Yoanne 16 - Baibuli Ekibono kya Katonda 2014

¹ “Mbakobeire ebintu bino mulobe kuwaamu maani.

² Balibabinga mu sinagoga. Ate ekiseera kirituuka oyo abaita lw'alirowooza ati okukola ekyo aba ali kukola mulimo gwa Katonda.

³ Ebintu bino balibikola olw'okuba tibamanhanga Lata waire nze.

⁴ Aye mbakobeire ebintu bino ekiseera kyabyo kije okutuuka nga mwidhukira nga nabibakoberaku.” “Ebintu bino tyabibakobera mu kwinhama kuba nali ndi n'imwe.

Omulimo gwa Mwoyo Mutukuvu

⁵ Aye mperaano ndi kuja y'oyo eyantuma, era ghazira ku imwe ambuuza ati: ‘Olaga gha?’

⁶ Era olw'okuba mbakobeire ebintu ebyo, enaku ebaidhwire ku mwoyo.

⁷ Aye mbakobera amazima: niimwe abaganhulwa bwe nja kuba bwe ntaja Omubeezi taliidha ye muli aye bwe ndija ndimubagheereza.

⁸ Era bw'aliidha alirumiriza ensi ku bigema ku kibi, ku butuufu era ni ku kusalirwa omusango.

⁹ Aligirumiriza ku bigema ku kibi, kuba tiyandhikiriza.

¹⁰ Aligirumiriza ku bigema ku butuufu, kuba ndi kuja ye Lata era timukairayo kumbona.

¹¹ Aligirumiriza ku bigema ku kusalirwa omusango, kuba afuga ensi eno yamala ira okusalirwa omusango.

¹² “Nkaali n'ebintu kamaala eby'okubakobera aye timughanga kubigumira mperaano.

¹³ Aye oyo bw'aliidha, Mwoyo ow'amazima, alibatuusa ku mazima goonagoona. Talyogera bibye ku bubwe aye by'awulira by'alyogera, era alibakobera eby'okubaagho.

¹⁴ Alyoleka ekitiisa kyange kuba alitoola ebyange yaabibakobera.

¹⁵ Ebya Lata wange byonabyona byange, kye nviire ni nkoba nti Mwoyo alitoola ebyange yaabibakobera.

Obughafu bulifuuka eisanhu

¹⁶ “Mu ntangama ti ya ghala nga timukambona, ate mu ntangama ntono mulimbona.”

¹⁷ Abandi ku Beegeresebwa be baatoolera okwebuuzagania bati: “Kiki kino ky'atukoba, ati, ‘Mu kiseera ekitali kya ghala nga timumbona, ate kabiri mu kiseera kitono mulimbona.’ Era ati, ‘Kuba nja ye Lata.’

¹⁸ Agho baakoba bati, ‘Ategeeza ki bw'akoba ati entangama entono?’ Nga tituli kutegeera ky'akoba!”

¹⁹ Yesu yaategeera nga bali kwenda kumubuuza, yaabakoba ati: “Muli kwenda kumanha kino kye mbakobye nti, ‘Mu ntangama ntono muliba nga timukambona, ate kabiri nti, mu ntangama ntono mulimbona?’

²⁰ Bwenebwene ka mbakobere, mulirira, mwagegenga, aye ensi erisagamba; muliwulira enaku, aye enaku yaimwe erifuuka eisanhu.

²¹ Omukazi bw'aba ng'aja okuzaala awulira obulumi kuba ekiseera kye kituuse, aye kasita amala okuzaala omwana, aba nga takaidhukira bulumi olw'eisanhu ery'okuzaala omuntu ku nsi.

²² Mperaano mwena muwulira, enaku aye ndidha kabiri kubabona era emyoyo gyaimwe gisagambe. Era okusagamba okwo ghazira muntu yeenayeena alikubatoolaku.

²³ Olunaku olwo bwe lulituuka timulimbuuza kintu kyonakyona. Bwenebwene ka mbakobere: Lata alibagha kyonakyona kye mulisaba mu liina lyange.

²⁴ Ni ye buli eno timusabangaku kintu kyonakyona mu liina lyange. Musabe muligheebwa, okusagamba kwaimwe kwatuukirira.

Yesu yaghangula ensi

²⁵ “Mbairenga nkozesa ndheso okubakobera ebintu bino aye ekiseera kiidha kutuuka mbe nga tikaayogera n'imwe mu ndheso, aye mbakobere busimbalaala ebigema ku Lata.

²⁶ Ku lunaku olwo mulimusaba mu liina lyange. Era tibakoba nti ndibasabiragho ye Lata.

²⁷ Lata mwene abagonza, kuba mwangonza era mwaikiriza nga nva wa Katonda.

²⁸ Nava ewa Lata naidha mu nsi kabiri ndi kuva mu nsi nja ye Lata.”

²⁹ Abeegeresebwa be baakoba bati: “Mperaano oboneka ni otooleire okwogera obusimbalaala nga tokozeisa ndheso.

³⁰ Mperaano twidhi nga oidhi byonabyona era tikyetaagisa muntu yeenayeena kukubuuza. Kyetuva twikiriza nga ova wa Katonda.”

³¹ Yesu yaabairamu ati: “Mperaano mwikiriza?

³² Ekiseera kiri kwidha era kituuse musansaanire buli muntu ewuwe mundeke zenka. Ate nga tiri zenka, kuba Lata ali ninze.

³³ Bino mbibakobeire mube miraala mu nze. Mu nsi muno mwidha kufuna ebizibu aye mugumenga, nze mpangwire ensi.”