Yoanne 15 - Baibuli Ekibono kya Katonda 2014

Yesu n'omuzabbibu gwene

¹ “Ninze omuzabbibu gwenegwene, ate Lata wange n'omulimi.

² Kiisi lusaga oluli ku nze olutayama alukutulaku, ate kiisi lusaga olwama aluwoolera lwanhirira male lwayama inho.”

³ “Imwe mperaano muli balongoofu olw'ebibono bye mbakoba.

⁴ Mube mu nze zeena mbe mu imwe nga tibavaamu. Ng'olusaga bwe lutaghanga kwama nga luli lwonka, okutoolaku nga luli ku muzabbibu, mwena timughanga kwama okutoolaku nga muli mu nze.

⁵ “Ninze omuzabbibu, niimwe ensaga. Oyo aba mu nze zeena ni mmubaamu, ayama inho kuba ghazira kye musobola ghe nzira.

⁶ Oyo atasigala mu nze asuulibwa ere ng'oti n'olusaga bwe lusuulibwa ere ni lukala ensaga ng'oti n'edho dhisolozebwa dhaasuulibwa mu muliro dhaaya.

⁷ Bwe muba mu nze n'ebibono byange ni biba mu imwe, musabenga kyonakyona kye mwenda kinaabakolerwanga.

⁸ Bwe mwama einho muba beegeresebwa bange era mwoleka ekitiisa kya Lata wange.

⁹ Nga Lata bw'angonza, zeena bwe mbagonza. Mwekalangulire mu mukwano gwange.

¹⁰ Bwe muwulira ebiragiro byange mwidha kwekalangulira mu mukwano gwange oti ninze bwe mpulira ebiragiro bya Lata wange ni neekalangulira mu mukwano gwe.

¹¹ “Bino mbibakobeire eisanhu lyange libe mu imwe era eisanhu lyaimwe libe nga lituukiriire.

¹² Ekiragiro kyange ni kino: mugonzanienga ng'oti ninze bwe mbagonza.

¹³ Ghazira ali na kugonza kusinga kw'oyo aghaayo obulamu bwe ku lwa bakagwa be.

¹⁴ Bwe mukola bye mbalagira muba bakagwa bange.

¹⁵ Tikaabeeta bagheereza, kuba omugheereza tamanha Musengwa we by'akola. Aye mbeeta bakagwa bange, kuba byonabyona bye nawulira okuva ewa Lata wange nabibamanhisa.

¹⁶ Ti niimwe abaanonda aye ninze eyabalonda era naabataagho okuja okwama ebibala, ebibala ebitawaagho. Era Lata anaabaghanga kyonakyona kye munaasabanga mu liina lyange.

¹⁷ Kino kye mbalagira: mugonzanienga.”

Ensi eribakyagha

¹⁸ “Oba nga ensi ebakyagha, muteerabira nga ninze ensi ye yasooka okukyagha.

¹⁹ Nguli muli ba nsi, ensi yandibagonziiza ng'abaayo. Aye nabalonda okuva mu nsi era timukaali ba nsi, ensi ky'eva n'ebakyagha.

²⁰ Mwidhukire kye mbakobye: omugheereza tasinga Musengwa we. Oba nga nze bankiriga, mwena balibakiriga; oba nga baawulira ebibono byange, ebyaimwe byona balibiwulira.

²¹ Aye balibakola bino byonabyona ku lwange, kuba tibaidhi oyo eyantuma.

²² Nguli tyaidha ni ndhogera nabo nguli bazira kibi, aye mperaano bazira kya kwegemya.

²³ Akyagha nze, akyagha ni Lata wange yeena.

²⁴ Nguli tyakola byewuunhio nga babona, omuntu owundi by'atakolangaku, nguli bazira kibi. Aye mperaano baabibona, era baatukyagha twembi nze ni Lata wange.

²⁵ Kino kyali kiri n'okubaagho okutuukiriza ekyaghandiikibwa mu Mateeka gaibwe ekikoba kiti: ‘Bankyayiire busa.’

²⁶ “Aye Omubeezi bw'aliidha ye ndibatumira okuva eri Lata, Mwoyo ow'amazima ava mu Lata, oyo alindhulira.

²⁷ Era mwena mulindhulira kuba mubaire ninze okuviira irala ku ntoolo.”