Yeremia 50 - Baibuli Ekibono kya Katonda 2014

Ekibuga Babiloni bakigema

¹ Buno n'obukwenda Musengwa Katonda bwe yampa obugema ku kibuga Babiloni n'abantu baamu:

² “Langirira amawulire gano ogakobere amaghanga! Ghanika bendera osansaanie amawulire gano! Otagakweka ng'oti kyama! Aye koba bukobe oti, ‘Babiloni bakigemye! Omusambwa gwakyo Merodaki baguswaziiza, baaguleetera okutya einho. Ebifaananie by'ekibuga ekyo baabimenhiemenhie, n'ebisinzibwa byakyo ebitali Katonda baabizikiriza!’

³ “Eighanga liviire ku luuyi olw'omukono omugooda olw'e buvandhuba, lyalumba ensi Babilonia era lija kugireetera okufuuka eirungu. Abantu n'ensolo baja kugirumukamu, ghabulegho omuntu agibaamu waire omulala ati.”

Abaisiraeli baliirayo ewaibwe

⁴ Musengwa Katonda akoba ati: “Ekiseera ekyo bwe kirituuka, abantu b'omu Isiraeli n'ab'omu Buyudaaya baliidha nga balira amaziga, nga baanoonia nze Katonda waibwe.

⁵ Balibuuza engira eja e Sioni, era baasimba mu ngira eyo nga bakoba bati, ‘Mwidhe tweyimbe ku Musengwa Katonda, tukole naye endagaano ey'ebyanda n'ebyanda, ye tutaja kumenhagho naire.’

⁶ “Abantu bange bali ng'oti n'entaama abaayi dhe balese ni dhibulira eyo mu nsozi. Batambulatambula eyo batyo nga bava ku lusozi luno baaja ku lule, baatuuka n'okwerabira amaka gaibwe.

⁷ Buli abababona babalumba. Abazigu baibwe bakoba bati, ‘Baayonoona eri Musengwa Katonda, kale kye tukoze ti kibi naire. Badhaadha baibwe beesiganga Musengwa Katonda kale beene boona bandibaire bamwesiga!’

⁸ “Imwe Abaisiraeli, mulumuke e Babilonia! Muve mu nsi eyo ey'Abakaladea! Niimwe mube musooke okugireka.

⁹ Ndi kuja kusiikuula amaghanga ag'amaani agali ku luuyi olw'omukono omugooda olw'e buvandhuba, ngaleetere okulumba ensi Babilonia. Balisimba enhiriri baalumba ensi eyo, baagighangula. Abantu abo bakugu mu kulasa obulaso, era mu kuteeba tibasubwa naire.

¹⁰ Abazigu balinhagulula ensi Babilonia. Era abo abaliginhagulula balitwala kiisi kye balyenda. Nze Musengwa Katonda, ninze nkobye.”

Ekibuga Babiloni bakighangula

¹¹ Musengwa Katonda akoba ati: “Imwe abantu b'omu nsi Babilonia, mwanhagulula eighanga lyange. Muli basangaavu era muli kusagambya, ng'oti n'ente ento bw'etuumiratuumira mu isubi, era muli kugufula ng'oti mbalaasi nume.

¹² Aye ekibuga kyaimwe ekyabalabirira obukalamu ng'oti ni maama eyabazaala, abazigu balikinhoomoola era baakiswazaswaza. Eighanga lyaimwe n'eririsembayo mu maghanga goonagoona. Era ensi yaimwe eyo erifuuka irungu omuzira maadhi.

¹³ Olw'obusungu bwange, ezira muntu aliirayo kubanga mu nsi Babilonia, erisigala agho etyo ng'eri bifulukwa byereere. Abantu boonaboona abaligibitangamu baligyezindukanga era baatya einho olw'okuzikirizibwa kwayo.

¹⁴ “Imwe mwenamwena abalasa obulaso, musimbe enhiriri muzingize Babiloni okukyezunguluza era mukirwanise. Mulase obulaso bwaimwe bwonabwona, aghazira kulekagho waire akalala kati, mukizikirize olw'okuba abantu baakyo baakola ebibi eri nze Musengwa Katonda.

¹⁵ Mwasiikanire ku ndhuyi dh'ekibuga ekyo dhoonadhoona nga mukirwanisa. Abantu baakyo bamaze okweghaayo mu ngalo edh'abazigu baibwe. Ekimante kyakyo ekigumu ekikyezungulwire bakiwomoirewomoire era baakimenhagho. Nze Musengwa Katonda ndi kwesasuuliza ku Bababilonia. Kale ni, imwe mubeesasulizeeku era mubabise nga beene bwe baabisanga abandi.

