Yoanne 13 - Baibuli Ekibono kya Katonda 2014

Yesu anaaza ebigere by'Abeegeresebwa be

¹ Mperaano Ekibinuko eky'Okubitizibwa kyali kiri kumpi okutuuka. Yesu yamanha ng'esaawa ye ey'okuva mu nsi okwirayo ye Ise yoona yali etuuse. Bwe yagonza ababe abaali mu nsi yabagonza okutuukiza irala ku nkomerero.

² Yesu n'Abeegeresebwa be baali balya ekyeigulo, era Sitaani yali amaze okuta mu mwoyo gwa Yuda Isikarioti mutabane wa Simoni ekidhuubo eky'okulya mu Yesu olukwe.

³ Yesu yali akiidhi nga Lata yata ebintu byonabyona mu buyinza bwe era yali akiidhi nga yava ye Katonda era ng'ali kuja ye Katonda.

⁴ Kale yaasituka ku kiiwulo yaisa ghale ebivaalo bye yaagema tawulo yaagyesiba mu nkende.

⁵ Agho yaafuka amaadhi mu benseni, yaatoolera okunaaza Abeegeresebwa be ebigere nga bw'abisiimuula n'etawulo ye yali yeesibye mu nkende.

⁶ Bwe yatuuka ku Simoni Petero, Petero yaamukoba ati: “Musengwa, oja kunaaza nze bigere?”

⁷ Yesu yaamwiramu ati: “Mperaano iwe totegeera nze kye ndi kukola aye olikitegeera nga bino bibise.”

⁸ Petero yairamu ati: “Tikiribaagho iwe okunaaza nze ebigere!” Aye Yesu yaamukoba ati: “Bwe ntakunaaza ng'olwo tokaali mwegeresebwa wange.”

⁹ Simoni Petero yaamwiramu ati: “Musengwa niini otaannaaza bigere byonka, aye nnaaza n'emikono era n'omutwe!”

¹⁰ Aye Yesu yaamukoba ati: “Omuntu yeenayeena bw'aba ng'amaze okunaaba aba yeenayeena atukwire era nga tiyeetaaga kabiri kunaaba, okutoolaku ebigere byonka era imwe mutukula, waire ti mwenamwena.”

¹¹ Yesu yali amaze okumanha aja okumulyamu olukwe, kyeyava n'akoba ati: “Imwe mutukula, waire ti mwenamwena.”

¹² Kale bwe yamala okubanaaza ebigere yaatoola ebivaalo bye era yaira ku kiiwulo. Yaababuuza ati: “Kye mbakoze mukitegeera?

¹³ Mundheta Omwegeresa era Musengwa, era muli batuufu okundheta mutyo kuba era ekyo kye ndi.

¹⁴ Kale oba nga nze Musengwa era Omwegeresa waimwe mbanaaziiza ebigere, mwena muli n'okunaazaganianga ebigere.

¹⁵ Kuba mbaghaire eky'okuboneraku, mwena mughange okukola nga nze bwe mbakoze.

¹⁶ Bwenebwene ka mbakobere: omwiru tasinga Musengwa we, era omutume tasinga oyo amutuma.

¹⁷ Bino bwe muba mubiidhi, muli ba nkabi bwe mubikola.

¹⁸ “Aye tiri kwogera ku imwe mwenamwena, ndidhi abo be nalonda. Aye Ebyaghandiikibwa biri n'okutuukirira, ebikoba biti, ‘Omuntu mwene alya ku mugaati gwange n'anfuukiire omuzigu.’

¹⁹ Ndi kubakobera bino mperaano nga bikaali kubaagho, lwe biribaagho mukakase muti ninze Oyo.

²⁰ Bwenebwene ka mbakobere: oyo yeenayeena asangaalira ye mba nga ntumye, aba asangaaliire nze. Ate oyo ansangaalira, aba asangaaliire oyo eyantuma.”

Yesu ayogera ku kuliibwamu olukwe

²¹ Yesu bwe yamala okwogera ebyo yaawulira obweraliikirivu mu mwoyo. Agho yaakakasa ati: “Bwenebwene ka mbakobere: ku imwe ghaligho anandyamu olukwe.”

²² Abeegeresebwa be baalingaganaku, nga beewuunhia naani ye yali ali kwogeraku.

²³ Omwegeresebwa oyo Yesu ye yagonzanga einho yali atyaime kumpi naye.

²⁴ Simoni Petero yaamusunaku, yaamukoba ati: “Mubuuze, naani y'ali kukoba.”

²⁵ Kale, oyo yaaseeta kumpi ni Yesu yaamubuuza ati: “Musengwa, naani?”

²⁶ Yesu yaamwiramu ati: “N'oyo ye nja okukoleza ekitole kino nkimughe.” Kale bwe yamala okukoza ekitole yaakigha Yuda mutabane wa Simoni Isikarioti.

²⁷ Yuda bwe yamala ati okufuna ekitole ekyo, Sitaani yamungiramu. Yesu yaamukoba ati: “Ky'oja okukola kikole mangu!”

²⁸ Ku baali ku kiiwulo ghazira yamanha lwaki Yesu yamukoba atyo.

²⁹ Abandi baali badhuuba bati engeri Yuda ye yali omugemi w'endyanga, Yesu yali ali kumukoba kuja kugula bye beetaaga ku kibinuko, oba kubaaku ni ky'agha abaavu.

³⁰ Kale Yuda bwe yamala okufuna ekitole ekyo yaafuluma ku luya mangu. Bwali bwire.

Ekiragiro ekiyaaka

³¹ Yuda bwe yamala okufuluma, Yesu yaakoba ati: “Mperaano Omwana w'Omuntu agheereibwa ekitiisa era mu oyo Katonda agheereibwa ekitiisa.

³² Oba nga ekitiisa kya Katonda kyeyolekeire mu oyo, Katonda aidha kwolesa ekitiisa ky'oyo mu mwene, aghazira kulwa.

³³ Baana bange, nkaali n'imwe akaseera katono. Mulindhagala, aye nga bwe nakoba Abayudaaya mwena bwe mbakoba buti, ‘Ye nja timughanga kwidhayo.’

³⁴ Mbagha ekiragiro ekiyaaka: Mugonzanienga. Nga nze bwe nabagonza, mwena mugonzanienga mutyo.

³⁵ Kiisi muntu bw'agonzanga mwine, ku ekyo abantu boonaboona kwe balimanhira nga muli beegeresebwa bange.”

Yesu ayogera ku kya Petero okumwegaana

³⁶ Simoni Petero yaamubuuza ati: “Musengwa olaga gha?” Yesu yaamwiramu ati: “Mperaano toghanga kuunonereza ye ndaga, aye oidha kuunonereza ye bwidha.”

³⁷ Petero yaamukoba ati: “Musengwa lwaki tighanga kukunonereza mperaano? Ndidha kughaayo obulamu bwange ku lulwo!”

³⁸ Yesu yaamwiramu ati: “Onaaghaayo obulamu bwo ku lwange? Bwenebwene ka nkukobere: enkoko teidha kukolyoka ng'okaali kuneegaana emikuzi esatu.”