Yoanne 4 - Baibuli Ekibono kya Katonda 2014

Yesu n'omukazi Omusamaria

¹ Abafarisaayo baawulira bati Yesu yali ali kufuna era yaabatiza abeegeresebwa kamaala.

² (Yesu mwene ti n'eyabatizanga aye Abeegeresebwa be n'abaabatizanga).

³ Bwe yakimanha yaava mu Buyudaaya yairayo e Galilaaya.

⁴ Yali ng'ali n'okubita mu Samaria.

⁵ Yaatuuka mu Samaria mu kibuga ekyetebwa Sikaru nga kiri kumpi n'ekibandha Yakobo kye yagha mutabane we Yosefu.

⁶ Agho n'aghaali ensulo eyali emanhiibwa nga ensulo ya Yakobo. Kale Yesu eyali akooye n'olugendo yaatyama agho ku nsulo. Esaawa dhaali nga mukaaga.

⁷ Omukazi Omusamaria yaidha okusena amaadhi, Yesu yaamukoba ati: “Mpa ku maadhi nhweku.”

⁸ Abeegeresebwa be baali bajiire mu kibuga kugula mere.

⁹ Omukazi Omusamaria yaamukoba ati: “Iwe Omuyudaaya oghanga otya okusaba nze Omusamaria amaadhi okunhwa?” Kuba Abayudaaya tibaabanga na nkolagana yoonayoona n'Abasamaria.

¹⁰ Yesu yaamukoba ati: “Nguli oidhi ekirabo Katonda ky'agha, n'omanha n'oyo ali kukusaba amaadhi okunhwa, wandimusabye yaakugha amaadhi agagha obulamu.”

¹¹ Omukazi yaamukoba ati: “Musengwa, memale iwe ozira mpendo ate n'ensulo ndeeyi, amaadhi agagha obulamu waaligafunie gha?

¹² Niiwe osinga dhaadha waife Yakobo eyatugha ensulo eno, ate era mwene ye yanhwangamu n'abaana be, n'ebyayo bye?”

¹³ Yesu yaamukoba ati: “Kiisi anhwa ku maadhi gano endiwo eiramu yaamugema,

¹⁴ aye kiisi anhwa ku maadhi ge mmugha, taliirayo kuba ndiwo. Amaadhi ago ge ndimugha, mu oyo galifuuka ensulo ey'amaadhi agagha obulamu era gaamugha obulamu obutawaagho.”

¹⁵ Omukazi yaamukoba ati: “Musengwa mpa ku maadhi ago ndobe kubanga ndiwo na kwidhanga kusena gano.”

¹⁶ Yesu yaamukoba ati: “Ja oyete balo oidhe naye.”

¹⁷ Omukazi yairamu ati: “Nze nzira baze.” Yesu yaamukoba ati: “Oli mutuufu bw'okoba oti ozira balo

¹⁸ kuba waakabayira abasaadha bataanu era y'oli naye mperaano ti balo. Ky'okobye kituufu.”

¹⁹ Omukazi yaamukoba ati: “Musengwa ombonekera ng'oti oli mulanzi.

²⁰ Badhaadha baife baasinzanga Katonda ku lusozi luno aye imwe mukoba muti Yerusalemu n'ekifo ekiteekwa okusinzibwamu.”

²¹ Yesu yaamukoba ati: “Mukazi iwe, amazima gali gati, ekiseera kiidha kutuuka Lata abe nga takaasinzibwa ku lusozi luno waire e Yerusalemu.

²² Imwe musinza kye mutaidhi aye ife tusinza kye twidhi, kuba obulokozi buva mu Buyudaaya.

²³ Aye ekiseera kiri kwidha era kituuse, abasinza mu nsambo entuufu basinze Lata mu Mwoyo era ni mu mazima, kuba abamusinza mu nsambo ng'oti n'eyo Lata oyo b'asiima.

²⁴ Katonda Mwoyo, era abamusinza bagwaine okumusinza mu Mwoyo ni mu mazima.”

²⁵ Omukazi yaamukoba ati: “Ndidhi nga Messia, ayetebwa Kurisito, aidha kwidha. Era nga bw'aliidha alitukobera ebintu byonabyona.”

²⁶ Yesu yaamukoba ati: “Ninze ali kwogera n'iwe.”

²⁷ Mangu ago Abeegeresebwa be ghe bairira era beewuunhia inho okumubona ng'ali kwogera n'omukazi. Aye ghazira yabuuza mukazi ati: “Oyenda ki?” Oba eyabuuza Yesu ati: “Lwaki oli kwogera n'omukazi?”

