Yeremia 49 - Baibuli Ekibono kya Katonda 2014

Musengwa Katonda asalira ensi Ammoni omusango

¹ Bino Musengwa Katonda bye yakoba ku nsi Ammoni, ati: “Abantu ab'omu Isiraeli bali gha? Ezira muntu asobola kulwanirira nsi yaibwe? Lwaki baaleka abantu abasinza omusambwa Milikomu okutoola ekiketezo eky'ab'ekika kya Gadi ni bakifuula ekyaibwe?

² Aye bona, ekiseera kiidha kutuuka, abantu ab'omu Rabba ekibuga ekikulu eky'Abammoni, mbaleetere okuwulira okwasiikana okw'omu lutalo. Abazigu balikireka agho kityo nga kifuuse bifulukwa byereere, era nga bookiikya n'ebyalo byakyo omuliro byawaagho. Olwo Abaisiraeli balyeiriza ekiketezo kyaibwe, baakitoola ku abo abaali bakibatoireku.

³ Imwe abantu b'e Heshiboni, muvaale kutiya era muwowoole! Mulumukirerumukire eno n'ere olw'okusoberwa. Omusambwa gwaimwe Milikomu baja kugutwala mu bunhage, ghalala ni bakabona baagwo n'abakungu baagwo.

⁴ Lwaki abantu imwe abatali beesigwa mwesuutiriza? Amaani gaidha kubawaamu. Lwaki mwesigulira ku bukombe bwaimwe, nga mukoba muti ghazira asobola kukana n'abalumba?

⁵ Nze Musengwa Katonda Afuga Amagye nkoba nti ndidha kubaleetera okutya okungi nga kubava ku buli luuyi. Mwenamwena mulirumukagho, nga buli muntu ayenda kuwonia bulamu bwe. Era nga ghazira asobola kusoloza bamagye gaimwe kugaiza ghalala.

⁶ “Aye nga ghabiseegho ekiseera, ndireetera Abammoni ebintu okwiramu kabiri okubajiiranga obukalamu. Nze Musengwa Katonda, ninze nkobye.”

Musengwa Katonda asalira ensi Edomu omusango

⁷ Bino Musengwa Katonda Afuga Amagye bye yakoba ku nsi Edomu, ati: “Abantu ab'omu Temani eky'omu nsi Edomu tibakaalimu magezi? Abawi b'amagezi tibakaabakobera kya kukola? Obwo amagezi gabaweereiremu irala?

⁸ Imwe abantu ab'e Dedani, mukyuke mulumuke, muje mwegise! Nja kuzikiriza baidhukulu ba Esau, kuba ekiseera kituuse eky'okubabonereza.

⁹ Abantu bwe baba banoga emizabbibu balekakuuku egindi, n'abaibi bwe baidha okwiba obwire batwalaku ebyo bye benda byonka.

¹⁰ Aye nze baidhukulu ba Esau mbatoireku buli kantu baasigala bwereere. Era mbwikwire ebifo bye beegisaamu, baaba nga tibakaasobola kwegisa. Abantu boonaboona ab'omu Edomu bazikiriziibwa, tighakaaligho muntu waire mulala ati asigairegho.

¹¹ Muleke bamulekwa baimwe, nze ndidha kubalabirira. Ni banamwandu baimwe beesige nze.

¹² “Ate oba n'abo abaali tibagwaine kubonerezebwa, baali n'okunhwa ku kikopo eky'ekibonerezo, obwo imwe mulowooza muti timulibonerezebwa? Busa naire, muteekwa okunhwa ku kikopo ekyo eky'ekibonerezo.

¹³ Nze ndayira mu liina lyange mwene nti ekibuga Bozira kirifuuka ekintu ekitiisa einho, abantu baakisekerera era baakozesa eriina lyakyo ng'ekikolimo. Ebyalo byonabyona ebikiri okumpi birifuuka bifulukwa byereere eby'olubeerera. Nze Musengwa Katonda, ninze nkobye.”

¹⁴ Agho nze Yeremia naakoba nti: “Edomu, nawulira amawulire okuva ye Musengwa Katonda. Era ghaligho omukwenda eyatumwa okuja ng'abitabita mu maghanga, ng'akoba ati, ‘Mwetegeke, muje mulumbe Edomu.’

¹⁵ Musengwa Katonda oyo yakwesoomera iwe Edomu ati, alikufuula omunafu asembayo mu maghanga goonagoona, era buli muntu alikunhooma.

¹⁶ Okwekuluntaza kwo kukulimbye, era ghazira akutya kuba olowooza oti ekifo ky'olimu kyesigika inho, ng'oti n'ekifo ekigumu eky'okwewogomamu ekyabaadhibwa mu ibaale. Era weesigulira inho ku ky'amaka go okuba nga gali ghaigulu mu nsozi. Aye Musengwa Katonda oyo alikughanulayo yaakwisa ghansi. Musengwa Katonda mwene n'akobye.”

¹⁷ Musengwa Katonda era yaakoba ati: “Edomu erifuuka ekintu ekitiisa einho, era buli muntu anaagibitangaku aidha kutengeesanga bwa mutwe olw'okutya okungi.

¹⁸ Nga Sodoma ni Gomorra bwe baabizikiriza aghalala n'ebibuga ebyali agho okumpi nabyo, n'ensi Edomu etyo bwe baligizikiriza, yaaloba kwiramu kubangamu bantu. Nze Musengwa Katonda, ninze nkobye.

