Yeremia 7 - Baibuli Ekibono kya Katonda 2014

Yeremia akobera abantu ekibono kya Katonda mu isinzizo

¹ Agho Musengwa Katonda yankoba nze Yeremia,

² nje nhemerere mu mulyango gw'eisinzizo, nangirire eri abantu ab'omu Buyudaaya boonaboona abangira okusinza Musengwa Katonda, nga mbakoba nti,

³ Musengwa Katonda Afuga Amagye, Katonda wa Isiraeli, akoba ati: “Mulongoose empisa dhaimwe n'ebikolwa byaimwe, olwo ndidha kubaleka mubenga mu kifo kino.

⁴ Mulobe kwesiga bino bye mwerimba nabyo nga mukoba muti, ‘Eisinzizo lya Musengwa Katonda lirigho, eisinzizo lya Musengwa Katonda lirigho, eisinzizo lya Musengwa Katonda lirigho.’

⁵ “Mulongoose empisa dhaimwe n'ebikolwa byaimwe. Mukolenga ebituufu mu nkolagana ni banaimwe.

⁶ Mutanhigirizanga basenze, oba bamulekwa, oba banamwandu, oba okwitanga abantu abaziraku musango mu ighanga lino. Era mutasinzanga bakatonda bandi ni mwereetera kwerumya imwe beene.

⁷ Olwo ndidha kubaleka mubenga mu nsi eno ye nagha eira badhaadha baimwe, ebe yaibwe byanda na byanda.

⁸ “Aye kale muja mwesigulira ku bibono eby'obuguya ebitayamba naire.

⁹ Mwiba, mwatemula, mwakola obwenzi, mwalayira eby'obuguya, mwaniokeza omusambwa Baali obubbaani, mwasinza ni bakatonda be mwali timwidhiiku naire.

¹⁰ Mpegaano mwidha mutya okwemerera mu maiso gange, mu isinzizo lino eryange lyene, mwakoba muti, ‘Tuli bukalamu’, nga kabiri mumala muja bwa mu maiso na kukola ebyenhinhalwa ebyo byonabyona?

¹¹ Obwo mulowooza muti eisinzizo lino eryange lyene lifuuse mpuku ya banhazi? Bona eno, nze mwene mboine bye muli kukola.

¹² Muje mu kifo kye nasooka okulonda okunsinzizangamu e Shilo, mubone kye nakikola olw'ebibi by'abantu bange Abaisiraeli.

¹³ Mukoze ebibi ebyo byonabyona emikuzi kamaala nga mbalabulanga aghazira kukoogha naire, aye mwaloba kuwulira, era naabeeta aye mwaloba kuvugira.

¹⁴ Kale ni kye nakola Shilo, kye ndidha okukola n'eisinzizo lino eryange lyene lye mwesiga. Ekifo kino kye nabagha imwe ni badhaadha baimwe, ndidha kukikola ekintu n'ekirala ng'oti ni kye nakola Shilo.

¹⁵ Era imwe ndidha kubabinga munve mu maiso, nga bwenabinga baganda baimwe abasimuka mu Efuraimu boonaboona. Nze Musengwa Katonda, ninze nkobye.”

Obudheemu obw'abantu

¹⁶ Musengwa Katonda yaakoba ati: “Iwe Yeremia, otadaaga kusabira bantu bano. Era otandirira ku lwaibwe waire okunsaba ng'obeewolereza, kuba tiidha kukuwulirisa.

¹⁷ Tobona bye bakola mu bibuga bya Buyudaaya ni mu nguudo dha Yerusalemu?

¹⁸ Abaana bagherera enku, baiseibwe baakuma omuliro, bainhaibwe baakanda engaano okufumba emigaati. Nga bafumbira omusambwa gwe beeta Kyabazinga Omukazi ow'Eigulu. Baafukira emisambwa egindi ebigheebwayo eby'okunhwa, bansoononkereza bandeetera okusungughala.

