Yoanne 14 - Baibuli Ekibono kya Katonda 2014

Yesu n'engira etuuka eri Lata

¹ Yesu yaabakoba ati: “Mutabanga beeraliikirivu mu myoyo gyaimwe. Mwikirize Katonda, zeena mundhikirize.

² Mu ndhu ya Lata wange mulimu ebifo kamaala era ndi kuja kubategekera kifo. Nguli ti bwekiri tyandibakobeire kino.

³ Bwe ndimala okuja n'okubategekera ekifo ndiira naabatwala ye ndi, mwena mwaba ghe ndi.

⁴ Engira mugiidhi etuuka ye nja.”

⁵ Thomasi yaamukoba ati: “Musengwa, titwidhi y'olaga memale tughanga tutya okumanha engira etuukayo?”

⁶ Yesu yaamwiramu ati: “Ninze engira, ninze amazima, era ninze obulamu. Ezira atuuka ye Lata okutoolaku ng'abise mu nze.

⁷ Nguli nze mundidhi ni Lata wange mwandimumanhie, era okuva ni mperaano mumwidhi era mumuboine.”

⁸ Filipo yaamukoba ati: “Musengwa, tulage Lata kinaatumala.”

⁹ Yesu yairamu ati: “Filipo mbaire n'imwe okumala entangama, aye era waaba nga tondidhi? Oyo abona nze aba aboine Lata. Memale okoba otya oti, ‘Tulage Lata?’

¹⁰ Toikiriza nga nze mba mu Lata era ni Lata yaaba mu nze? Ebibono bye mbakoba tibibakoba ku bwange, aye Lata oyo aba mu nze mwene n'akola.

¹¹ Mwikirize kye mbakoba nti: nze mba mu Lata era ni Lata yaaba mu nze. Oba ng'ekyo tikimala mwikirize olw'ebyo bye nkola.

¹² Bwenebwene ka mbakobere: andhikiriza alikola bye nkola ate alikola n'ebisinga agho, kuba nze ndi kuja ye Lata.

¹³ Era kyonakyona kye munaasabanga mu liina lyange ndikikola, ekitiisa kya Lata kyeyolekere mu Mwana.

¹⁴ Bwe munaasabanga ekintu kyonakyona mu liina lyange, ndikikola.

Yesu asuubiza Mwoyo Mutukuvu

¹⁵ “Oba nga mungonza, mugemenga ebiragiro byange.

¹⁶ Zeena ndisaba Lata, era alibagha Omubeezi owundi atalibavaaku ebyanda n'ebyanda.

¹⁷ Ni Mwoyo ow'amazima. Abantu ab'ensi tibasobola kumusangaalira, kuba tibamubona era tibamwidhi. Aye imwe mumwidhi kuba aba n'imwe, era aba mu imwe.

¹⁸ “Tiribaleka nga muli baghafu, ndiira ye muli.

¹⁹ Esigaire akaseera katono ensi erekere okumbona aye nga imwe mumbona. Olw'okuba nze ndi mulamu, mwena mwidha kubanga balamu.

²⁰ Olunaku olwo bwe lulituuka mulimanha nga mba mu Lata wange, imwe mwaba mu nze, ate nze naaba mu imwe.

²¹ Oyo aganha ebiragiro byange era n'abigema, aba nga n'oyo angonza. Lata wange agonza oyo angonza, zeena naamugonza, era Lata wange oyo amweyolekeramu.”

²² Yuda, atali Isikarioti, yaamubuuza ati: “Musengwa, olyeyoleka otya ye tuli n'oteeyoleka eri nsi?”

²³ Yesu yaamwiramu ati: “Oyo angonza agema ekibono kyange, oyo Lata wange alimugonza era Lata, ninze tulija y'ali twasiisira eyo.

²⁴ Oyo atangonza tagema bibono byange. Ate ng'ekibono kye muwulira ti kyange aye kya Lata eyantuma.

²⁵ “Mbakobeire ebintu bino nga nkaali n'imwe.

²⁶ Aye omubeezi, Mwoyo Mutukuvu, Lata y'alituma mu liina lyange, alibeegeresa ebintu byonabyona, yaabaidhusa byonabyona bye nabakoba.

²⁷ “Mbalekeire emiraala, emiraala gyange gyene gye mbaghaire ate tigibaghaire ng'ensi bw'egigaba. Muteeraliikirira mu myoyo gyaimwe waire okutya.

²⁸ Muwuliire bwe mbakobye nti ndi kuja, aye ndi kwira ye muli. Nguli mubaire mungonza mwandibaire basangaavu olw'okuba ndi kuja ye Lata. Kuba oyo asinga nze.

²⁹ Mbakobeire ebintu bino nga bikaali kubaagho, lwe biribaagho mwikirize.

³⁰ Tiidha kwogera bintu kamaala n'imwe kuba omufuzi ow'ensi eno ali kwidha. Aye nze tanfuga.

³¹ Aye nkola nga Lata bw'andagira, ensi emanhe nga ngonza Lata. Musituke tuje, tuve ghano.”