Yoanne 12 - Baibuli Ekibono kya Katonda 2014

Yesu bamusiiga omuzigo e Bethania

¹ Kale ng'ekaabulayo enaku mukaaga okutuuka ku Kibinuko eky'Okubitizibwa, Yesu yaaja e Bethania, eyabanga Lazaro ye yazuukiza.

² Eyo baamufumbirayo ekyeigulo era Maritha yaagheereza. Lazaro yaba mulala ku abo abaalya ni Yesu.

³ Maria yaatoola akadoome ak'omuzigo ogw'omughendo ogw'ekika kya narudo yaagusiiga ku bigere bya Yesu, era bwe yamala yaabisiimuuza enviiri dhe. Enhumba yaidhula akawoowo.

⁴ Agho Yuda Isikarioti owundi ku Beegeresebwa ba Yesu, eyali aja okumulyamu olukwe yaakoba ati:

⁵ “Lwaki omuzigo guno tigutundiibwamu dinari ebikumi bisatu (300) ni dhigheebwa baavu.”

⁶ Aye yakoba atyo, ti kuba nga yali afaayo inho ku baavu, aye lwa kuba yali mwibi. Ate era ng'omukuumi w'endyanga, yatwalanga empiiya edhaateebwangamu.

⁷ Aye Yesu yaakoba ati: “Omukazi mumuleke omuzigo agutereke okutuuka ku lunaku olw'okuziikibwa kwange.

⁸ Abaavu muba nabo buliidho, aye nze ti muba ninze buliidho.”

Olukwe olw'okwita Lazaro

⁹ Abayudaaya kamaala baawulira bati Yesu ali Bethania. Baaja nga tibali kuja kubona Yesu yenka, aye n'okubona Lazaro Yesu ye yazuukiza mu bafu.

¹⁰ Olwo Bakabona Abakulu baasala olukwe okwita ni Lazaro.

¹¹ Kuba olw'okuba oyo Abayudaaya kamaala baali bali kubavaaku baikiriza Yesu.

Yesu aingira mu Yerusalemu

¹² Ku lunaku olwairirira abantu kamaala abaali baidhie ku kibinuko baawulira nga Yesu ali kwidha mu Yerusalemu.

¹³ Baagema ensaga edh'emiti eminaazi baaja okumusangaaza, era baaleekaana bati: “Hosanna, wa nkabi oyo aidha mu liina lya Musengwa! Era wa nkabi Kyabazinga wa Isiraeli.”

¹⁴ Yesu yaafunayo endogoyi ento yaagityamaku nga bwe kyaghandiikibwa kiti:

¹⁵ “Imwe abantu b'e Sioni, mutatya! Mubone, Kyabazinga waimwe ali kwidha ng'atyaime ku ndogoyi ento.”

¹⁶ Ebyo Abeegeresebwa tibaabimanhiragho okutuusa nga Yesu amaze okutuuka mu kitiisa kya Ise, memale agho baidhukira ng'Ebyaghandiikibwa byamwogeraku bityo, era ng'ebyo baabimukolera.

¹⁷ Abantu abaaba ni Yesu bwe yayeta Lazaro okuva mu magombe n'amuzuukiza baakakasa ebyaligho.

¹⁸ Kale eikuukuubira ery'abantu lyaidha okumusangaaza, kuba baawulira nga yakola akamanhiso ako.

¹⁹ Agho Abafarisaayo baakoba bati: “Mubone, titukaasobola kuba ensi yoonayoona eri kuja y'ali!”

Abagureki baagala Yesu

²⁰ Mperaano, ghaaligho abandi ku Bagureki abaaja ku kibinuko okusinza.

²¹ Kale abo baaja ye Filipo ow'e Bethisaida mu Galilaaya baamukoba bati: “Isebo, twenda kubona Yesu.”

²² Filipo yaaja yaakobera Anderea era bombi baaja baakobera Yesu.

²³ Yesu yaabakoba ati: “Ekiseera kituuse Omwana w'Omuntu agheebwe ekitiisa.

²⁴ Bwenebwene, ka mbakobere: emuuma y'engaano bw'etagwa mu itaka n'efa esigala bedengedenge, aye bw'efa ereeta ebibala kamaala.

²⁵ Oyo yeenayeena agonza obulamu bwe abufiirwa. Aye oyo akyagha obulamu bwe mu nsi muno abusigaza okutuuka mu bulamu obutawaagho.

