Yoanne 11 - Baibuli Ekibono kya Katonda 2014

Okufa kwa Lazaro

¹ Ghaaligho omusaadha eyalwala nga bamweta Lazaro. Yali mu kibuga Bethania omwabanga Maria ni muganda we Maritha.

² Maria ono n'eyasiiga ebigere bya Musengwa omuzigo ogwa kawoowo n'abisiimuuza enviiri dhe, era n'eyali mwanhina Lazaro eyali omulwaire.

³ Kale baanhina lazaro oyo baatuma ye Yesu nga bakoba bati: “Musengwa, mukagwa wo mulwaire.”

⁴ Yesu bwe yakiwulira yaakoba ati: “Obulwaire obwo tibwakumwita, aye bwidhie okuleetera Katonda ekitiisa, era n'Omwana wa Katonda yeena afune ekitiisa.”

⁵ Yesu yali mukagwa wa Maritha ni muganda we era ni Lazaro.

⁶ Bwe yawulira ati Lazaro mulwaire yaasigala mu kifo mwe yali enaku edhindi ibiri.

⁷ Ebyo bwe byawa, yaakoba Abeegeresebwa be ati: “Kabiri tuje mu Buyudaaya.”

⁸ Abeegeresebwa baamukoba bati: “Mwegeresa, Abayudaaya baali benda kukukuba mabaale era y'oli kwenda okuja kabiri?”

⁹ Yesu yaabakoba ati: “Olunaku tirubaamu saawa ikumi na ibiri? Omuntu bw'atambula omusana taja nga yeewumya, kuba abona ekimuliikirira eky'ensi eno.

¹⁰ Aye bw'atambula obwire aja nga yeewumya kuba azira kimumuliikirira.”

¹¹ Yesu bwe yamala okwogera ebyo yaakoba ati: “Mukagwa waife Lazaro atendwike, aye ndi kuja kumuzuusa.”

¹² Abeegeresebwa be baamwiramu bati: “Musengwa oba atendwike, aidha kuwona.”

¹³ Yesu yayogera ku kufa kwa Lazaro, aye baadhuuba bati ategeeza kutenduka ndoolo.

¹⁴ Agho Yesu yaakibakobera busimbalaala ati: “Lazaro afiire.

¹⁵ Aye ku lwaimwe nsangaire okuba nti tyaliyo, kibasobozese okwikiriza. Aye mukole tuje y'ali.”

¹⁶ Agho Thomasi ayetebwa omulongo n'okukoba Abeegeresebwa baine ati: “Mukole tuje ni Musengwa tufiire ghalala naye!”

Yesu n'okuzuukira era n'obulamu

¹⁷ Yesu bwe yatuuka yayagaana nga Lazaro yaakamala enaku ina mu magombe.

¹⁸ Bethania kyali kilomita nga isatu okuva e Yerusalemu.

¹⁹ Era Abayudaaya kamaala baali baidhie okubona Maritha ni Maria n'okubasaasira olw'okufiirwa mwanhinaibwe.

²⁰ Maritha bwe yawulira ati Yesu ali kwidha, yaaja okumusangaaza aye Maria yaasigala mu ndhu ng'atyaime.

²¹ Maritha yaakoba Yesu ati: “Musengwa nguli wali ghano mwanhinaze tiyandifiire!

²² Aye ni mperaano ndidhi nti Katonda aidha kwikiriza kyonakyona ky'onaamusaba.”

²³ Yesu yaamukoba ati: “Mwanhoko wa kuzuukira.”

²⁴ Maritha yaamwiramu ati: “Ndidhi nti wa kuzuukira ku lunaku lule olusembayo.”

²⁵ Yesu yaamukoba ati: “Ninze okuzuukira era ninze obulamu. Kiisi aikiriza nze ni bw'afa, aba mulamu

²⁶ era kiisi mulamu andhikiriza taja kufa. Bino obiikiriza?”

²⁷ Yairamu ati: “Yii, Musengwa ndhikiriza nga niiwe Kurisito, Omwana wa Katonda, ow'okwidha mu nsi.”

Yesu alira

²⁸ Maritha bwe yamala okwogera ebyo yaaja yaayeta muganda we kawola ati: “Musengwa atuuse era ali kukweta.”

²⁹ Maria bwe yawulira ekyo yaasituka mangu yaaja y'ali.

³⁰ Yesu yali akaali kwingira mu kibuga, ng'akaali mu kifo Maritha ghe yamwagaana.

³¹ Abantu abaali ni Maria mu ndhu nga baidhie okumusaasira baamunonereza, bwe baabona ng'asitukiramu nga badhuuba bati yali ali kuja ku magombe kugegengera eyo.

