Yoanne 20 - Baibuli Ekibono kya Katonda 2014

Okuzuukira kwa Yesu

¹ Mu nkyonkyo, ku lunaku olwiririra Sabbato, era nga n'enzikiiza ekaaliku, Maria Magadalene yaawuuna ku magombe, yaabona ng'eibaale litooleibwagho ku magombe.

² Kale, yaalumuka yaaja ye Simoni Petero n'ole Omwegeresebwa Yesu ye yagonzanga, yaabakobera ati: “Batoire Musengwa mu magombe era titwidhi ghe bamutaire!”

³ Agho Petero n'Omwegeresebwa ole owundi baasituka baaja ku magombe.

⁴ Bombi baalumuka aye Omwegeresebwa ole owundi yaalumuka inho okusinga Petero, era yaamwesooka okutuuka ku magombe.

⁵ Yaakutama, yaalengeza mu magombe, yaabona engoye endheru nga dhiri agho, aye yaaloba kungira.

⁶ Simoni Petero yaidha ng'amunonereza, yangira mu magombe era yaabona engoye endheru nga dhiri agho,

⁷ n'ekitambaala ekyali ku mutwe gwa Yesu. Tikyali ghalala na ngoye ndheru aye kyali kizinge kyonka.

⁸ Agho Omwegeresebwa ole owundi eyasooka Petero okutuuka ku magombe yeena yangira yaabona era yaikiriza.

⁹ Kuba mu kiseera ekyo baali bakaali kutegeera Byaghandiikibwa ebikoba biti: “Ali n'okuzuukira mu bafu.”

¹⁰ Agho Abeegeresebwa bairayo eka.

Yesu abonekera Maria Magadalene

¹¹ Aye Maria yaayemerera ku luya okw'amagombe ng'ali kulira. Era bwe yali ng'ali kulira yaakutama yaalengeza mu magombe.

¹² Yaabona bamalaika babiri nga bavaire ebyeru nga batyaime aghaali ghateereibwa omulambo gwa Yesu, ng'owundi ali emintwetwe ate ng'owundi ali y'ebigere.

¹³ Baamukoba bati: “Mukazi iwe, olirira ki?” Yaabairamu ati: “Batoiremu Musengwa wange era tiidhi ghe bamutaire.”

¹⁴ Bwe yamala okwogera atyo, yaagaluka yaalinga einhuma we, yaabona Yesu ng'ayemereire agho aye tiyamumanha nga ni Yesu.

¹⁵ Yesu yaamubuuza ati: “Mukazi iwe, olirira ki? Naani y'oli kwagala?” Maria yaamudhuubiriza okuba omukuumi w'omu nimiro eyo, kale yaamukoba ati: “Isebo, oba nga niiwe omutoiremu nkobera gh'omutaire, ndidha kumutoolagho.”

¹⁶ Yesu yaamukoba ati: “Maria.” Agho Maria yaagaluka yaamukoba mu Luheburayi ati: “Rabboni,” ekitegeeza, “Omwegeresa!”

¹⁷ Yesu yaamukoba ati: “Otangemaku, kuba nkaali kwirayo ye Lata aye ja ye baganda bange obakobere oti ndi kwirayo ye Lata wange era Lata waibwe, Katonda wange era Katonda waibwe.”

¹⁸ Kale Maria Magadalene yaaja yaakobera Abeegeresebwa ati aboine Musengwa. Era yaabakobera obukwenda bwe yamukoba okubakoba.

Yesu yeeyoleka eri Abeegeresebwa be

¹⁹ Eigulo ly'olunaku lwene olwo, olwiririra Sabbato, endhigi dhaali nga nsibe Abeegeresebwa ghe baali beesololeiza kuba baali bali kutya Abayudaaya. Yesu yaidha yaabeemereramu ghagati yaabakoba ati: “Emiraala gibe n'imwe.”

²⁰ Bwe yamala okubakoba atyo yaabooleka obwala bwe n'embavu dhe. Abeegeresebwa be baasangaala bwe baabona Musengwa.

²¹ Kabiri Yesu yaabakoba ati: “Emiraala gibe n'imwe. Nga Lata bwe yantuma zeena mbatuma.”

²² Bwe yamala okubakoba ekyo yaabafuuwaku omuuka yaabakoba ati: “Mufune Mwoyo Mutukuvu.

²³ Kiisi ye munaasonighanga, ebibi bye nga bisoniyiibwa. Ate kiisi ye munaalobanga okusonigha, ebibi bye nga tibisoniyiibwa.”

Thomasi ni Yesu

²⁴ Mperaano, owundi ku Ikumi n'Ababiri, Thomasi ayetebwa omulongo, tiyaba nabo Yesu lwe yaidha.

²⁵ Kale baine baamukobera bati: “Tuboine Musengwa.” Aye yaabairamu ati: “Okutoolaku nga mboine ku nkovu mu bwala bwe mwe baafumita emisumaali, era ni ntaaku olwala lwange mu nkovu omwo, era ni ntaaku omukono gwange mu mbavu dhe, tighanga era tija kwikiriza naire.”

²⁶ Bwe ghaabitagho enaku omunaana, kabiri Abeegeresebwa be baali mu ndhu nga ni Thomasi ali nabo era nga n'endhigi ndhigale. Agho Yesu yaidha yaabeemereramu ghagati, yaakoba ati: “Emiraala gibe n'imwe.”

²⁷ Agho yaakoba Thomasi ati: “Ta ghano olwala lwo, era obone engalo dhange ogemeku ghano, era leeta omukono gwo ogute mu mbavu dhange. Leka kuba ataikiriza, aye ikiriza.”

²⁸ Thomasi yaamwiramu ati: “Musengwa wange era Katonda wange!”

²⁹ Yesu yaamukoba ati: “Oikiriiza lwa kuba omboine. Ba nkabi abaikiriza nga tibaboineeku.”

Ekyaghandiikisa ekitabo kino

³⁰ Eriyo ebyewuunhio ebindi kamaala Yesu bye yakola ng'Abeegeresebwa be babona ebitaaghandiikibwa mu kitabo kino.

³¹ Aye bino byaghandiikibwa ku lwaimwe, mwikirize nga Yesu ni Kurisito, Omwana wa Katonda, era olw'okwikiriza okwo, mufune obulamu mu liina lye.