¹⁹ Ng'empologoma bw'evaayo mu kibira ekizibirivu ekiri ku mbali kw'omwiga Yorudani n'eja n'erumba ebyayiro by'ensolo ebirungi, zeena ntyo bwendiidha okuzindula Abaedomu, balumuke bave mu nsi yaibwe. Olwo omuntu ye ndirondagho n'alifuga eighanga eryo. Naani asobola okwegeza ku nze? Naani asobola okuneesonsaaku? Era mufuzi ki asobola okuntakania?

²⁰ Kale ni muwulire kye ntegeike okukola abantu b'omu Edomu, akabi ke neesoomeire okutuusa ku bantu b'omu kibuga Temani. Ni bwe baba abaana baibwe, abazigu balibakwekwebya baabatwala, era abantu boonaboona balitya inho.

²¹ Ensi Edomu bw'erigwa, omuvuuma guliba gwa maani inho n'ensi yoonayoona yaatengeeta. Era okulira kwaibwe kulija ghala inho kwatuuka ni ku Nhandha Emyufu.

²² Abazigu balirumba Bozira baakigwaku ng'oti n'enkookooma eyandhulwiza amaghagha gaayo. Ku lunaku olwo, abalwani ba Edomu ab'amaani baliidhula okutya ng'oti n'omukazi ali kulumwa okuzaala.”

Musengwa Katonda asalira ekibuga Damasiko omusango

²³ Bino Musengwa Katonda bye yakoba ku Damasiko, ati: “Abantu b'omu bibuga Hamathi ni Arupadi beeraliikirivu era basobeirwa, kuba baawulira amawulire amabi agatiisa. Okweraliikirira kuli kubeefuukuula mu myoyo gyaibwe ng'oti kwefuukuula kwa nhandha. Era bazira miraala naire.

²⁴ Abantu b'e Damasiko bawoiremu amaani era balumwikegho nga batiire inho. Bali mu bulumi era beeraliikirivu, ng'oti n'omukazi ali kulumwa okuzaala.

²⁵ Ekibuga ekyali kimanhikaine einho era nga kirimu eisanhu, buti baakireka bw'agho.

²⁶ Ku lunaku olwo abazigu baliitira abaisuka b'omu kibuga ekyo mu nguudo dhaakyo, n'abaisirukale baakyo boonaboona baabazikiriza.

²⁷ Ndikunaania omuliro ku bimante ebyezungulwire ekibuga Damasiko, era naayokya ekisaagaati kya kyabazinga Benihadadi. Nze Musengwa Katonda, ninze nkobye.”

Musengwa Katonda asalira ekika kya Kedari n'ekibuga Hazori omusango

²⁸ Bino Musengwa Katonda bye yakoba ku kika kya Kedari ni ku biketezo ebifugibwa Hazori, kyabazinga Nebukadinezzari ow'e Babilonia bye yaghangula. Yakoba ati: “Muje mulumbe abantu ba Kedari, muzikirize ekika ekyo eky'abantu ab'e buvandhuba.

²⁹ Munhage weema dhaibwe, n'ensuubo dhaamu, n'ebirimu byonabyona. Mutwale ebyayo byaibwe n'engamiya dhaibwe. Era mukobere abantu muti, ‘Buli ghantu ghali ntiisa ndhereere!’

³⁰ “Imwe abantu b'e Hazori, nze Musengwa Katonda mbalabula nti mulumuke muje ghala inho mwegise. Kyabazinga Nebukadinezzari abeesoomeire okubakola akabi, ng'akoba ati,

³¹ ‘Mwidhe tuje, tulumbe abantu abo abawulira mule nga bali mu miraala. Ekibuga kyaibwe kiziraku ndhigi, oba okubaaku ebisiba, oba okubaaku abakikuuma.’

³² “Munhage engamiya dhaibwe n'ebyayo byaibwe byonabyona. Abantu abo abasala ku nviiri dhaibwe, ndibasansaaniza mu ndhuyi dhoonadhoona. Era ndibatuusaaku akabi nga kava mu ndhuyi dhoonadhoona.

³³ Hazori kija kufuulibwa irungu ebyanda n'ebyanda, era kibe ekifo omuba obw'ebibe. Abantu tibaliiramu kusengayo. Tighaliba muntu alibangayo kabiri. Nze Musengwa Katonda, ninze nkobye.”

Musengwa Katonda asalira ensi Elamu omusango

³⁴ Agho Zedekia nga yaakamalanga okufuuka kyabazinga wa Buyudaaya, Musengwa Katonda yaayogera ninze Yeremia, ebigema ku nsi Elamu.

³⁵ Yakoba ati: “Nze Musengwa Katonda Afuga Amagye, ndiita abalasa obusaale boonaboona abaleeteire Elamu okuba ey'amaani etyo.

³⁶ Ndireeta kiwunga yaakunta mu nsi Elamu ng'ava ku ndhuyi dhoonadhoona. Olwo naasansaaniza abantu baayo ku ndhuyi dhoonadhoona, okutuusa nga mu buli nsi mulimu abalumukiireyo.

³⁷ Ndireetera abantu ab'e Elamu okutya abazigu baibwe abenda okubaita. Mu busungu bwange obubitirivu, ndibatuusaaku akabi nga mbasindikira entalo edhiribaita okutuusa lwe ndibasaaniagho.

³⁸ Ndizikiriza bakyabazinga baibwe n'abakungu baibwe, naamala naataagho ekityamo kyange eky'obwakyabazinga.

³⁹ Aye mu biseera eby'oluvainhuma, ndireetera ebintu okwiramu okujiiranga Elamu obukalamu. Nze Musengwa Katonda, ninze nkobye.”