Yeremia 51 - Baibuli Ekibono kya Katonda 2014

Katonda ayongera okusalira ensi Babilonia omusango

¹ Musengwa Katonda akoba ati: “Ndisindika ku nsi Babilonia ni ku bantu baayo empewo ezikiriza.

² Ndisindika abagwira baazikiriza Babilonia ng'oti n'ole asensa ebikaba mu ngaano. Olunaku olw'okuzikiriza bwe lulituuka, baligirumba nga bava ku ndhuyi dhoonadhoona, baagimaliriramu ebintu byonabyona.

³ Ndibalagira nti, ‘Mutaganha baisirukale baayo kuvaala bivaalo byaibwe eby'omu kifuba eby'ekyuma, waire kulasa busaale bwaibwe. Muzikirize eigye lyayo lyonalyona! Mutalekaagho waire abo abaisirukale abakaali abaisuka.’

⁴ Kale balibafumita, bafiira mu nguudo edh'omu bibuga byaibwe

⁵ kuba nze Musengwa Katonda, Katonda Afuga Amagye, tirekuliire agho Baisiraeli na Bayudaaya, waire nga beene baiza omusango ye ndi, nze Omutukuvu wa Isiraeli.

⁶ “Imwe Abaisiraeli n'Abayudaaya, mulumuke muve mu nsi Babilonia muwonie obulamu bwaimwe! Mulobe kufiira bwereere olw'ebibi bya Babilonia, kuba kino n'ekiseera nze Musengwa Katonda neesasulize ku nsi eyo nga ngibonereza nga bw'egwaniire.

⁷ Ensi Babilonia yali ng'oti kikopo ekyakolebwa mu zaabu ekiri mu ngalo dhange, ekyatamiizanga ensi yoonayoona. Amaghanga gaanhwanga ku mwenge ogw'emizabbibu mu kikopo ekyo, gaagwa eiralu.

⁸ Aye buti egwire mangu inho yaazikirira! Mugiririre inho amaziga! Mugifunireyooku ku bulezi olw'obulumi bw'erimu, oba katyo enaawona.

⁹ Abagwira abaabanga mu Babilonia baakoba bati, ‘Twagezaaku okuyamba ensi Babilonia eno, aye nga tikikaasoboka naire. Kale ife ka tugiveemu twireyo ewaife ye twava, kuba Katonda abonereiza inho Babilonia eno, yaagisaanizaagho irala.’ ”

¹⁰ Musengwa Katonda akoba ati: “Imwe abantu bange, mukube emizira mukobe muti, ‘Musengwa Katonda ayoleike nga tuziraku musango. Mukole tuje tukobere abali mu Yerusalemu, Musengwa Katonda waife by'akoze.’ ”

¹¹ Musengwa Katonda asiikwire enzigu mu bakyabazinga ab'e Media, baidhe balumbe Babilonia, kuba ayenda kugizikiriza. Olwo agyesasulizeeku olw'okuzikiriza eisinzizo lye. Agho abaduumizi b'eigye einunuzi, baalagira bati: “Mughagale obusaale bwaimwe! Mugeme engabo dhaimwe!

¹² Mughanike ebendera muje mulumbe ekimante ekyezungulwire ekibuga Babiloni. Mwongere ku baisirukale abali kukikuuma babe bangi. Muteegho abakuuma omusana n'abakuuma obwire, era muteegho n'abeeteeze okuzinduukiriza abazigu.” Musengwa Katonda atuukiriiza ekyo kye yeesoomera okukola abantu b'omu Babilonia.

¹³ Iwe ensi erimu emiiga kamaala n'eby'obukombe ebingi, enkomerero yo etuuse, akawuuzi akagemereire obulamu bwo bakakutwire.

¹⁴ Musengwa Katonda Afuga Amagye yeerayiriire mwene ati alireeta abantu kamaala inho ng'oti kikuukuulu kya nzige, baalumba Babilonia. Era balyasiikana n'eisanhu nga baghangwire.

Olwembo olw'okusaaka Katonda

¹⁵ Musengwa Katonda n'eyakola ensi n'obuyinza bwe, yaataagho eby'oku nsi n'amagezi ge, era yaabambagho eigulu.

¹⁶ Bw'alagira, amaadhi ku igulu gadudumuka, era asitusa olufu ku ndhuyi dhoonadhoona edh'ensi. Aleetera olukuba okughemya ng'amaadhi gali kugwa, era yaatoolayo empewo mu materekero ge, yaagireeta.

