Yoanne 19 - Baibuli Ekibono kya Katonda 2014

¹ Agho Pilato yaatwala Yesu amukube enkoba.

² Abaisirukale baatoola amawa baagalukamu engule baagamuvaaza ku mutwe era baamuvaaza ekivaalo kya langi ya nakasooma eky'abakungu.

³ Baatoolera okwidhanga bwe bamukoba bati: “Ghangaala, Kyabazinga w'Abayudaaya!” Era bwebamukuba empi.

⁴ Kabiri Pilato yaafuluma ku luya yaabakoba ati: “Wuuno mmubaleeteire ku luya, mubonere irala nga nze tibona musango gw'aiziiza.”

⁵ Kale Yesu yaafuluma ku luya ng'avaire engule ey'amawa n'ekivaalo eky'erangi ya nakasooma eky'abakungu. Pilato yaabakoba ati: “Omuntu wuuno!”

⁶ Bakabona Abakulu n'abakuumi bwe baamubona baayasiikana bati: “Mukomerere ku musalaba! Mukomerere ku musalaba!” Pilato yaabakoba ati: “Imwe mumutwale mumukomerere ku musalaba, kuba nze tibona musango gw'aiziiza.”

⁷ Abayudaaya baamwiramu bati: “Ife tuli n'eiteeka era olw'eiteeka eryo agwaine okufa kuba yeefuula okuba Omwana wa Katonda.”

⁸ Pilato bwe yawulira ekibono ekyo yeeyongeraku okutya.

⁹ Era yangira kabiri mu kisaagaati yaabuuza Yesu ati: “Oli wa gha?” Aye Yesu yaaloba okumwiramu.

¹⁰ Pilato yaamukoba ati: “Toyogera ninze? Toidhi nga ndi n'obukumu obukulekula era n'obukumu obukukomerera ku musalaba.”

¹¹ Yesu yaamwiramu ati: “Tiwandibaire na bukumu ku nze nguli tibwakugheebwa Katonda. Kale ampaireyo mu ngalo dho n'ali n'ekibi ekisinga.”

¹² Pilato bwe yawulira ekyo yaagezaaku okusala amagezi amulekule. Aye Abayudaaya baayongera okwasiikana bati: “Bw'olekula omusaadha oyo nga toli mukagwa wa Kaisari. Yeenayeena eyeefuula kyabazinga atakania Kaisari.”

¹³ Agho Pilato bwe yawulira ebibono ebyo yaafulumya Yesu era yaatyama ku kityamo eky'obulamuzi mu kifo ekyetebwa Amabaale Amataanhe, ate mu Luheburayi bakyeta Gabbatha.

¹⁴ Lwali lunaku lwa kutegeka Kibinuko eky'Okubitizibwa era esaawa dhaali mukaaga, Pilato yaakoba Abayudaaya ati: “Wuuno kyabazinga waimwe!”

¹⁵ Bale baayasiikana bati: “Twala ere! Twala ere! Mukomerere ku musalaba!” Pilato yaabakoba ati: “Mwenda nkomerere kyabazinga waimwe ku musalaba?” Bakabona Abakulu baamwiramu bati: “Ife tuzira kyabazinga, okutoolaku Kaisari.”

¹⁶ Kale agho Pilato yaamubagha baje bamukomerere ku musalaba. Agho ni baagema Yesu, baamutwala.

Okukomererwa kwa Yesu ku musalaba

¹⁷ Yaabbeeda omusalaba gwe mwene, yaafuluma, yaaja mu kifo ekyetebwa eky'Ekighanga, ate mu Luheburayi nga bakyeta Gologotha.

¹⁸ Baamukomerera agho ku musalaba n'abandi babiri ku luuyi ni ku luuyi mwene yaaba ghagati.

¹⁹ Pilato yaakola ekighandiiko yaakita ku musalaba nga kikoba kiti: YESU OW'E NAZARETHI, KYABAZINGA W'ABAYUDAAYA.

²⁰ Abayudaaya kamaala baakisomaku kuba ekifo kino kyali kumpi n'ekibuga, ate kyaghandiikibwa mu Luheburayi, ni mu Lulatini, ni mu Lugureki.

²¹ Bakabona Abakulu baakoba Pilato bati: “Otaghandiika oti, ‘Kyabazinga w'Abayudaaya’, aye ghandiika oti, ‘Ono yeeyeta Kyabazinga w'abayudaaya.’ ”

²² Pilato yaabairamu ati: “Kye mpandiise nkighandiise.”