¹⁶ Mutaganha bantu ba mu nsi eyo Babilonia kusiga nsigo, waire okubaganha okugema emiwolo okuwoobya amakungula mu nimiro. Kiisi mugwira ali mu nsi eyo alitya eigye erija okugirumba, yaalumuka yairayo ewaibwe ye yava.”

Abaisiraeli baliirayo ewaibwe

¹⁷ Musengwa Katonda akoba ati: “Abaisiraeli bali ng'oti ntaama edhirumuka ni dhisansaana ng'empologoma dhiri kudhibinga. Kyabazinga ow'e Assiria n'eyasooka okubalumba, memale kabiri kyabazinga Nebukadinezzari ow'e Babilonia yaababegeta amagumba.

¹⁸ Kale olw'ekyo, nze Musengwa Katonda Afuga Amagye, Katonda wa Isiraeli, nkoba nti ndibonereza kyabazinga Nebukadinezzari n'ensi ye, ng'oti ni bwe nabonereza kyabazinga ow'e Assiria.

¹⁹ Ndiizaayo Abaisiraeli mu nsi yaibwe, baalya emere erimwa ku lusozi Karumeli, ni mu kiketezo ky'e Bashani. Era balirya nga bwe benda, ku bibala ebirimwa mu kiketezo kya Efuraimu ni mu kya Gileadi.

²⁰ Ekiseera ekyo bwe kirituuka, tighaliba kwonoona mu Isiraeli, waire okubaagho ebibi mu Buyudaaya kuba ndisonigha abantu boonaboona be ndiba mponiizaagho. Nze Musengwa Katonda, ninze nkobye.”

Katonda asalira ensi Babilonia omusango

²¹ Musengwa Katonda akoba abazigu ati: “Muje mulumbe abantu ab'e Merathaimu n'ab'e Pekoda, mu baite mubazikirize. Mukole byonabyona bye mbalagiire. Nze Musengwa Katonda, ninze nkobye.

²² Abantu b'omu Babilonia bali kuwulira mu nsi yaibwe eyo okwasiikana okw'omu lutalo, era baabona n'okuzikirira okunene einho.

²³ Ensi Babilonia yakontakontanga amaghanga agandi goonagoona ag'omu nsi, ng'oti nhundo, yaagamaniangula. Aye yoona mperaano bagikonsekonse baagimaniangula. Era amaghanga goonagoona gatiire inho olw'ebyo ebigituuseeku.

²⁴ Iwe Babilonia, waanwanisa nze Musengwa Katonda, aye omutego gukugemiisa gwe nakutega nga toidhiiku naire.

²⁵ Ndhigwiregho eiterekero ery'eby'okulwanisa byange, era naabifulumya nga nsungughaire inho kuba nze Musengwa Katonda Afuga Amagye ndi ni kye nja okubikozesa mu nsi eyo ey'Abakaladea.

²⁶ Mugirumbe nga mugiva ku ndhuyi dhoonadhoona, mubandulegho endhigi ku materekero gaayo. Mubunge omunhago mu mmungo, ng'oti dha ngaano. Muzikirize ensi eyo, mulobe kulekagho kintu kyonakyona.

²⁷ Mugeme abalwani baayo boonaboona, ab'amaani ng'oti gate galume, muje mubaite. Abantu ab'e Babilonia bakagwireku, kuba ekiseera kyaibwe eky'okubabonereza kituuse.”

²⁸ “Wulira! Abaalumwike e Babilonia ni bawona, baize e Yerusalemu baloodhe nga Musengwa Katonda waife bwe yeesasuuza olw'ebyo Abababilonia bye baakola eisinzizo lye.

²⁹ “Musoloze abakugu boonaboona mu kulasa obusaale, n'abo boonaboona abaidhi okukozesa obulaso n'obusaale, baje balumbe ekibuga Babiloni. Bakizingize okukyezunguluza, era balobe kuganha muntu yeenayeena kulumuka kuwona. Olwo mukyesasulizeeku byonabyona bye kyakola era mukibise nga kyene bwe kyabisanga abandi kuba kyaneekudumbalizaaku nze Omutukuvu wa Isiraeli.

³⁰ Kale ni, ku lunaku olwo abazigu baliitira abaisuka b'omu kibuga ekyo mu nguudo dhaakyo, n'abaisirukale baakyo boonaboona baabazikiriza. Nze Musengwa Katonda, ninze nkobye.