¹⁷ Olwo abantu boonaboona baaba nga basirughaire era nga tibakaalimu kategeera. Buli mugheesi wa bintu bya zaabu yaaswala olw'ebifaananie ebisinzibwa by'agheesa; kuba bya buguya bwereere era biziramu bulamu naire.

¹⁸ Biziramu muganhulo era bya buguya bwereere. Ku lunaku Musengwa Katonda lw'alibisaliraku omusango okubisinga, bija kuzikirira.

¹⁹ Aye Katonda wa Yakobo tali ng'oti ni byene, kuba n'eyakola ebintu byonabyona. Era yalonda Isiraeli okuba eighanga erirye ku bubwe. Eriina lye, ni Musengwa Katonda Afuga Amagye.

Enhundo ya Musengwa

²⁰ Musengwa Katonda akoba ati: “Iwe ensi Babilonia, oli nhundo yange era eky'okulwanisa kyange mu lutalo. Nakukozesa okuzikiriza amaghanga n'okusaaniagho obwakyabazinga.

²¹ Nakukozesa okuniantula embalaasi n'abavuzi baadho, n'okuniantula ebigaali eby'omu lutalo n'abavuzi baabyo.

²² Nakukozesa okwita abasaadha n'abakazi, n'abakulu n'abato, n'abalenzi n'abaghala.

²³ Nakukozesa okwita abaayi n'ebyayo byaibwe, n'abalimi n'ensolo dhaibwe dhe balimisa, n'abafuzi era n'abaduumizi b'amagye.”

Ekibonerezo ky'ensi Babilonia

²⁴ Musengwa Katonda era akoba ati: “Mulibona nga neesasuliza ku nsi Babilonia n'abantu baayo, olw'ebibi byonabyona bye baakola Yerusalemu.

²⁵ Iwe Babilonia, oli ng'oti lusozi oluzikiriza ensi yoonayoona. Aye nze Musengwa Katonda mwene ndikukolaku. Ndigolola omukono gwange naakumaniangulamaniangula, naakuleka ng'oli bwa ivu, ng'oti n'olusozi lwe bookiikya omuliro.

²⁶ Olisigala agho otyo ng'oli bifulukwa byereere lubeerera. Era ezira ibaale lye balitoola mu bifunfugu ebyo, ni balizimbisa musingi mu nsonda. Nze Musengwa Katonda, ninze nkobye.

²⁷ “Mughanike ebendera mu nsi, era mufuuwe amagwala ng'akamanhiso ak'okuja okulumba, olwo mutegeke amaghanga okulwanisa Babilonia. Mukobe obwakyabazinga bw'e Ararati, n'obwa Minni, n'obwa Ashekenazi, bwidhe bugirumbe. Mulonde anaaduumira okulumba okwo. Musoloze embalaasi dhibe kamaala ng'oti bikuukuulu bya nzige.

²⁸ Mutegeke amaghanga galwanise Babilonia. Mwetese bakyabazinga ab'e Media, n'abafuzi baibwe ab'ebiketezo, n'abakungu baibwe, n'amagye ag'ensi dhoonadhoona dhe bafuga.

²⁹ Ensi eri kudhugumira era yaatengeeta, kuba Musengwa Katonda aja kutuukiriza entegeka ye ey'okufuula Babilonia eirungu omutaba bantu.

³⁰ Abalwani Abababilonia ab'amaani baleseeyo okulwana, baasigala bwa mu bifo byaibwe eby'okwewogomamu. Amaani gabawoiremu, baafuuka banafu inho. Emiryango egy'ekibuga abazigu bagimenhiegho, n'endhu dhoonadhoona baadhikunaaniaku omuliro.

³¹ Abakwenda bali kwidhira kulalakulala, okukobera kyabazinga ow'e Babilonia bati ekibuga kye abazigu bakimenhiemenhie okuva ku ndhuyi dhoonadhoona.

³² Abazigu bagemye ebifo aghasomokerwa omwiga era bakunaaniiza omuliro ku bifo eby'okwewogomamu. Abaisirukale Abababilonia bali kudhugumira olw'okutya.

³³ Akaseera kasigaire katono abazigu batyankiririre abantu b'omu Babilonia, ng'oti ngaano mu kifo aghakubirwa engaano. Nze Musengwa Katonda Afuga Amagye, Katonda wa Isiraeli, ninze nkobye.”

