Yoanne 5 - Baibuli Ekibono kya Katonda 2014

Okuwonekeza ku kidiba

¹ Ebyo olwawa, ghabaagho ekibinuko eky'Abayudaaya, era Yesu yaaniinaniina e Yerusalemu.

² Mperaano, mu Yerusalemu, agho ku Mulyango gw'Entaama, ogwetebwa Bethizatha mu Luheburayi, ghaaligho ekidiba nga kiriku ebigangu bitaanu.

³ Mu bigangu bino n'omwali olukunkumuli lw'abalwaire aba buli nsambo abatulu, abalema n'abagogomu [nga balindirira amaadhi okwetaabuula.

⁴ Kuba ghaalingagho ebiseera malaika mwe yaikiranga mu kidiba n'ataabuula amaadhi, era nga kiisi asooka okwika mu maadhi nga gamaze okutaabuuka, awona kiisi bulwaire bwonabwona bw'aba ng'alwaire.]

⁵ Ghaligho omuntu mulala eyali alwaliire emyaka amakumi asatu na munaana.

⁶ Yesu bwe yamubona ng'alambaire, n'amanha ng'abaire mulwaire okumala entangama, kyeyava n'amubuuza ati: “Oyenda okuwonezebwa?”

⁷ Omulwaire yaamwiramu ati: “Musengwa, nzira muntu andhisa mu kidiba amaadhi ghe gataabuukira ghe ngerezaaku okwikamu ng'owundi ansookamu.”

⁸ Yesu yaamukoba ati: “Situka, otoole endiri yo otambule.”

⁹ Mangu ago omusaadha yaawona yaasitula endiri ye yaatambula. Olunaku olwo lwali lwa Sabbato.

¹⁰ Abayudaaya baakoba omusaadha eyali yaakawonezebwa bati: “Olwaleero lwa Sabbato era amateeka tigakuganha kutambula ng'ositwire endiri yo.”

¹¹ Aye yaabairamu ati: “Amponiiza n'ankobye okusitula endiri yange ntambule.”

¹² Baamubuuza bati: “Omuntu oyo akukobye ati situla endiri yo otambule, naani?”

¹³ Aye omusaadha eyawonezebwa tiyamanha eyali amuwoniiza, kuba Yesu yali abuze olw'eikuukuubira eryali agho.

¹⁴ Ebyo olwawa Yesu yaayagaana ye yawonia mu isinzizo yaamukoba ati: “Bona eno mperaano oli bukalamu, lekera agho okukola ebibi, kuba oghanga okweyagaana nga ekisinga agho obubi kikutuuseeku.”

¹⁵ Agho omusaadha yaaja yaakobera Abayudaaya ati ni Yesu eyamuwonia.

¹⁶ Agho ni Abayudaaya baakiriga Yesu, kuba yakola kino ku Sabbato.

¹⁷ Aye Yesu yaabakoba ati: “Lata wange akaakola, era zeena nkola.”

¹⁸ Ekyo Abayudaaya kyabongeramu okwenda okumwita, kuba tiyakoma ku kya kumenha iteeka lya Sabbato kyonka, aye yataaku n'eky'okweta Katonda lata we; nga mu kino yeefuula okuba ng'ayagayaga ni Katonda.

Obukumu bw'Omwana ghe buva

¹⁹ Agho Yesu yaabairamu ati: “Ka mbakobere, bwenebwene Omwana tasobola kukola kintu kyonakyona ku lulwe akola ebyo byonka by'abona Lata ng'akola. Kiisi Lata ky'akola n'Omwana ky'akola

²⁰ kuba Lata agonza Omwana era amulaga byonabyona by'akola. Era aidha kumulaga n'ebisinga n'agho mwasaamirire n'okwasaamirira.

²¹ “Nga Lata bw'azuukiza abafu era n'abagha obulamu, mu nsambo n'endala n'Omwana bw'agha obulamu abo b'ayenda okubugha.

²² Lata tasalira musango muntu yeenayeena. Okusalira omusango omuntu kwonakwona kuli mu buyinza bwa Mwana.

