Yeremia 9 - Baibuli Ekibono kya Katonda 2014

¹ Nguli omutwe gwange gwali n'amaadhi mangi ng'oti kidiba, n'amaiso gange ni gaba n'amaziga mangi ng'oti maadhi agakuuluula okuva mu nhindo dh'ensulo, nandirizenga amaziga omusana n'obwire olw'abantu bange abaitibwa.

² Nguli ndi n'ekifo mu irungu mwe nsobola okuba, nandiviire mu bantu bange naaja naaba eyo; kuba boonaboona ti beesigwa naire, baafuuka kikuukuulu kya bantu ba nkwe.

³ Olulimi lwe bakozesa ti lutereevu naire, lwidhwire buguya bwereere. Ensi yaibwe mu kifo ky'okubaamu amazima, eidhwire bukupankupania. Musengwa Katonda akoba ati: “Abantu bange beeyongera bwa kukola bibi, era nze tibandidhi naire.”

⁴ Kale ni omuntu yeekuumenga mwine, era alobenga kwesiga muganda we; kuba muganda wo akwefuulaku, ate era buli muntu ayogera ku baine ebibi.

⁵ Buli muntu aguya mwine, ezira ayogera bya mazima. Baanalirira kwogera bya buguya byereere, era tibalekera kwonoona ni beenenia.

⁶ Baja bwa mu maiso na kukiriga bandi, na kwogera bya buguya. era baaloba okuumanha. Musengwa Katonda atyo bw'akoba.

⁷ Kale ni Musengwa Katonda oyo Afuga Amagye akoba ati: “Bona eno, ndidha kubasaanuusa ng'omuntu bw'asaanuusa ekyuma, era mbeekebeedhe; kuba nzira kindi kya kukolera bantu bange abo.

⁸ Ebibono bye boogera biri ng'oti kalaso namuzisa, era bya buguya bwereere. Buli muntu alamusa mwine ng'amwendeza emiraala, aye nga mule ali kutegeka kumweteega.

⁹ Nze Musengwa Katonda nkoba nti, nsobola ntya obutabonereza bantu abo olw'okukola ebintu ebyo? Era nsobola ntya obuteesasuuliza ku ighanga eryo?”

¹⁰ Nze Yeremia naakoba nti: “Ndidha kulira amaziga nga ndirira ensozi, era mpowoole olw'ebyayiro ensolo mwe dhiriira; kuba bikaze era biziramu muntu abibitamu naire. Tokaawulira nte nga dhimooleramu. Enhonhi n'ensolo edh'omu nsiko dhaalumukamu dhaaja.”

¹¹ Musengwa Katonda yankoba ati: “Ndidha kufuula ekibuga Yerusalemu kibe mmungo dha bifunfugu, era kibe ekifo omusula ebibe. Ebibuga by'omu Buyudaaya byonabyona bija kusigala bifulukwa byereere, ghabulegho omuntu abibaamu.”

¹² Nze naabuuza Musengwa Katonda nti: “Wo Musengwa Katonda, lwaki ensi eyonooneike n'eba nkalu ng'oti irungu, era ni ghabula omuntu agibitamu? Naani omugezi asobola okutegeera kino? Naani ye wakiinhonhola asobola okukobera abandi?”

¹³ Musengwa Katonda yairamu ati: “Ekyo kiri kityo, lwa kuba abantu baava ku mateeka gange ge nabateeragho. Baaloba okungondera waire okukola bye nabakoba.

¹⁴ Aye baakola bw'ebyo emyoyo gyaibwe emikalangufu bye gyenda, nga bajiira ku musambwa Baali nga badhaadha baibwe bwebaabeegeresa.

¹⁵ N'olw'ekyo, nze Musengwa Katonda Afuga Amagye, Katonda wa Isiraeli, kyenva ni nkoba nti: Bona eno, ndidha kubagha olubiriizi balulye lubakaayire, mbaghe n'amaadhi agalimu eirogo baganhwe.

¹⁶ Ndidha kubasansaaniza mu maghanga, beene ni badhaadha baibwe, ge batawulirangaku naire. Era ndidha kubasindikaku amagye gabalumbe, okutuusa lwe ndibazikiriza okubamalagho.”

Ab'e Yerusalemu balirira Musengwa Katonda ababeere

¹⁷ Musengwa Katonda Afuga Amagye akoba ati: “Mudhuubirize ku bibairegho! Mwetese abakazi abalira baidhe, abo abaidhi okugegenga obukalamu.”

¹⁸ Abantu baakoba bati: “Mubakobe bangughe batuliriseeku, amaziga gamagale okutuva mu maiso, n'ebigoghe byaife bibole bubole.”

¹⁹ Wulira amaliro agali kuva mu Sioni nga gakoba gati: “Tuzikiriire! Era tuswaire inho; kuba bakonseegho endhu dhaife, twava mu nsi yaife.”

²⁰ Nze naakoba nti: “Bakazi imwe, muwulire ebibono bya Musengwa Katonda, era mwetegereze by'akoba. Mwegerese baghala baimwe okulira amaziga, era buli muntu ayegerese mwine okugegenga;

²¹ kuba okufa kutwidhiire, kwabitira mu madinisa gaife, kwaingira mu ndhu dhaife, kwaita abaana mu nguudo n'abaisuka mu mpya edh'ebibuga.

²² Emirambo gy'abantu gija kusigala bw'agho gityo, ng'oti mmungo dha busa mu nimiro, era ng'oti binhwa bya ngaano bye bakesiisa ni baleka obwagho, ni ghabulagho omuntu abitoolagho.”

²³ Musengwa Katonda akoba ati: “Abagezi balobe kwesuuta lwa magezi gaibwe, n'ab'amaani bateesuuta lwa maani gaibwe, waire abakombe okwesuuta olw'obukombe bwaibwe.

²⁴ “Aye buli yeesuuta, yeesuutenga lwa kuba nti: antegeera era andidhi nga ninze Musengwa Katonda agonza abantu obutalekera, era ni nkola amazima n'ebituufu. Ebintu ebyo n'ebinsanhusa. Nze Musengwa Katonda, ninze nkobye.”

²⁵ Musengwa Katonda akoba ati: “Bona eno, ekiseera kiidha kutuuka mbonereze abo abakekete aye abeebisa ng'oti ti bakekete.

²⁶ Abantu abo ni bano: Abamisiri, Abayudaaya, Abaedomu, Abammoni, Abamoabu, nabo boonaboona ababa mu irungu abasala ku nviiri dhaibwe. Kale ni waire ng'ab'eighanga lya Isiraeli lyonalyona bakekete, aye era beebisa ng'abatali bakekete.”