³⁴ Kyabazinga Nebukadinezzari ow'e Babilonia yasalasala ekibuga Yerusalemu yaakirya. Yaakimalamu ebintu, kyasigala nga kikaya ng'oti n'ensugha ye bavudhumwiremu amaadhi. Yaaba ng'oti n'ogusota ogw'omu nhandha, yaakimira. Yaatwala buli kye yeerobozaamu, ebyasigalagho yaasuula ere.

³⁵ Abantu ab'omu Sioni ka bakobe bati: “Obukambwe Abababilonia bwe baatukolaku, ka bubairirengaku beene abo!” Abantu ab'e Yerusalemu ka bakobe bati: “Omusaayi ogw'abantu baife ogwayuyika, ka gwirirenga ku Bababilonia beene abo!”

Musengwa Katonda aliyamba Isiraeli

³⁶ Kale ni, Musengwa Katonda akoba ab'e Yerusalemu ati: “Bona, nja kubalwanirira, neesasulize ku bazigu baimwe olw'ebyo bye baabakola. Ndikaza enhandha y'Ababilonia era naalekeza n'emiiga gyaibwe okukuuluula amaadhi.

³⁷ Ensi eyo erifuuka bwa mmungo dha bifunfugu, era yaafuuka ekifo ekitiisa einho omuba obw'ebibe, nga ghazira muntu akibaamu.

³⁸ Abababilonia baliwologoma ng'oti mpologoma nkulu, era baavuuma ng'oti mpologoma nto.

³⁹ Nga bwe bali n'amairu, ndibategekera embaga, naabatamiiza baasangaala. Memale baaja baatenduka endoolo, aye baaloba kwiramu kuzuuka.

⁴⁰ Ndibatwala okubaita nga bali ng'oti bwa nsolo mpiite edh'omu maka. Nze Musengwa Katonda, ninze nkobye.”

Ebirituuka ku kibuga Babiloni

⁴¹ Musengwa Katonda ayogera ku Babiloni ati: “Kyewuunhisa okubona nga Babiloni, ekibuga ensi yoonayoona kye yasaakanga, bakighangwire baakigema! Era kyewuunhisa okubona nga kifuuse ekifo ekitiisa einho eri amaghanga!

⁴² Enhandha etaalaaliire ku kibuga Babiloni, yaakimira n'amaadhi gaayo agawolomboka nga geefuukuula.

⁴³ Ebibuga byakyo bifuuse bifo ebitiisa einho. Biri ng'oti irungu omuzira maadhi, era omuzira bantu babibaamu waire ababibitamu obubite.

⁴⁴ Ndibonereza Beli katonda wa Babiloni, naamuleetera n'okwiza bye yaiba, n'amaghanga galekera agho okumusinzanga. “Ekimante eky'oku kibuga Babiloni kigwire ku itaka.

⁴⁵ Imwe Abaisiraeli mulumuke muveegho. Muwonie obulamu bwaimwe, bulobe kutuukibwaku kabi ke nnaaleeta mu busungu bwange obubitirivu.

⁴⁶ Mutawaamu myoyo oba okutya, olw'amawulire ge muwulira mu nsi. Buli mwaka amawulire ag'endhawulo gasansaanizibwa: ka tukobe, ng'ago agoogera ku bikolwa eby'obukambwe mu nsi eno, n'aga kyabazinga ono okulwana ni kyabazinga owundi.

⁴⁷ Kale ni bona, ekiseera kiri kwidha, nsitule olutalo ku bifaananie bye basinza mu Babilonia. Ensi eyo yoonayoona eriswazibwa n'abantu baayo baitibwa, emirambo gyaibwe gyaba bw'agho gityo.

⁴⁸ Ebintu byonabyona ebiri ku nsi n'ebiri ku igulu, biryemba olw'eisanhu nga Babilonia egwire mu ngalo dh'abo abazikiriza, abaliva ku luuyi olw'omukono omugooda olw'e buvandhuba okwidha okugizikiriza.

⁴⁹ Babilonia yaitisa abantu mu nsi yoonayoona. Kale ni, mpegaano yoona baja kugizikiriza olw'okwitisa Abaisiraeli kamaala. Nze Musengwa Katonda, ninze nkobye.”

