Yoanne 1 - Baibuli Ekibono kya Katonda 2014

Kibono yafuuka omuntu

¹ Mu kwinhama kwa byonabyona Kibono yali ng'aligho era Kibono ng'aba ghalala ni Katonda era Kibono nga ni Katonda.

² Okuviira irala ku ntoolo Kibono yali ng'aba ghalala ni Katonda.

³ Ebintu byonabyona byatondebwa nga bibita mu oyo era ghazira kintu kyonakyona ekyatondebwa aghazira oyo.

⁴ Mu oyo nga n'omuli obulamu era obulamu obwo bwaba ekimuliikirira eky'abantu.

⁵ Ekimuliikirira ekyo kimulika mu nzikiiza, era enzikiiza tekisobola.]

⁶ Ghaaligho omuntu Katonda ye yatuma, ng'ayetebwa Yoanne.

⁷ Oyo yaidha okukakasa ati ole n'ekimuliikirira, abantu boonaboona baghange okwikiriza.

⁸ Yoanne oyo ti n'eyali ekimuliikirira ekyo, aye yaidha okukakasa ebigema ku kimuliikirira. [

⁹ Nga kino n'ekimuliikirira kyenekyene, ekyali nga kiri kwidha mu nsi okumuliikirira abantu boonaboona.

¹⁰ Kibono yali mu nsi. Era ensi yabita mu oyo okukolebwa, aye ensi tiyamumanha.

¹¹ Yaidha mu babe, aye abantu be beene baaloba okumusangaalira.

¹² Aye abo abaamusangaalira era abaamwikiriza yabagha obukumu okufuuka abaana ba Katonda.

¹³ Baafuuka abaana ba Katonda mu nsambo etali yabuliidho abantu ye bazaalibwamu ey'omubiri. Katonda mwene n'eyabafuula abaana be.

¹⁴ Kibono yaafuuka omuntu yaaba mu ife ng'aidhwire ekisa n'amazima. Twabona ekitiisa kye, ekitiisa ng'eky'Omwana wa Lata omulala bedengedenge.

¹⁵ Ono Yoanne y'ayogeraku, bw'alanga ati: “Ono ni ye nabakoberangaku bwe nabakoba nti, ‘Anandhiririra ansingira irala obuyinza kuba yabaagho nga nze nkaali na kuzaalibwa.’”]

¹⁶ Olw'ekisa kye ekitawa, twenatwena atugha emikisa gye emikuzi kamaala.

¹⁷ Kuba, nga Katonda bwe yateeka Amateeka ng'abita mu Musa, ekisa n'amazima abibisa mu Yesu Kurisito.

¹⁸ Ghazira eyaali aboine ku Katonda. Aye Omwana we omulala bedengedenge aba aghalala n'Ise, n'amwoleka abantu ni bamumanha.

Okukakasa kwa Yoanne omubatiza

¹⁹ Yoanne ati bwe yakakasa Abayudaaya, bwe baatuma Bakabona n'Abalevi okuva e Yerusalemu okumubuuza bati: “Niiwe ani?”

²⁰ Yoanne tiyakibagisa, aye yakyogera nga talumamu ati: “Ti ninze Kurisito.”

²¹ Baamubuuza bati: “Memale oli ani? Niiwe Eliya?” Yairamu ati: “Busa, ti ninze.” Baayongera okumubuuza bati: “Niiwe Omulanzi ole?” Yairamu ati: “Busa.”

²² Agho baamukoba bati: “Niini tukobere, niiwe ani? Kuba abatutumye tunaabakoba tutya? Weeyogeraku ki?”

²³ Yaakozesa ebibono bya Isaia Omulanzi, yaakoba ati: “Ninze eiroboozi ly'oyo alangiriza mu irungu ati, ‘Mutereeze engira ya Musengwa.’ ”

²⁴ Abakwenda bano, baali Bafarisaayo.

²⁵ Agho ni baamukoba bati: “Oba nga ti niiwe Kurisito, oba Eliya, oba Omulanzi ole, memale lwaki obatiza?”

²⁶ Yoanne yaabairamu ati: “Nze mbabatiza n'amaadhi aye mu imwe mulimu oyo ye mutaidhi,

²⁷ anandhiririra era tisaanira naire okusibulula obukoba obw'engaito dhe.”

²⁸ Bino byali Bethania, ng'osomoike omwiga Yorudani, Yoanne ye yali abatiriza.

