Yoanne 3 - Baibuli Ekibono kya Katonda 2014

Yesu ni Nikodemo

¹ Ghaaligho omusaadha eyali omukulu mu Bayudaaya ng'ayetebwa Nikodemo era nga wa mu kikunsu ky'Abafarisaayo.

² Lwali lulala ono yaaja ye Yesu obwire yaamukoba ati: “Mwegeresa, twidhi tuti oli mwegeresa ava ewa Katonda, kuba ghazira aghanga kukola byewuunhio bino by'okola okutoolaku nga Katonda ali naye.”

³ Yesu yaamwiramu ati: “Ka nkukobere bwenebwene, ezira aghanga kubona Bwakyabazinga bwa Katonda okutoolaku ng'azaaliibwa omukuzi ogwokubiri.”

⁴ Nikodemo yaamubuuza ati: “Omuntu aghanga atya okuzaalibwa omukuzi ogwokubiri bw'aba nga mukulu? Asobola okungira mu nda ya inhina omukuzi ogwokubiri yaazaalibwa?”

⁵ Yesu yaamwiramu ati: “Bwenebwene ka nkukobere, okutoolaku ng'omuntu azaaliibwa amaadhi ni Mwoyo, taghanga kwingira mu Bwakyabazinga bwa Katonda.

⁶ Omubiri guzaalibwa mubiri, ate omwoyo gwazaalibwa Mwoyo.

⁷ Oteewuunhia kye nkukobye nti muli n'okuzaalibwa omukuzi ogwokubiri.

⁸ Empewo efuuwa yaalaga y'eyenda, waawulira empiriito aye nga toidhi y'eva oba y'eja. Kityo bwekiri ku buli muntu azaalibwa Mwoyo.”

⁹ Nikodemo yaamukoba ati: “Ebyo bighanga bitya okubaagho?”

¹⁰ Yesu yaamwiramu ati: “Waaba mwegeresa mukulu mu Isiraeli waaloba kumanha ekyo?

¹¹ Bwenebwene ka nkukobere, ife twogera kye twidhi era tukakasa kye twabona, aye imwe muloba okwikiriza obudhulizi bwaife.

¹² Bwe mbakobera eby'oku nsi timwikiriza, memale bwe nnaabakobera eby'omu igulu lwe munaikiriza?

¹³ Ghazira yaali aniinieku mu igulu okutoolaku Omwana w'Omuntu eyaika okuva mu igulu.”

¹⁴ Kale nga Musa bwe yaghanika omusota mu irungu, mu nsambo n'endala n'Omwana w'Omuntu bw'ali n'okughanikibwa

¹⁵ kiisi amwikiriza asobole okuba n'obulamu obutawaagho.

¹⁶ Atyo Katonda bwe yagonza abantu ab'oku nsi, yaaghaayo Omwana we omulala bedengedenge kiisi amwikiriza alobe kuzikirira aye afune obulamu obutawaagho.

¹⁷ Katonda tiyatuma Mwana we mu nsi kusalira bantu musango, aye abantu babite mu oyo okulokolwa.

¹⁸ Oyo amwikiriza tigulimusinga aye oyo atamwikiriza gwamala ira okumusinga, kuba taikiriza Mwana wa Katonda omulala bedengedenge.

¹⁹ Guno n'omusango: Ekimuliikirira kyaidha mu nsi, aye abantu baagonza enzikiiza mu kifo ky'okugonza ekimuliikirira olw'okuba ebikolwa byaibwe bibi.

²⁰ Buli akola ebibi akyagha ekimuliikirira, era taidha ya kimuliikirira olw'okutya ati ebikolwa bye bighanga okumanhibwa.

²¹ Aye akola ekituufu aidha y'ekimuliikirira okwoleka ati mu by'akola agondera Katonda by'amukoba.

Yesu ni Yoanne Omubatiza

²² Ebyo olwawa, Yesu n'Abeegeresebwa be baaja mu kiketezo eky'e Buyudaaya, yaaba eyo nabo okumala entangama ng'abatiza.

²³ Yoanne yeena yali abatiriza mu Aenoni okumpi ni Salimu, kuba yaliyo amaadhi kyodo era ng'abantu baidha baabatizibwa.

²⁴ Agho Yoanne baali bakaali kumuta mu ikomera.

²⁵ Abeegeresebwa ba Yoanne abandi baatoolera okutakana n'Omuyudaaya ku mpisa ey'okutukuzibwa.

²⁶ Baidha baakoba Yoanne bati: “Omwegeresa, ole ye wayogeraku, ye mwali naye eruuyi ere ng'osomoike Yorudani, yeena ali eyo abatiza era abantu boonaboona bali kuja y'ali!”

²⁷ Yoanne yaabairamu ati: “Ezira afuna kitone kyonakyona nga tikiviire mu igulu.

²⁸ Imwe beene mundhulira nga nakoba nti, ‘Ti ninze Kurisito, aye natumibwa kumukulembereramu.’

²⁹ Omugole aba w'oyo amubayiiza. Mukagwa w'oyo abayiiza bw'ayemerera n'awulira eiroboozi ly'oyo abayiiza asangaala. Kale ni eisanhu lyange lituukiriire.

³⁰ Oyo ali n'okweyongera okuja ghaigulu nze ndhike ghansi.”

Ava ghaigulu

³¹ Oyo ava ghaigulu n'asinga abantu boonaboona. Oyo ava ku nsi aba wa ku nsi era ayogera ku bya nsi, aye ava mu igulu, n'asinga boonaboona.

³² Akakasa ebyo bye yabona era bye yawulira, aye ghazira aikiriza by'akoba.

³³ Oyo aikiriza by'akoba akakasa nga Katonda wa mazima.

³⁴ Oyo Katonda ye yatuma ayogera ebibono bya Katonda, kuba Katonda tagaba Mwoyo we mu bipimo.

³⁵ Lata w'Omwana amugonza era yata ebintu byonabyona mu buyinza bwe.

³⁶ Oyo aikiriza Mwana ali n'obulamu obutawaagho aye aloba okwikiriza Mwana taja kufuna bulamu, era aja kusigala ng'abonerezebwa Katonda.