Yoanne 21 - Baibuli Ekibono kya Katonda 2014

Yesu abonekera Abeegeresebwa omusanvu

¹ Ebyo bwe byawa Yesu yaabonekera kabiri Abeegeresebwa be ku nhandha ey'e Tiberia. Biti bwe byali:

² Simoni Petero, ni Thomasi ayetebwa omulongo, ni Nathanaeli eyava e Kana mu Galilaaya, ni batabane ba Zebedaayo, n'Abeegeresebwa abandi babiri, baali bali ghalala.

³ Simoni Petero yaabakoba ati: “Nja kuvuba.” Bale baamwiramu bati: “Twena ka tuje n'iwe.” Olwo baaniina mu lyato baaja. Aye obwire obwo ghazira kye baagemya.

⁴ Bwe bwali bukya Yesu yaayemerera ku mbali okw'enhandha aye baaloba kumumanha bati ni ye.

⁵ Yesu yaabakoba ati: “Abaana muligho n'eky'okulya?” Bairamu bati: “Busa.”

⁶ Yaabakoba ati: “Muwolobe akatimba kaimwe ku luuyi olw'omukono omusaadha okw'eryato mwidha kugemya.” Kale baawoloba akatimba aye okukaghaluzaayo okukaiza mu lyato kwabakaya olw'ebyenhandha kamaala bye baagemya.

⁷ Omwegeresebwa Yesu ye yagonzanga yaakoba Petero ati: “Ni Musengwa.” Petero olwawulira ati ni Musengwa yeesuulaku ekidhuuba, kuba yali madu, yaatuumira mu nhandha.

⁸ Aye Abeegeresebwa abandi kuba ti baali ghala n'obukalu, mita ng'oti kikumi, baajiira mu lyato okutuuka ku bukalu nga baghaluza akatimba ak'ebyenhandha.

⁹ Bwe baatuuka ku bukalu baabona omuliro ogw'amanda nga kuliku ebyenhandha n'omugaati.

¹⁰ Yesu yaabakoba ati: “Muleete ku byenhandha, bye mwakagemya.”

¹¹ Simoni Petero yaaja yaaghaluliza akatimba ku bukalu nga kaidhwire ebyenhandha ebibba kikumi n'ataanu na bisatu (153), aye waire byali kamaala bityo akatimba tikaakanuka.

¹² Yesu yaabakoba ati: “Mwidhe mulye.” Ghazira ku Beegeresebwa yakana kumubuuza ati: “Niiwe ani?” Kuba baamanha nga ni Musengwa.

¹³ Yesu yaidha yatoola omugaati yaagubagha n'ebyenhandha atyo.

¹⁴ Guno n'ogwali omukuzi ogwokusatu Yesu okubonekera Abeegeresebwa be ng'amaze okuzuukira mu bafu.

Yesu ni Petero

¹⁵ Bwe baamala okulya, Yesu yaakoba Simoni Petero ati: “Simoni mutabane wa Yoanne, ongonza okusinga bano?” Petero yaamwiramu ati: “Yii, Musengwa oidhi nga bwe nkugonza.” Yesu yaamukoba ati: “Liisanga entaama dhange ento.”

¹⁶ Kabiri Yesu yaamukoba omukuzi ogwokubiri ati: “Simoni mutabane wa Yoanne, ongonza?” Petero yaamwiramu ati: “Yii, Musengwa oidhi nga bwe nkugonza.” Yesu yaamukoba ati: “Yayanga entaama dhange.”

¹⁷ Kabiri Yesu yaamubuuza omukuzi ogwokusatu ati: “Simoni mutabane wa Yoanne, ongonza?” Petero yaanakughala olwa Yesu okumubuuza omukuzi ogwokusatu ati: “Ongonza?” Era yaamukoba ati: “Musengwa, oidhi byonabyona, oidhi nga nkugonza.” Yesu yaamukoba ati: “Liisanga entaama dhange.

¹⁸ Bwenebwene ka nkukobere: bwe wali omwisuka, weesibanga waaja ye wayendanga aye bw'olikairigha olighanika amakono go, owundi yaakusiba yaakutwala y'otayenda.”

¹⁹ Yayogera atyo okwoleka okufa kw'alifa n'ayolesa ekitiisa kya Katonda. Bwe yamala okwogera ebyo, yaamukoba ati: “Nnonereza.”

Yesu n'Omwegeresebwa omugonzi

²⁰ Petero yaagaluka yaabona Omwegeresebwa ole Yesu ye yagonzanga ng'ali kunonereza. Ono n'ole eyaseeta okumpi ni Yesu ku kyeigulo ekyasembayo n'amubuuza ati: “Musengwa, naani aja okukulyamu olukwe?”

²¹ Petero bwe yamubona yaakoba Yesu ati: “Musengwa, ate ono aliba atya?”

²² Yesu yaamwiramu ati: “Bwe nhenda abeegho okutuusa lwe ndiidha, ofaayo ki? Iwe nnonereza.”

²³ Ekibono kino kyasansaanira mu baikiriza ng'abantu bakoba bati Omwegeresebwa oyo ti wa kufa, ate nga Yesu ti yakoba ati ti wa kufa, aye yakoba ati: “Bwe nhenda abeegho okutuusa lwe ndiidha, ofaayo ki?”

²⁴ Ono n'Omwegeresebwa omudhulizi w'ebintu bino era eyabighandiika era twidhi ng'obudhulizi bwe bwa mazima.

²⁵ Era eriyo n'ebintu ebindi kamaala Yesu bye yakola era nguli byonabyona byaghandiikibwa, ndowooza ng'ebitabo ebyandighandiikiibwa tibyandisuze ku nsi kuno.