²⁸ Agho omukazi yaaleka agho ensugha ye, yaaja mu kibuga yaakoba abantu ati:

²⁹ “Mwidhe mubone omuntu ankobeire byonabyona bye naali nkoze. Ataba nga ni Kurisito?”

³⁰ Agho baava mu kibuga baaja ye Yesu.

³¹ Mu kiseera n'ekirala ekyo Abeegeresebwa be baali bali kumweghemba bati: “Mwegeresa, lya ku mere!”

³² Aye yaabakoba ati: “Ndi n'emere ey'okulya ye mutaidhi.”

³³ Abeegeresebwa be n'okwebuuza bati: “Oba ghaligho amuleeteire emere?”

³⁴ Yesu yaabakoba ati: “Emere yange n'okukola ebyo eyantuma by'ayenda, n'okumala omulimo gwe yampa.

³⁵ Koodhi timuli na nsambo yaimwe mbu, ‘Ebula myezi ena nga tukungula.’ Aye ka mbakobere: Mulingirire ebiri mu musiri mubone bwe bituuse okukungula.

³⁶ Akungula, asasulwa, era yaasoloza ebibala by'obulamu obutawaagho. Olwo ni, asimba n'akungula bombi baasagambira ghalala.

³⁷ Agho ni ensambo eno ntuufu ekoba eti, ‘Owundi asimba owundi yaakungula.’

³⁸ Nabatuma okukungula bye mutaalima; bandi n'abaalima imwe mwaganhulwa olw'amaani gaibwe.”

³⁹ Abasamaria kamaala ab'omu kibuga ekyo baamwikiriza olw'ebyo omukazi bye yabakobera ati: “Ankobeire byonabyona bye naali nkoze.”

⁴⁰ Kale Abasamaria bwe baidha y'ali, baamweghemba abe ng'akaaliku nabo, era yaasigala nabo enaku ibiri.

⁴¹ Abantu abandi kamaala baamwikiriza olw'ebibono bye.

⁴² Era baakoba omukazi bati: “Twikiriza ti lwa kuba nga watukobera, aye mperaano twewuliriire beene, era mperaano twidhi ng'ono n'Omulokozi ow'ensi mwenemwene.”

Yesu awonia mutabane w'omwami

⁴³ Enaku edho eibiri bwe dhaabita Yesu yaavaayo yaaja e Galilaaya.

⁴⁴ Kuba Yesu mwene yali amaze okukakasa ati: “Omulanzi tateebwamu kinhagansi mu nsi ya waibwe.”

⁴⁵ Bwe yatuuka e Galilaaya, ab'e Galilaaya baamusangaalira engeri ye baali baboine bye yakolera e Yerusalemu ku Kibinuko eky'Okubitizibwa, kuba boona baaliyo ku kibinuko ekyo.

⁴⁶ Agho yaatuuka e Kana mu Galilaaya, ye yafuulira amaadhi omwenge ogw'emizabbibu. Ghaaligho omwami eyali ni mutabane we nga mulwaire inho e Kaperinaumu.

⁴⁷ Bwe yawulira nga Yesu aviire mu Buyudaaya yaidha mu Galilaaya, yaaja y'ali, yaamweghemba aikirire e Kaperinaumu, awonie mutabane we eyali ng'ali kumpi na kufa.

⁴⁸ Yesu yaamukoba ati: “Okutoolaku nga muboine obumanhiso n'ebyewuunhio timughanga kwikiriza.”

⁴⁹ Omwami yaamukoba ati: “Musengwa, ikirira ng'omwana akaali kunfaaku.”

⁵⁰ Yesu yaamukoba ati: “Ja mutabane wo mulamu.” Omusaadha yaikiriza ebibono Yesu bye yamukoba, yaaja.

⁵¹ Bwe yali aikirira yaayagaanana n'abagheereza be baamukoba bati: “Mutabane wo mulamu.”

⁵² Yaababuuza esaawa ye yatandiikiraku okuba obukalamu. Baamukoba bati: “Idho ku saawa musanvu edh'omusana, omusuudha ghe gwamulekeire.”

⁵³ Agho Ise yaamanha nga n'esaawa Yesu ye yamukobereraku ati: “Mutabane wo mulamu.” Oyo n'ab'omu ndhu ye boonaboona baikiriza.

⁵⁴ Kano n'akaali akamanhiso akokubiri Yesu ke yakola mu Galilaaya ng'amaze okuva mu Buyudaaya.