³² Maria yaatuuka Yesu ghe yali era olwamubona ati yaakuba amakiryaivu gha bigere bye yaamukoba ati: “Musengwa, nguli wali ghano mwanhinaze tiyandifiire!”

³³ Yesu yaamubona ng'ali kugegenga, n'abantu abaali bamunonereza boona nga bali kugegenga yaawulira enaku ku mwoyo era yeinhamira.

³⁴ Yaababuuza ati: “Mwamuziika gha?” Baamukoba bati: “Musengwa, idha obone.”

³⁵ Yesu yaalira.

³⁶ Abantu baakoba bati: “Mubone bw'abaire amugonza!”

³⁷ Aye abandi baakoba bati: “Ono eyazibula omutulu yali taghanga kulobera musaadha ono kufa?”

Lazaro azuukizibwa

³⁸ Kabiri Yesu ng'aidhwire okweinhamira yaaja y'amagombe. Gaakolebwa mu ngeri ya mpuku nga ku mulyango gwayo ghaligho eibaale.

³⁹ Yesu yaabakoba ati: “Mutoolegho eibaale!” Maritha mwanhina omufu yairamu ati: “Musengwa, ekiwunha kiidha kuba kinene kuba yaakaba mu magombe enaku ina!”

⁴⁰ Yesu yaamukoba ati: “Tyakukobeire nti wandiboine ekitiisa kya Katonda nguli oikiriza?”

⁴¹ Baatoolagho eibaale. Yesu yaalinga ghaigulu yaakoba ati: “Nsiimye inho Lata kuba ompuliire.

⁴² Ndidhi nti buliidho ompulira aye ekyo nkikobye lwa bantu abali ghano baikirize nga niiwe wantuma.”

⁴³ Bwe yamala okukoba ebyo yaayetera ghaigulu ati: “Lazaro, fuluma!”

⁴⁴ Yaafuluma ng'emikono gye n'ebigere bizingirire mu ngoye dhe baamuziikamu, n'ekighero mu maiso. Yesu yaabakoba ati: “Mumusibule.”

Olukwe olw'okwita Yesu

⁴⁵ Bangi ku Bayudaaya abaali baidhie ewa Maria, bwe baabona Yesu bye yakola baamwikiriza.

⁴⁶ Aye abandi baaja y'Abafarisaayo baabakobera ebyo Yesu bye yakola.

⁴⁷ Agho Bakabona Abakulu n'Abafarisaayo, beesoloza mu lwekobaano era beebuuzagania bati: “Tukole tutya? Kuba omusaadha ono ali kukola ebyewuunhio kamaala.

⁴⁸ Bwe tumuleka tutyo abantu boonaboona baidha kumwikiriza, era Abaroma baliidha baazikiriza ekifo kyaife ekitukuvu n'eighanga lyaife.”

⁴⁹ Aye mulala ku abo, nga bamweta Kayafa, eyali Omukulu wa Bakabona mu mwaka ogwo, yaabakoba ati: “Ghazira kye mwidhi.

⁵⁰ Timubona ng'ekisinga n'omuntu omulala okufiiririra abantu, mu kifo ky'eighanga lyonalyona okuzikirizibwa?”

⁵¹ Aye yali tali kukoba kino ku bubwe, aye okuva bwe yali nga n'Omukulu wa Bakabona mu mwaka ogwo, yali ali kulanga nga Yesu bwe yali aja okufiiririra eighanga eryo.

⁵² Ate nga tiikufiiririra ighanga kyonka aye n'okusoloza aghalala abantu ba Katonda abaali beeswireswire.

⁵³ Okuva ni ku olwo baatanula lukwe lwa kumwita.

⁵⁴ Kale ni Yesu yaalekera okweyaliza mu Bayudaaya, aye yaava agho yaaja mu kiketezo ekiri okumpi n'eirungu mu kibuga ekyetebwa Efuraimu, yaaba eyo n'Abeegeresebwa be.

⁵⁵ Mperaano Ekibinuko eky'Okubitizibwa eky'Abayudaaya kyali kiri kumpi okutuuka. Abantu kamaala baava mu byalo baaja e Yerusalemu okwetukuza ng'Ekibinuko ekyo kikaali kutuuka.

⁵⁶ Kale baayagala Yesu, era beebuuzagania beene na beene nga beemereire agho mu isinzizo bati: “Mudhuuba mutya? Anaidha ku kibinuko?”

⁵⁷ Mperaano, Bakabona Abakulu n'Abafarisaayo, baali bamaze okugha ebiragiro bati, bweghabaagho omuntu yeenayeena amanha Yesu gh'ali, aja yaabamanhisa, baaja baamugema.