Obukwenda bwa Katonda eri Abaisiraeli mu nsi Babilonia

⁵⁰ Agho Musengwa Katonda yaakoba abantu abali mu Babilonia ati: “Imwe muwonie okwitibwa! Mperaano muje, era mutalwa naire! Waire nga muli ghala inho mutyo n'eka, aye mundidhukire nze Musengwa Katonda waimwe era mulowooze ku Yerusalemu.

⁵¹ Imwe mukoba muti, ‘Baatuvuma era baatuswazaswaza inho. Ensoni dhaatugema ira, kuba abagwira bangira baatwala ebifo ebitukuvu eby'omu isinzizo.’

⁵² Kale ni, nze nkoba nti, ekiseera kiri kwidha nsitule olutalo ku bifaananie bye basinza mu Babilonia, era abantu abaliba bafumitiibwa balisinda mu nsi eyo yoonayoona.

⁵³ Abababilonia ni bwebaniina ku igulu, ni bazimba okwo ekifo eky'okwewogomamu, era ndisindikayo abo abazikiriza, baaja baakizikiriza. Nze Musengwa Katonda, ninze nkobye.”

Ebindi ebirituuka ku kibuga Babiloni

⁵⁴ Musengwa Katonda akoba ati: “Wulira okulira okuli mu Babiloni n'okuwowoola okuli eyo, olw'okuzikirira okw'ensi eyo.

⁵⁵ Ndi kuzikiriza Babiloni era ndi kukisirisa be kye! Amagye gali kukiyoolookeraku ng'oti n'amaadhi bwegawolomboka nga geefuukuula. Era gali kukirumba nga gaasiikana.

⁵⁶ Amagye agazikiriza ago gaidhiire Babiloni, gakiidhiire okukizikiriza. Abaisirukale baakyo babagemye, n'obulaso bwaibwe baabumenhamenha; kuba nze ndi Katonda abonereza, era ndyesasuliza ku Babiloni nga bwekigwaine.

⁵⁷ Nditamiiza abakungu baakyo, n'abantu baakyo abagezi, n'abafuzi baakyo, n'abaduumizi baakyo ab'amagye, n'abalwani baakyo ab'amaani. Balitenduka endoolo aye baaloba kwiramu kuzuuka. Nze Kyabazinga, Musengwa Afuga Amagye, ninze nkobye.

⁵⁸ Ekimante eky'oku kibuga Babiloni ekikologho balikigwisa ghansi, n'emiryango gyakyo emireeyiriri baligyokya omuliro. Emirimo abantu gye baakolanga gyabadaakiza bwereere, n'amaghanga bye gaakola bya kwokebwa muliro. Nze Musengwa Katonda Afuga Amagye, ninze nkobye.”

Yeremia agheereza obukwenda e Babilonia

⁵⁹ Omugheereza wa kyabazinga Zedekia eyamulabiriranga nga tamuvaaku, baamwetanga Seraia, nga mutabane wa Neria era nga mwidhukulu wa Mahaseia. Mu mwaka ogwokuna nga Zedekia ni kyabazinga wa Buyudaaya, Seraia oyo bwe yali ng'ali kuja e Babilonia ni Zedekia oyo, nze Yeremia naabaaku bye namulagira.

⁶⁰ Naghandiika mu kitabo, byonabyona ebigema ku kuzikirizibwa okwali kuja okutuuka ku Babilonia, era ni bino byonabyona ebigema ku nsi Babilonia eyo

⁶¹ Nakoba Seraia nti: “Bw'olituuka e Babiloni bona nti osomera abantu baawulira bukalamu byonabyona ebighandiikiibwa mu kitabo kino.

⁶² Bw'olimala olisaba Katonda oti, ‘Wo Musengwa Katonda, wakoba oti oidha kuzikiriza ekifo kino ghabule ekiramu kyonakyona ekikisigalamu, k'abe omuntu oba kibe ekisolo olwo ekifo kino kifuuke irungu ery'olubeerera.’

⁶³ Seraia, bw'olimala okusomera abantu ekitabo kino, olikisibaku eibaale waakisuula mu mwiga Eufurate.

⁶⁴ Agho waakoba oti, ‘Ensi Babilonia etyo bw'eridimira, era teriinhululwayo kabiri, kuba Musengwa Katonda aja kugizikiriza.’ ” Ebibono bya Yeremia ghano ghe bikoma.