³¹ “Iwe ensi Babilonia, weekuluntaza inho. Kale ni, nze Musengwa Katonda Afuga Amagye ndidha kukukolaku. Ekiseera kituuse nze nkubonereze.

³² Iwe ensi eyeekuluntaza, olyekontola waagwa aye ghaabulagho n'omuntu alikuyamba okusitukagho. Ebibuga byo ndibikunaaniaku omuliro, gwazikiriza ebintu byonabyona ebyezungulwire agho.”

³³ Musengwa Katonda Afuga Amagye akoba ati: “Abantu Abaisiraeli n'Abayudaaya batuntuzibwa. Era abo boonaboona abaabagema ni babatwala mu bunhage babakuuma butiribiri, aghazira kubalekula kuja.

³⁴ Aye Omununuzi waibwe wa maani. Eriina lye ayetebwa Musengwa Katonda Afuga Amagye. Oyo n'alibalwanirira mwene, yaaleeta emiraala ku nsi, aye mu Babilonia yaaleetamu bizibu byereere.”

³⁵ Musengwa Katonda akoba ati: “Abantu b'omu kibuga Babiloni ka bafe, n'abantu b'omu nsi Babilonia yoonayoona ka bafe, ghalala n'abakungu baibwe, n'abantu baibwe abagezi.

³⁶ Abalanzi baayo abaguya ka basirughale bafe, n'abalwani baayo ab'amaani ka bafe, bazikirire!

³⁷ Embalaasi dhaayo n'ebigaali byayo eby'omu lutalo, abazigu ka babizikirize. Abaisirukale baayo abapangise ka bafuuke banafu inho, bafe! Abazigu ka bagwe ku bintu byayo eby'obukombe babinhage.

³⁸ Akasana k'endoboozi leka kaidhe kaake, kakaze amaadhi gaayo goonagoona; kuba ensi Babilonia eyo eidhwire ebifaananie ebibaadhe n'ebisinzibwa ebitali Katonda, ebisirughaiza abantu einho.

³⁹ “Kale ni ekibuga Babiloni kiribangamu bisolo bya mu irungu, na mpiti, na nhonhi dhitali nongoofu. Tikiriirayo kabiri kubaamu bantu mu biseera byakyo byonabyona eby'omu maiso.

⁴⁰ Nga bwe nazikiriza Sodoma, ni Gomorra, aghalala n'ebibuga ebyali agho okumpi nabyo, n'ekibuga Babiloni ntyo bwe ndikizikiriza, kyaloba kwiramu kubangamu bantu. Nze Musengwa Katonda, ninze nkobye.

⁴¹ Bona, ghaligho abantu abaliidha nga bava mu nsi eri ku luuyi olw'omukono omugooda olw'e buvandhuba; eighanga ery'amaani ni bakyabazinga kamaala baliva eghala einho beetegekera okulwana olutalo.

⁴² Baligema obulaso n'empiima, nga bakambwe era nga tibasaasira naire. Empindo dhaibwe nga bali ku mbalaasi dhirivuuma ng'oti kuwolomboka kwa maadhi ga nhandha. Balyetegekera olutalo, okulwanisa imwe abantu b'omu Babiloni.

⁴³ Kyabazinga w'ensi Babilonia aliwulira ebiri kwidha, n'emikono gyamuwaamu amaani; yaawulira obulumi ng'oti bwa mukazi ali kulumwa okuzaala.

⁴⁴ “Ng'empologoma bw'evaayo mu kibira ekizibirivu ekiri ku mbali kw'omwiga Yorudani n'eja n'erumba ebyayiro by'ensolo ebirungi, zeena, nze Musengwa Katonda, ntyo bwendiidha okuzindula Abababilonia, balumuke bave mu kibuga kyaibwe. Olwo omuntu ye ndirondagho n'alifuga eighanga eryo. Naani asobola okwegeza ku nze? Naani asobola okuneesonsaaku? Era mufuzi ki asobola okuntakania?

⁴⁵ Kale ni muwulire kye ntegeike okukola ku kibuga Babiloni, akabi ke neesoomeire okutuusa ku bantu baakyo. Ni bwe baba abaana baibwe, abazigu balibakwekwebya baabatwala, era abantu boonaboona balitya inho.

⁴⁶ Babiloni bwe kirigwa, omuvuuma guliba gwa maani inho n'ensi yoonayoona yaatengeeta. Era okulira kw'abantu baakyo kulija ghala inho kwatuuka ni mu maghanga goonagoona.”