Entaama Ento eya Katonda

²⁹ Ku lunaku olwairirira, Yoanne yaabona Yesu ng'aidha y'ali yaakoba ati: “Mubone Entaama Ento eya Katonda etoolagho ebibi eby'ensi!

³⁰ Ono ni ye nabakoberanga, bwe nakoba nti, ‘Ghaligho omuntu ali kwidha oluvainhuma lwange ansingira aghala obukologho, kuba yabaagho ira nga nze nkaali kubaagho.’

³¹ Zeena nali timwidhi aye ekyandeeta n'okubatizanga n'amaadhi memale ayolekebwe eri Isiraeli.”

³² Agho Yoanne yaakakasa ati: “Nabona Mwoyo ng'amwikaku ng'oti njiibwa okuva mu igulu era yaamusigalaku.

³³ Era nali tiidhi nti n'oyo, aye oyo eyantuma okubatiza n'amaadhi yankoba ati, ‘Y'onaabona nga Mwoyo amwikaku era ng'amusigalaku, anaaba nga n'oyo abatiza ni Mwoyo Mutukuvu.’

³⁴ Ebyo nabibona era nkakasa nti oyo n'Omwana wa Katonda.”

Abeegeresebwa ba Yesu abaasooka

³⁵ Ku lunaku olwairirira Yoanne yali ayemereire agho n'abeegeresebwa be babiri, kabiri

³⁶ yaabona Yesu ng'atambula. Yaakoba ati: “Mubone Entaama Ento eya Katonda!”

³⁷ Abeegeresebwa be abo ababiri baawulira ekyo baanonereza Yesu.

³⁸ Yesu yaakyuka yaababona nga bali kumunonereza yaababuuza ati: “Muli kwagala ki?” Baamwiramu bati: “Rabbi”, amakulu gaakyo nti Mwegeresa, “otenduka gha?”

³⁹ Yaabakoba ati: “Mwidhe mubone.” Agho dhaali saawa ikumi edh'omusana, kale baaja baabona gh'atenduka era baaba agho naye olunaku olwo.

⁴⁰ Owundi ku babiri abo abaawulira nga Yoanne ayogera, era ni banonereza Yesu, yali nga ni Anderea muganda wa Simoni Petero.

⁴¹ Ono yasooka kubona muganda we Simoni era yaamukoba ati: “Tuboine Messia,” amakulu gaakyo nti Kurisito.

⁴² Yaatwala Simoni eri Yesu. Yesu bwe yamubona yaamukoba ati: “Niiwe Simoni mutabane wa Yoanne? Oidha kwetebwanga Kefasi,” amakulu gaakyo nti Petero n'olubaale.

Okwetebwa kwa Filipo ni Nathanaeli

⁴³ Ku lunaku olwairirira Yesu yaasalagho okuja e Galilaaya. Yaayagaana Filipo yaamukoba ati: “Nnonereza.”

⁴⁴ Filipo yali ava mu Bethisaida, ekibuga Anderea ni Petero mwe baali baba.

⁴⁵ Filipo yaayagaana Nathanaeli yaamukoba ati: “Tuboine oyo Musa ye yaghandiikaku mu kitabo ky'Amateeka, era n'abalanzi ye baaghandiikaku, Yesu ow'e Nazarethi, mutabane wa Yosefu.”

⁴⁶ Nathanaeli yaamukoba ati: “Ghaligho ekirungi ekighanga okuva e Nazarethi?” Filipo yaamukoba ati: “Idha obone.”

⁴⁷ Yesu bwe yabona Nathanaeli ng'ali kwidha y'ali, yaamwogeraku ati: “Mubone Omuisiraeli keenekeene aziramu kwesubaayiriza kwonakwona.”

⁴⁸ Nathanaeli yaamubuuza ati: “Waamanhira gha?” Yesu yaamwiramu ati: “Nkuboine ng'oli mu muti omutiini memale Filipo akwete.”

⁴⁹ Nathanaeli yairamu ati: “Mwegeresa, niiwe Omwana wa Katonda! Niiwe Kyabazinga wa Isiraeli!”

⁵⁰ Yesu yaamukoba ati: “Olw'okuba nkukobeire nti nkuboine mu muti omutiini n'okwikiriza? Oidha kubona n'ebisinga kino.”

⁵¹ Era yaabakoba ati: “Bwenebwene ka mbakobere, mulibona eigulu nga libwikwike era nga bamalaika ba Katonda abandi baniina, era ng'abandi baika ku Mwana w'Omuntu.”