²⁶ Kiisi ayenda okumpeereza annonerezenga. Ghe mba n'omugheereza wange gh'anaabanga. Era Lata alita oyo yeenayeena ampeereza mu kifo eky'ekitiisa.

Yesu ayogera ku kufa kwe

²⁷ “Omwoyo gwange mweraliikirivu. Aye ate nkobe ntya? Nkobe nti: Lata mponia ekiseera kino? Aye ekyandeeta n'ekiseera kino okuntuukaku.

²⁸ Lata, ta ekitiisa mu liina lyo!” Agho eiroboozi lyava mu igulu lyakoba liti: “Nalitaamu ekitiisa era kabiri ndidha kulitaamu.”

²⁹ Eikuukuubira ery'abaali beemereire agho bwe lyawulira lyakoba liti: “Lukuba n'oluli kutyabuka.” Abandi baakoba bati: “Malaika n'ayogeire naye.”

³⁰ Yesu yaabakoba ati: “Eiroboozi eryo liidhie ku lwaimwe aye ti ku lwange.

³¹ Kino n'ekiseera okusalira ensi omusango, mperaano abaire afuga ensi eno aja kubingibwa.

³² Bwe ndighanikibwa okuva ku nsi abantu boonaboona ndibaseesa ye ndi.”

³³ Yayogera ebyo ng'ayoleka ensambo ye yali aja okufaamu.

³⁴ Eikuukuubira lyamukoba liti: “Amateeka gatukoba gati Kurisito aja kuba mulamu ebyanda n'ebyanda. Aye iwe otukoba otya oti Omwana w'Omuntu ali n'okughanikibwa? Omwana w'Omuntu ono naani?”

³⁵ Yesu yaabairamu ati: “Ekimuliikirira kiriku mu imwe entangama. Mutambule nga mukaali n'ekimuliikirira, tomanha nzikiiza bw'ebaagaana. Kuba atambula mu nzikiiza tamanha y'aja.

³⁶ Mwikirize ekimuliikirira nga mukaali n'ekimuliikirira memale mufuuke abaana ab'ekimuliikirira.” Yesu bwe yamala okwogera ebyo yavaagho yaaja yaabeegisaaku.

Obutaikiriza obw'Abayudaaya

³⁷ Waire yali akoze obumanhiso kamaala nga babona, tibaamwikiriza.

³⁸ Isaia omulanzi kye yakoba kyatuukirira, bwe yakoba ati: “Musengwa, naani eyaikiriza obukwenda bwaife? Naani Musengwa ye yayoleka amaani ge?”

³⁹ Kale nga tibasobola kwikiriza, kuba era Isaia yakoba ati:

⁴⁰ “Katonda abatuluwaiza, era yaakalangusa emyoyo, balobe kubona na maiso gaibwe, waire kutegeera na myoyo gyaibwe. Ti kulwa nga bagaluka baira ye ndi naabawonia.”

⁴¹ Isaia yakoba ebyo lwa kuba yabona ekitiisa kye era yaamwogeraku.

⁴² Waire ng'abafuzi kamaala baikiriza Yesu, ekyo tibaakyatula olw'okutya Abafarisaayo okubabinga mu sinagoga

⁴³ kuba nga bagonza okusiimibwa abantu okusinga okusiimibwa Katonda.

Ebibono bya Yesu bisala omusango

⁴⁴ Yesu yaayogerera ghaigulu ati: “Oyo andhikiriza taikiriza nze, aye aikiriza n'oyo eyantuma,

⁴⁵ oyo ambona, abona oyo eyantuma.

⁴⁶ Nze naidha mu nsi ng'ekimuliikirira, kiisi andhikiriza alobe kusigala mu nzikiiza.

⁴⁷ Omuntu yeenayeena awulira ebibono byange n'atabigema tigumusalira, kuba nze tyaidha kusalira nsi musango aye naidha kugirokola.

⁴⁸ Oyo aloba nze era n'asambaadha ebibono byange, ali n'amusalira omusango. Ebibono bye ndhogera n'ebirimusalira omusango ku lunaku olw'ensembo.

⁴⁹ Kuba tyayogeranga ku bwange aye Lata eyantuma n'eyampa eby'okwogera n'eby'okukoba.

⁵⁰ Era ndidhi ng'ekiragiro kye kino kigha obulamu obutawaagho. Kale ni bye ndhogera mbyogera nga Lata bwe yankoba.”