¹⁹ Aye nga bwene nze Musengwa Katonda, ninze ye bali kusoononkereza? Tibali kwesoononkereza beene na beene, ate bamale baswale n'okuswala?

²⁰ Kale ni bona eno, obusungu bwange n'ekiruyi kyange ndidha kubimalira ku kifo kino, ni ku bantu, ni ku nsolo, ni ku miti, ni ku birime, ng'oti n'omuliro omuntu gw'atasobola kuzikiza.”

²¹ Musengwa Katonda Afuga Amagye, Katonda wa Isiraeli, akoba ati: “Mutoole ebigheebwayo byaimwe ebyandibaire eby'okwokebwa biweekereregho, mubyongereze ku misengo gyaimwe egindi, byonabyona mubirye.

²² Bwe natoola badhaadha baimwe mu nsi Misiri, tyabagha biragiro bigema ku bigheebwayo byokebwa, na ku misengo.

²³ Aye nabalagira kino nti, ‘Mumpulirenga, olwo nze ndidha kubanga Katonda waimwe, imwe mube bantu bange. Mujiirenga ku mateeka ge mbagha, olwo byonabyona biidha kubajiiranga bukalamu.’

²⁴ Aye baaloba kumpulirisa waire okugondera bye ndagira. Baajiira ku ebyo emyoyo gyaibwe emikalangufu era emibi bye gyenda. Mu kifo ky'okuba abalungi, beeyongera bwa kuba babi inho.

²⁵ Okuva ku lunaku badhaadha baimwe lwe baava mu nsi Misiri okutuusa ni ye buli eno, mbaire nga ntumanga ye muli abagheereza bange abalanzi aghazira kukoogha naire.

²⁶ Aye mwaloba kumpulirisa waire okugondera bye ndagira, mweyongera bwa kukalangusa myoyo gyaimwe era mwebisa bubi inho mwasinga ni badhaadha baimwe.

²⁷ “‘Kale ni, iwe Yeremia, oidha kubakobera ebibono bino. Aye era tibaidha kukuwulirisa. Ni bw'onaabeeta, tibaidha kuvugira.

²⁸ Oidha kubakoba oti eighanga lyaibwe tirimpulira nze Musengwa Katonda waalyo era tiriganha kugalagirwa. Tirikaali na mazima, waire okugoogeraku obwogere.’”

Ebibi ebyakolebwa mu kiiko eky'e Hinnomu

²⁹ “Imwe abantu b'e Yerusalemu, musaleku enviiri dhaimwe mudhisuule ere; mulirire eyo ku nsozi edhiziraku kantu, kuba nze Musengwa Katonda nsungughaire era ndekuliire agho abantu bange.

³⁰ “Abantu b'omu Buyudaaya, bakoze ekibi ye ndi, nze Musengwa Katonda. Batoire emisambwa egyenhinhalwa, baagita mu isinzizo lyange, baalyonoona.

³¹ Era baaja baazimba ebifo ebigulumivu eby'okusinzizaamu e Tofethi, mu kyetebwa Ekiiko ekya mutabane wa Hinnomu, baayokeranga mu muliro batabane baibwe ni baghala baibwe. Ate nga nze tibalagirangaku kukola kintu ekyo, waire okukirowoozaaku obulowooze mu mwoyo gwange.

³² Kale ni bona, ekiseera kiri kwidha, ekifo ekyo kirekere okwetebwa Tofethi, oba ekiiko kya mutabane wa Hinnomu, aye kyetebwe Ekiiko eky'Okutirimbuliramu kuba balikiziikamu abantu kamaala abaliba nga bazira ghandi gha kubaziika.

³³ Emirambo gy'abantu giriba mere ya nhonhi, na ya nsolo dha mu nsiko, nga ghazira adhirobera naire.

³⁴ Mu bibuga bya Buyudaaya ni mu nguudo dha Yerusalemu, ndidha kulekeza emizira egy'abali mu binhumo ni mu kusagamba, ndekeze n'egy'abo abali mu mbaga edh'obugole kuba ensi eyo ya kufuuka bifulukwafulukwa omutaba bantu.”