Yoanne 18 - Baibuli Ekibono kya Katonda 2014

Yesu agemwa

¹ Yesu bwe yamala okwogera ebyo, yaaja n'Abeegeresebwa be, baasomoka akaiga ka Kiduroni. Eyo yaliyo enimiro mwe yangira n'Abeegeresebwa be.

² Mperaano, Yuda eyamulyamu olukwe yali aidhiyo bukalamu, kuba Yesu n'Abeegeresebwa be baateranga okujaayo emikuzi kamaala.

³ Kale Yuda yaaja mu kifo ekyo n'abaisirukale n'abakuumi abaatumibwa Bakabona Abakulu n'Abafarisaayo. Baaja nga bagemye eby'okulwanisa, amataala n'engada edhiri kwaka.

⁴ Yesu yamanha byonabyona ebyali bija okumutuukaku, yeesowolayo yaababuuza ati: “Muli kwagala ani?”

⁵ Baamwiramu bati: “Yesu ow'e Nazarethi.” Yesu yaabairamu ati: “Ninze.” Yuda eyamulyamu olukwe yali ayemereire agho nabo.

⁶ Yesu bwe yabakoba ati: “Ninze,” beesenda baagwa ghansi.

⁷ Kabiri yaababuuza ati: “Muli kwagala ani?” Era bairamu bati: “Yesu ow'e Nazarethi.”

⁸ Yesu yaabakoba ati: “Mbakobeire nti ninze, era oba nga ninze ye muli kwagala bano mubaleke baje.”

⁹ Ekibono kye yayogera ati: “Ku be wampa ghazira ye nabuza,” kyatuukirira.

¹⁰ Agho Simoni Petero eyali n'empiima yaagisowolayo, yaatema omwiru w'Omukulu wa Bakabona yaamukutulaku kutu ow'oku mukono omusaadha. Eriina ery'omwiru oyo nga ni Maluko.

¹¹ Aye Yesu yaakoba Petero ati: “Empiima yo giize mu kiruutu kyayo. Ekikopo Lata ky'ampaire nnaaloba okukinhwa?”

Yesu mu maiso ga Anna

¹² Agho abaisirukale, n'omukulu waibwe, n'abakuumi b'Abayudaaya baagema Yesu baamusiba.

¹³ Baasooka baamutwala ye Anna. Ono n'eyali mukoirume wa Kayafa eyamuzaalira mukazi we, ate Kayafa n'eyali Omukulu wa Bakabona ow'omwaka ogwo.

¹⁴ Kayafa oyo n'eyagha Abayudaaya amagezi ati ekisinga n'omuntu omulala okufiiririra abantu boonaboona.

Petero yeegaana Yesu

¹⁵ Simoni Petero yaanonereza Yesu, era ghaabaagho n'Omwegeresebwa owundi eyanonereza. Ono Omwegeresebwa owundi yali amanhiibwa Omukulu wa Bakabona. Kale yangira ni Yesu mu kisaagaati ky'Omukulu wa Bakabona.

¹⁶ Aye Petero yasigala ku luya ku mulyango. Omwegeresebwa ole owundi eyali amanhiibwa yairayo ku mulyango yaayogera n'omugheereza omughala eyali akuuma omulyango, era yaingiza Petero.

¹⁷ Omughala eyali akuuma omulyango yaakoba Petero ati: “Iwe toli Mwegeresebwa wa musaadha ole?” Petero yaamwiramu ati: “Busa, tiri.”

¹⁸ Ebiseera byali bya kiinhogogo, kale abagheereza n'abakuumi baali bakozeegho omuliro ogw'amanda nga beemereire agho bali kwota. Petero yeena yali ayemereire nabo agho ng'ali kwota.

Kabona Omukulu abuuza Yesu

¹⁹ Agho Omukulu wa Bakabona yaabuuza Yesu ebigema ku Beegeresebwa be, ni ku bye yali ng'ayegeresa.

²⁰ Yesu yaamwiramu ati: “Buliidho nayogeranga nga boonaboona babona. Mbairenga nga ndhegereseza mu sinagoga ni mu isinzizo, Abayudaaya boonaboona mwe beesololezanga. Ghazira kye nayogera mu ngiso.

