Yeremia 52 - Baibuli Ekibono kya Katonda 2014

Yerusalemu kigwa

¹ Zedekia yali agheza emyaka abiri na mulala egy'obukulu ghe yafuukira kyabazinga wa Buyudaaya. Era yaafugira entangama ya myaka ikumi na mulala mu Yerusalemu. Inhina nga ni Hamutali, mughala wa Yeremia ow'e Libuna.

² Zedekia oyo yaakolanga ebibi eri Musengwa Katonda, ng'oti n'ebyo byonabyona Yehoiakimu bye yakola.

³ Musengwa Katonda yaasungughalira ab'omu Yerusalemu n'ab'omu Buyudaaya ebitaloodheka, yaababingagho mu maiso ge. Agho Zedekia yaadheemera kyabazinga Nebukadinezzari ow'e Babilonia.

⁴ Agho ku lunaku olweikumi, mu mwezi ogweikumi, mu mwaka ogwomwenda nga Zedekia n'afuga Buyudaaya, kyabazinga Nebukadinezzari owa Babilonia yaidha n'eigye lyonalyona okulumba ekibuga Yerusalemu. Baakizingiza era baakibungaku emungo y'eitaka ey'okuniiniraku, basobole okukirwanisa.

⁵ Kyasigala nga bakizingiiza batyo okutuusa mu mwaka ogweikumi n'omulala (11) nga Zedekia n'afuga Buyudaaya.

⁶ Ku lunaku olwomwenda mu mwezi ogwokuna, endhala yeekalangula okuluma abantu mu kibuga, nga tibakaali na kya kulya.

⁷ Agho baawomola ekituli mu kimante eky'oku kibuga, kyabazinga n'abaisirukale boonaboona baalumuka obwire, waire nga Abababilonia baali bazingiiza ekibuga ku ndhuyi dhoonadhoona. Baagema engira ebitira mu nimiro ya kyabazinga, baabita mu mulyango oguyimba ebimante ebibiri, baaja nga boolekeire ekiiko ekirimu omwiga Yorudani.

⁸ Aye ab'eigye ly'Abababilonia baabingirira kyabazinga Zedekia, baamutuukaku mu kiketezo eky'oku museetwe eky'e Yeriko, eigye lye lyonalyona lyasansaana lyamulekulira agho.

⁹ Agho Abababilonia baamugema baamutwala ye kyabazinga Nebukadinezzari ow'e Babilonia, ng'ali e Ribula mu kiketezo ky'e Hamathi, yaamusalira omusango gwamusinga.

¹⁰ Nebukadinezzari oyo yaitira eyo e Ribula batabane ba Zedekia, nga ni Zedekia mwene alingiriire. Era yaita n'abakungu ba Buyudaaya boonaboona.

¹¹ Ate yaatundulamu Zedekia amaiso, yaamusiba ku ndhegere, yaamutwala e Babilonia. Zedekia yaasigala mu Babilonia nga musibe okutuusa lwe yafa.

Eisinzizo balizikiriza

¹² Ku lunaku olweikumi mu mwezi ogwokutaanu, mu mwaka ogweikumi n'omwenda (19) nga kyabazinga Nebukadinezzari n'afuga Babilonia, omukungu akulira abakuumi ba kyabazinga w'e Babilonia ayetebwa Nebuzaradani, yaidha e Yerusalemu.

¹³ Yaayokya eisinzizo lya Musengwa Katonda, n'ekisaagaati kya kyabazinga, n'ebizimbe byonabyona ebikologho eby'omu Yerusalemu.

¹⁴ Era eigye ery'Abababilonia eryali naye, lyamenhagho ekimante ekyezungulwire Yerusalemu.

¹⁵ Agho Nebuzaradani oyo yaabatwala e Babilonia mu bunhage, abandi ku bantu abaali abaavu einho, nabo abaali basigaire mu kibuga, n'abo abaali beeghaireyo ni baira ku luuyi lwa kyabazinga w'e Babilonia, era n'abo abaali abakugu mu mirimo egy'endhawulo.

¹⁶ Aye yaaleka mu Buyudaaya abandi ku bantu abaavu einho abazira ke bali nako, balimenga era balabirirenga amasamba g'emizabbibu.

¹⁷ Abababilonia baamenhamenha empango edh'ekyuma eky'ekikomo edhaali mu isinzizo lya Musengwa Katonda, n'ebituuti ebiriku enkede eby'ekyuma eky'ekikomo, n'etanka enkologho nga yoona ya kyuma kya kikomo. Bwe baamala, baatoola ekyuma eky'ekikomo ekyava mu bintu ebyo, baakitwala e Babilonia.

¹⁸ Baatwala ensugha, n'ebitiiyo, ni makansu edhisala ebisiriiza ku ntambi dh'entaala, n'ebintu mwe baatanga obubbaani, n'ebintu ebindi byonabyona eby'ekyuma eky'ekikomo bye baakozesanga mu kugheereza mu isinzizo.