²³ Abaisirukale bwe bamala okukomerera Yesu ku musalaba baatoola ebivaalo bye baabigabaniamu emiteeko ena, kiisi mwisirukale yaafunaku omuteeko. Baatoola n'ekanzu ye eyalukibwa obulukibwe yoonayoona okuva ghaigulu nga muzira lutungo naire.

²⁴ Abaisirukale baakoba bati: “Tutagikanula aye tugikubeku akalulu tubone anaaba mwene yo.” Era baisania. Kino kyabaagho era okutuukiriza Ebyaghandiikibwa ebikoba biti: “Baagabana ebivaalo byange, era baakuba akalulu ku kidhuuba kyange.” Era ekyo abaisirukale kye baakola.

²⁵ Inhina ni muganda wa inhina, Maria muka Kilopa, ni Maria Magadalene baali beemereire agho kumpi n'omusalaba kwe yali.

²⁶ Yesu bwe yabona inhina n'Omwegeresebwa omugonzi nga ayemereire kumpi agho, yaakoba inhina ati: “Mukazi iwe, mutabane wo wuuyo.”

²⁷ Era yaakoba Omwegeresebwa oyo ati: “Inhoko wuuyo.” Era okuva ku olwo Omwegeresebwa oyo yaamutwala eka ewuwe.

Okufa kwa Yesu.

²⁸ Ebyo bwe byawa, Yesu ng'akiidhi bukalamu ng'ebintu byonabyona biwoire, era olw'okwenda okutuukiriza Ebyaghandiikibwa yaakoba ati: “Mpulira endiwo.”

²⁹ Agho ghaaligho ekidiita nga kiidhwire omwenge ogw'emizabbibu ogw'endoota, kale bainhika ekyangu mu mwenge ogw'emizabbibu ogwo baakita ku luti olwetebwa hissopu, baakimuta ku munwa.

³⁰ Yesu bwe yamala okugheebwa omwenge ogw'emizabbibu ogwo yaakoba ati: “Biwoire.” Yaakoteka omutwe yaaghaayo omwoyo gwe.

Yesu bamufumita eifumo mu mbavu

³¹ Olunaku lwali lwa kwetegeka. Kale olw'okulobera emirambo okusigala ku misalaba ku lunaku lwa Sabbato ate nga Sabbato eyali eidha yali nkologho, Abayudaaya baaja baasaba Pilato, amagulu g'abaakomererwa ku misalaba gamenhebwe batoolebweku.

³² Agho ni abaisirukale baidha baamenha amagulu ag'eyasooka n'ag'owokubiri, abaakomererwa ni Yesu.

³³ Aye bwe baatuuka ku Yesu ni babona ng'amaze okufa, baaloba kumumenha magulu.

³⁴ Aye omwisirukale owundi yaatoola eifumo yaalifumita Yesu mu mbavu, era olwamufumita ati ghaavaagho omusaayi n'amaadhi.

³⁵ Oyo eyabona kino n'akikakasa era obudhulizi bwe bwa mazima. Aidhi nga by'ayogera bya mazima weena oikirize.

³⁶ Kuba ebintu bino byabaagho okutuukiriza Ebyaghandiikibwa ebikoba biti: “Talimenhebwa igumba.”

³⁷ Era kabiri ekyaghandiikibwa ekindi kikoba kiti: “Baliringa ku ole ye baafumita.”

Okuziikibwa kwa Yesu

³⁸ Ebyo bwe byawa, Yosefu ow'Arimathea, eyali omwegeresebwa wa Yesu ow'omu ngiso, olw'okuba yali atya Abayudaaya, yaaja yaasaba Pilato amuganhe okutoolagho omulambo gwa Yesu, era Pilato yaamuganha. Kale yaaja okugutoolagho.

³⁹ Ni Nikodemo yeena, ole eyaja okubona Yesu obwire, yaaja ni kilo edhighera ng'oti makumi asatu entabule edh'obuwoowo bwa mirra ni alowe.

⁴⁰ Agho nga batoola mulambo gwa Yesu, nga baguzinga mu ngoye endheru ghalala n'obuwoowo, ng'empisa ey'Abayudaaya mu kuziika bwe yali.

⁴¹ Mperaano, agho mu kifo ghe baakomerera Yesu ghaaligho enimiro omwali amagombe amayaaka agaali tigateebwangamuuku mufu yeenayeena.

⁴² Kale, nga bwe lwali olw'okwetegeka okw'Abayudaaya, ate nga ago amagombe gaali agho kumpi, Yesu baamuta omwo.