²¹ Kale lwaki ombuuza? Buuza abo abaawulira bye nabakoba, baidhi bye nakoba.”

²² Yesu bwe yakoba ebyo, omukuumi mulala ku baali beemereire agho yaamukuba oluyi ng'akoba ati: “Otyo bw'oiramu Omukulu wa Bakabona.”

²³ Yesu yairamu ati: “Oba nga ghaligho ekibi kye nkobye, numiriza. Aye oba nga ndhogeire kituufu, onkubiire ki?”

²⁴ Agho Anna yaamugheereza ye Kayafa Omukulu wa Bakabona era ng'akaali musibe.

Petero yeegaana Yesu kabiri

²⁵ Mperaano Simoni Petero yali akaayemereire agho ng'ali kwota omuliro. Baamubuuza bati: “Iwe toli Mwegeresebwa wa musaadha oyo?” Petero yeegaana ati: “Busa, tiri.”

²⁶ Omugheereza owundi ow'Omukulu wa Bakabona nga wa kika n'ole Petero ye yasalaku kutu yaakoba ati: “Tyakuboine naye mu nimiro?”

²⁷ Kabiri Petero yeegaana era agho enkoko yaakolyoka.

Yesu mu maiso ga Pilato

²⁸ Obwire nga bwakakya, baatoola Yesu mu ndhu ya Kayafa baamutwala mu kisaagaati ky'omufuzi Omuroma ekyetebwa Puraetorio. Aye beene tibangira mu kisaagaati ekisalirwamu emisango olw'obutenda kwereetaku mbiidhabiidha, basobole okulya ku Kibinuko eky'Okwidhukiriraku Okubitizibwa.

²⁹ Kale Pilato yaafuluma yaaja ku luya ye baali yaababuuza ati: “Omusaadha ono mumulanga ki?”

³⁰ Baamwiramu bati: “Nguli ti mukozi wa bibi titwandimughaireyo y'oli.”

³¹ Pilato yaabakoba ati: “Mumutwale mumuwozese imwe beene nga mujiira ku mateeka gaimwe.” Abayudaaya baamwiramu bati: “Ife titwikirizibwa kusalira muntu yeenayeena gwa kufa.”

³² Yesu kye yayogera ku kufa kwe kyatuukirira.

³³ Agho Pilato yangira kabiri mu kisaagaati yaayeta Yesu yaamubuuza ati: “Niiwe Kyabazinga w'Abayudaaya?”

³⁴ Yesu yaamwiramu ati: “Ekyo okyogeire ku lulwo, oba ghaligho abakukobeire ebinfaaku?”

³⁵ Pilato yaamukoba ati: “Nze ondhese Muyudaaya? Abantu b'eighanga lyo ni Bakabona Abakulu n'abakughaireyo ye ndi okoze ki?”

³⁶ Yesu yaamwiramu ati: “Obwakyabazinga bwange ti bwa mu nsi muno. Nguli obwakyabazinga bwange bubaire bwa mu nsi muno, abasaadha bange baakalwaine naaloba kugheebwayo mu mikono gya Bayudaaya. Aye obwakyabazinga bwange ti bwa mu nsi muno.”

³⁷ Pilato yaamukoba ati: “Ekikoba oli kyabazinga?” Yesu yaamwiramu ati: “Okyogeire, ndi kyabazinga. Kino kye nazaalirwa, era ekyandeeta mu nsi ni kino: okumanhisa amazima. Oyo yeenayeena ow'amazima, awulira eiroboozi lyange.”

³⁸ Pilato yaamukoba ati: “Amazima ni ki?” Pilato bwe yamala okwogera ebyo yaaja ku luya y'Abayudaaya kabiri yaabakoba ati: “Omuntu ono tibona musango gw'aiziiza.

Yesu asalirwa ogw'okufa

³⁹ Aye nga bwe muli n'empisa ey'okubalekulirayo omusibe mulala buli ku Kibinuko eky'Okubitizibwa, mwandyenze mbalekulire Kyabazinga w'abayudaaya?”

⁴⁰ Kabiri bairamu nga baasiikana bati: “Ti oyo, aye Barabba.” Barabba ono yali munhazi.