Yoanne 17 - Baibuli Ekibono kya Katonda 2014

Yesu asabira Abeegeresebwa be

¹ Yesu bwe yamala okukoba ebyo, yaalinga ghaigulu yaakoba ati: “Lata, ekiseera kituuse. Yoleka abantu ekitiisa ky'Omwana wo, n'Omwana asobole okubooleka ekitiisa kyo.

² Wamugha obukumu ku bantu boonaboona aghe obulamu obutawaagho abo boonaboona be wamugha.

³ Era obulamu obutawaagho ni buno: Abantu okukumanha iwe wenka Katonda ow'amazima n'oyo ye watuma, Yesu Kurisito.

⁴ Ndholeike ekitiisa kyo mu nsi era mmaze okukola ekyo kye wampa okukola.

⁵ Era mperaano Lata, yoleka ekitiisa kyange mu maiso go, n'ekitiisa kye nali nakyo n'iwe ng'ensi ekaali kubaagho.

⁶ “Abo be wampa okuva mu nsi nabamanhisa eriina lyo. Baali babo, waabampa era baagema ebibono byo.

⁷ Mperaano bamanhie nga byonabyona bye wampa byava y'oli.

⁸ Kuba ebibono bye wampa mbibakobeire era baabisangaalira. Bamanhie bati bwenebwene nava y'oli era baikiriza nga niiwe owantuma.

⁹ “Abo be ndi kusabira. Tiri kusabira ba nsi, aye ndi kusabira abo be wampa, kuba babo.

¹⁰ Abange boonaboona babo era ababo boonaboona bange, era mu abo mwe nfunira ekitiisa.

¹¹ Nze ndi kwidha y'oli, tikaali mu nsi, aye abo bakaali mu nsi. Lata Omutukuvu, abo be wampa bakuumenga ng'okozesa obukumu obw'eriina lyo eryo, babe kitole oti ninze n'iwe bwe tuli.

¹² “Bwe nali nga ndi nabo, nali nga mbakuuma nga nkozesa obukumu bw'eriina lyo lye wampa. Nabakuuma era ghazira yaghaba okutoolaku oyo eyali ow'okuzikirira, Ebyaghandiikibwa bisobole okutuukirira.

¹³ Mperaano ndi kwidha y'oli era bino mbyogeire mu nsi babe n'eisanhu lyange mu myoyo gyaibwe, mu bwidhuvu.

¹⁴ Nze nabakoba ekibono ekyo, era ensi yaabakyagha, kuba ti ba nsi ng'oti ninze bwe ntali wa nsi.

¹⁵ Tiri kukusaba kubatoola mu nsi aye ndi kukusaba obawonie Omubi.

¹⁶ Bano ti ba nsi nga nze bwe ntali wa nsi.

¹⁷ Batukuze n'amazima ekibono kyo n'amazima.

¹⁸ Mbatuma mu nsi ng'oti niiwe bwe wantuma mu nsi.

¹⁹ Nze neeghaayo ku lwaibwe, memale boona beegheeyo mu mazima.

²⁰ “Tiri kusabira bano bonka aye ndi kusabira n'abo boonaboona abandhikiriza olw'ebibono bya bano.

²¹ Boonaboona babe kitole, nga iwe Lata bw'oba mu nze zeena ni mba mu iwe, boona babe mu ife memale ensi eikirize eti niiwe owantuma.

²² Ekitiisa kye wampa nakibagha memale olwo babe ekitole, nga ife bwe tuli ekitole.

²³ Nze mbabeemu weena obe mu nze memale olwo babeere irala ekitole, n'ensi emanhe nga niiwe owantuma era ng'obagonza nga bw'ongonza.

²⁴ Lata, kye neegomba n'okuba n'abo be wampa ghe ndi, babone ekitiisa kyange kye wampa, kuba wangonza nga n'ensi ekaali kutondebwa.

²⁵ Lata Omutukuvu, ensi tekumanhanga aye nze nkwidhi era bano baidhi nga niiwe owantuma.

²⁶ Nabamanhisa eriina lyo era ndidha kwongera okulimanhisa, okugonza kw'ongonza kubabeemu era zeena mbabeemu.”