²³ Abantu boonaboona bate mu Mwana ekinhagansi nga bwe bata mu Lata ekinhagansi. Kiisi atata mu Mwana kinhagansi, ni Ise eyamutuma tamutaamu kinhagansi.

²⁴ “Bwenebwene mbakobera nti: Kiisi awulira kibono kyange n'aikiriza oyo eyantuma, ali n'obulamu obutawaagho era taja kusalirwa musango, aba amaze okusomoka okuva mu kufa okungira mu bulamu.

²⁵ Bwenebwene mbakobera nti: Ekiseera kiri kwidha era n'okutuuka kyatuuka, abafu mwe bawulirira eiroboozi ery'Omwana wa Katonda, era abo abaliwulira bafuna obulamu.

²⁶ “Kuba nga Lata mwene bw'ali n'obulamu, mu nsambo n'endala n'Omwana yamugha abe n'obulamu.

²⁷ Era yaamugha obukumu obw'okusala emisango, kuba n'Omwana w'Omuntu.

²⁸ Kino kitabaasaamiriza kuba ekiseera kiri kwidha, abali mu magombe boonaboona mwe baliwulirira eiroboozi lye,

²⁹ era ni bavaamu. Abo abaakolanga obulungi balizuukira okufuna obulamu ate abaakolanga obubi balizuukira baasalirwa omusango okubasinga.

Obudhulizi obugheebwa ku Yesu

³⁰ “Tisobola kukola kintu kyonakyona ku bwange; nsala omusango nga bwempulira aghazira kusaliriza, kuba tinuyirira kukola nga bwe nhenda aye nga Lata eyantuma bw'ayenda.

³¹ “Bwe neeghaaku obudhulizi mwene, obudhulizi obwo tibuba bwa mazima.

³² Aye ghaligho owundi andhulira era ndidhi ng'obudhulizi bw'agha ku nze bwa mazima.

³³ Mwatumira Yoanne abakwenda era yaagha obudhulizi ku mazima.

³⁴ Ti lwa kuba nga neetaaga inho obudhulizi obw'omuntu, ekyo nkikobye musobole okulokolwa.

³⁵ Yoanne yali ng'oti itaala eryaka ni limulisa, aye okumulisa kwe kwabasangaazaaku kaseera buseera.

³⁶ “Aye nze ndi n'obudhulizi obusinga n'obwa Yoanne bw'agha kuba ebintu bye nkola, Lata n'eyabimpa okubikola era bindhulira nga Lata n'eyantuma.

³⁷ Ate era ni Lata mwene eyantuma, oyo yeena andhulira. Imwe timuwulirangaku bw'ayogera, waire okumubona bw'afaanana.

³⁸ N'ekibono kye tikisigala mu myoyo gyaimwe, kuba timwikiriza ye yatuma.

³⁹ “Mwagaaza mu Byaghandiikibwa nga mudhuuba muti mu ebyo mwe munaafunira obulamu obutawaagho, ate nga Ebyaghandiikibwa byene ebyo bindhulira,

⁴⁰ aye imwe muloba okwidha ye ndi okufuna obulamu.

⁴¹ Nze tinoonia kusaakibwa bantu

⁴² aye ndidhi nga muzira kugonza kwa Katonda mu imwe.

⁴³ Nze naidha mu liina lya Lata wange, aye muloba okunsangaalira owundi bw'aliidha ku bubwe mwene, muja kumusangaalira.

⁴⁴ Memale katyo mughanga mutya okwikiriza, imwe abagonza okusaakagana ni mutanoonia kusaakibwa oyo Katonda yenka?

⁴⁵ “Mutadhuuba muti ninze ndibaseegha ye Lata. Aye Musa ye mutaamu eisuubi lyaimwe ni mwenemwene aja okubaseegha;

⁴⁶ kuba nguli mwaikiriza Musa zeena mwandindhikiriiza, kuba yaghandiika ku nze.

⁴⁷ Oba nga timwikiriza oyo bye yaghandiika, memale musobola mutya okwikiriza nze bye nkoba?”