mu igulu?’ ”

⁴³ Yesu yaabakoba ati: “Muleke kuduuduumira eyo.

⁴⁴ Ghazira aghanga kwidha ye ndi okutoolaku nga Lata eyantuma n'amutuusiiza ye ndi, era ndimuzuukiza ku lunaku olusembayo.

⁴⁵ Kyaghandiikibwa mu balanzi kiti, ‘Boonaboona balyegeresebwa Katonda.’ Yeenayeena awulira ebya Lata n'ayega, aidha ye ndi.

⁴⁶ Tikiri kiti ghaligho eyaali aboine ku Lata okutoolaku oyo ava ye Katonda, oyo n'eyabona ku Lata.

⁴⁷ Bwenebwene, ka mbakobere aikiriza, ali n'obulamu obutawaagho.

⁴⁸ “Ninze omugaati ogugha obulamu.

⁴⁹ Badhaadha baimwe baalya mannu mu irungu era baafa.

⁵⁰ Guno n'omugaati oguva mu igulu omuntu agulya alobe kufa.

⁵¹ Ninze omugaati oguleeta obulamu, ogwava mu igulu. Omuntu yeenayeena bw'alya ku mugaati guno aja kuba mulamu ebyanda n'ebyanda. Omugaati gwe ndighaayo olw'obulamu obw'ensi eno, n'omubiri gwange gwe nja okughaayo ku lw'ensi eno ebe n'obulamu.”

⁵² Abayudaaya baatakana beene na beene nga bakoba bati: “Ono omusaadha aghanga atya okutugha omubiri gwe ife okugulya?”

⁵³ Agho Yesu n'okubakoba ati: “Bwenebwene ka mbakobere, okutoolaku nga mulya omubiri gw'Omwana w'Omuntu, era ni munhwa n'omusaayi gwe, timughanga kuba na bulamu.

⁵⁴ Kiisi alya omubiri gwange era n'anhwa omusaayi gwange, ali n'obulamu obutawaagho, era ndimuzuukiza ku lunaku olusembayo.

⁵⁵ Kuba omubiri gwange mere yeeneyeene ate omusaayi gwange kya kunhwa kyenekyene.

⁵⁶ Kiisi alya omubiri gwange n'anhwa n'omusaayi gwange, aba mu nze zeena naamubaamu.

⁵⁷ Nga Lata omulamu bwe yantuma nze ni mba omulamu olw'okuba oyo, mu nsambo n'endala oyo yeenayeena andya aba mulamu lwa kuba nze.

⁵⁸ Guno ni, n'omugaati oguva mu igulu, ti nga badhaadha baimwe gwe baalya ni bafa. Ole alya ku mugaati guno aja kuba mulamu ebyanda n'ebyanda.”

⁵⁹ Yayogera bino ng'ali kwegeresa mu sinagoga e Kaperinaumu.

Ebibono eby'obulamu obutawaagho

⁶⁰ Abeegeresebwa be kamaala bwe baawulira ebyo, baakoba bati: “Ekibono kino nga kikalangafu! Naani aghanga okukiwulirisa?”

⁶¹ Yesu yaakitegeera mule ng'Abeegeresebwa bwe bali kuduuduuma olwa kino. Agho yaabakoba ati: “Kino kibamazeemu amaani?

⁶² Memale nguli mubona Omwana w'Omuntu ng'aniinaniina eyo mu kifo ye yabanga?

⁶³ Mwoyo n'agaba obulamu, omubiri ghazira kye guganhula. Ebibono bye mbakobye ni Mwoyo era n'obulamu.

⁶⁴ Aye abandi ku imwe timwikiriza.” Kuba okuviira irala mu kwinhama Yesu yali aidhi abaali tibaikiriza, n'eyali aja okumulyamu olukwe.

⁶⁵ Era yaakoba ati: “Kye nava ni mbakoba nti ghazira muntu aghanga kwidha ye ndi okutoolaku nga Lata akimughaire.”

⁶⁶ Okuva ku olwo Abeegeresebwa be kamaala baira einhuma baalekera okutambula naye.

⁶⁷ Kale Yesu yaabuuza Eikumi n'Ababiri ati: “Ate imwe, mwena mwandyenze okwirayo?”

⁶⁸ Simoni Petero yaamwiramu ati: “Musengwa, tunaaja y'ani? Niiwe ali n'ebibono eby'obulamu obutawaagho.

⁶⁹ Twidhi era twikiriza nga niiwe Omutukuvu wa Katonda.”

⁷⁰ Yesu yairamu ati: “Ti ninze eyabalonda imwe Eikumi n'Ababiri? Ate owundi ku imwe Sitaani!”

⁷¹ Mperaano yali ali kwogera ku Yuda mutabane wa Simoni Isikarioti. Kuba ono, omulala ku Ikumi n'Ababiri, yali n'aja okumulyamu olukwe.