¹⁹ Nebuzaradani yaatwala kiisi kintu ekyakolebwa mu zaabu oba mu feeza, omwali ebintu eby'okutwalirangaku amanda agaliku omuliro, n'ebibya ebitono, n'ebibya ebibaamu omusaayi ogw'okumansira, n'obulobo obw'okusuulangamu eivu, n'ebikondo eby'entaala, n'ebintu ebiteebwamu obubbaani, n'ebintu ebikozesebwa mu kuwaayo ebigheebwayo ebifukibwa.

²⁰ Obungi bw'ekyuma eky'ekikomo kyabazinga Solomoni kye yakolamu empango eibri, n'etanka enkologho, n'ebifaananie eby'ente enume eikumi n'eibiri etanka eyo kw'etyama, byonabyona ebyo nga byali mu isinzizo, bwali buzito inho baaloba kusobola kubupima.

²¹ Empango endala ng'egheza mita munaana mu buleeyi, era yaagheza emita itaanu n'obutundu busatu mu kugyezunguluza. Obunene obw'omubiri gwayo nga bwaga ngalo ina, era ng'erimu empongolo munda.

²² Empango eyo ng'eriku n'omutwe ogw'ekyuma eky'ekikomo ogugheza emita eibiri n'obutundu obubiri mu buleeyi. Ku mutwe ogwo nga kuliku ebifaananie eby'endhegere edhirukiibwa ng'oti katimba n'ebifaananie eby'emikomamawanga, nga baabikola mu kyuma eky'ekikomo okugwezunguluza gwonagwona. N'empango eyokubiri yoona baali nga bagikoze mu nsambo n'endala eyo.

²³ Ku buli kifaananie eky'endhegere edhirukiibwa ng'oti katimba ekya ku buli mpango, nga kuliku ebifaananie eby'emikomamawanga kikumi, era ng'ekyenda n'omukaaga ku ebyo biri mu mbali omw'empango.

Abantu b'omu Buyudaaya babatwala e Babilonia

²⁴ Nebuzaradani omuduumizi w'abakuumi ba kyabazinga w'e Babilonia, era yaagema Seraia Kabona Omukulu, ni Zefania kabona amwiririra, n'abakuumi b'omulyango ogwingira mu isinzizo abasatu.

²⁵ Ni mu kibuga yaatoolamu omuduumizi w'eigye, n'abataanu ku bawi b'amagezi aba kyabazinga abaali bakaali mu kibuga, n'omughandiisi eyakuumanga enkalala edh'abaisirukale mu ighanga, n'abantu nkaaga abandi ku batyamye abaali bakaali mu kibuga.

²⁶ Nebuzaradani yaabatwala eri kyabazinga w'e Babilonia eyali e Ribula mu kiseera ekyo,

²⁷ mu kiketezo ky'e Hamathi. Kyabazinga oyo yaabakuba era yaabaitira eyo. Batyo Abayudaaya bwe baabatoola mu nsi yaibwe nga basibe, baabatwala mu bunhage.

²⁸ Bano n'abantu kyabazinga Nebukadinezzari be yatwala mu bunhage: Mu mwaka gwe ogwomusanvu nga ni kyabazinga, yatwala abantu enkumi isatu n'amakumi abiri na basatu (3,023).

²⁹ Mu mwaka gwe ogweikumi n'omunaana yaatwala abantu lunaana n'asatu na babiri (832) ng'abatoola mu Yerusalemu.

³⁰ Mu mwaka gwe ogwamakumi abiri n'esatu (23) yatwala abantu lusanvu n'ana na bataanu (745), abo nga Nebuzaradani omuduumizi w'abakuumi ba kyabazinga w'e Babilonia, n'eyabatwala. Okugaitamu baaba abantu enkumi ina na lukaaga (4,600) abaatwalibwa mu bunhage.

³¹ Agho kyabazinga Evilimerodaki ow'e Babilonia, yaagemerwa kyabazinga Yehoiakini ow'e Buyudaaya ekivunika mu mwaka gwene Evilimerodaki oyo gwe yafuukiramu kyabazinga. Yaamutoola mu ikomera ku lunaku olwamakumi abiri n'eitaanu (25), mu mwezi ogweikumi n'ebiri, mu mwaka ogwamakumi asatu n'omusanvu (37), okuva Yehoiakini oyo kyabazinga wa Buyudaaya lwe yasibwa.

³² Evilimerodaki oyo yaamubisa bukalamu, yaamuta mu kifo kya ghaigulu okusinga bakyabazinga abandi abaali naye mu bunhage e Babilonia.

³³ Yehoiakini baamuganha okutoolamu ebivaalo by'eikomera, era buli lunaku yaaliiranga ku kiiwulo kya kyabazinga.

³⁴ Kyabazinga yaalagira bamughenga omugabo ogwa buli lunaku, ekiseera kyonakyona kye yamala nga mulamu.