Yeremia 48 - Baibuli Ekibono kya Katonda 2014

Ensi Moabu bagizikiriza

¹ Bino Musengwa Katonda Afuga Amagye, Katonda wa Isiraeli, by'akoba ku Moabu: “Bakagwireku abantu ab'e Nebo, ekibuga kyaibwe abazigu bakizikiriiza. Kiriathaimu baakigemye, ekifo kyakyo eky'okwewogomamu bakimenhiegho n'abantu baamu baaswazibwa.

² Ekitiibwa kya Moabu kiwoiregho. Abazigu bagemye ekibuga Heshiboni ye baategekera okuzikiririza eighanga ly'e Moabu eryo. Imwe abantu b'omu kibuga Madimeni, abazigu baidha kubasirisa, amagye gaibwe gaidha kwidha galumbe ekibuga kyaimwe ekyo.

³ Wulira! Abantu ab'e Horonaimu bali kulira bati, ‘Bikolwa bya bukambwe na kuzikiriza n'ebiri buli ghantu byonka.’

⁴ Ensi Moabu bagizikiriiza! Wulira abaana baayo bwe balira!

⁵ Abantu baniinaniina okuja e Luhithi nga bwe balira engira eyo yoonayoona; era baaserengeta okuja e Horonaimu nga bwe bawowoola mu nnaku embitirivu.

⁶ “Baakoba bati, ‘Mulumuke muwonie obulamu bwaimwe. Muziinhuuke ng'oti n'endogoyi ey'omu irungu!’

⁷ Iwe Moabu, eira weesiganga amaani go n'obukombe bwo, aye mpegaano weena baja kukughangula; era katonda wo ayetebwa Kemoshi, baidha kumutwala mu bunhage, ghalala ni bakabona be n'abakungu be.

⁸ Oyo ali kwidha okuzikiriza, aligwa ku buli kibuga yaakizikiriza, aghazira kulekagho waire ekirala kiti. Alizikiriza ebiiko n'emiseetwe. Nze Musengwa Katonda, ninze nkobye.

⁹ Musimire ensi Moabu amagombe, kuba ebulaku katono inho bagizikirize, ebibuga byayo bifuuke bifulukwa byereere, ghabulegho omuntu abibaamu.

¹⁰ “Omuntu atakola mulimo gwa Musengwa Katonda na mwoyo mulala akolimirwe! N'oyo alobera empiima ye okwita akolimirwe!”

Ebibuga by'omu nsi Moabu babizikiriza

¹¹ Musengwa Katonda yaakoba ati: “Abantu b'omu Moabu buliidho babaire nga baba mu miraala, nga bazira kibeeraliikiriza, era nga tibatwalibwangaku mu bunhage. Bali ng'oti n'omwenge ogw'emizabbibu ogulekeibwa agho okulaala, nga ghazira agulengulula kugutoola mu nsugha eno kugufuka mu yindi. Akawoowo kaagwo nga tikakyukangaku era nga n'obuwoomi bwagwo tibukendeerangaku naire.

¹² “Kale ni ekiseera kiri kwidha ntume abantu, bafuke ere abantu b'omu Moabu ng'oti mwenge gwa mizabbibu. Bagumaliriremu mu nsugha gwonagwona, n'ensugha badhimenhemenhe.

¹³ Olwo Kemoshi katonda w'Abamoabu, alitoolera okugemya Abamoabu abo ensoni, ng'oti ni Betheli ekifo Abaisiraeli kye beesiganga, bwe kyagemya Abaisiraeli abo ensoni.

¹⁴ Imwe ab'e Moabu, lwaki mweyeta ab'amaani era ni mweyeta abalwani abaziramu ntete?

¹⁵ Omuzigu azikiriiza ensi Moabu n'ebibuga byayo. Abaisuka baayo abasingayo okuba ab'amaani babaise. Ninze kyabazinga ayetebwa Musengwa Katonda Afuga Amagye, ninze nkobye.

¹⁶ Akabi akali kwidhira Moabu kali kumpi, okuzikirira kwayo kuseese.

¹⁷ Mulire olw'eighanga eryo imwe abaliriiraine; imwe mwenamwena abaliidhi nga bwe liri eimanhifu, mulire amaziga. Mukobe muti, ‘Obufuzi bwalyo obw'amaani, era obw'ekitiisa babumenhiegho.’

¹⁸ Imwe ababa mu Diboni, muveeyo mu kifo kyaimwe eky'ekitiisa, mwike mutyame ghansi mu nkungu; kuba oyo ow'okuzikiriza Moabu abaidhiire, azikiriiza ebifo byaimwe eby'okwewogomamu, byafuuka bifulukwa byereere.

¹⁹ Imwe ababa mu Aroeri, mwemerere ku mbali kw'enguudo muteegerere, mubuuze abo abali kuziinhuuka nga balumuka okwewonia, muti, ‘Kiki ekigwiregho?’

²⁰ Baidha kubairamu bati, ‘Ensi Moabu egwire. Mulire amaziga olw'ensi eyo, kuba eswaziibwa. Muje mulangirire mu biketezo eby'oku mwiga Arunoni, muti Moabu bagizikiriiza!’

²¹ “Musengwa Katonda asaliire ebibuga eby'oku museetwe omusango gwabisinga. Ebibuga ebyo ni bino: Holoni, Yahaza, Mefaathi,

²² Diboni, Nebo, Bethi Dibulathaimu,

²³ Kiriathaimu, Bethigamuli, Bethimeoni,

²⁴ Keriothi, Bozira, n'ebibuga byonabyona eby'omu nsi Moabu eby'okumpi n'eghala.

²⁵ Amaani ag'ensi Moabu gatyankiriirwa, n'obuyinza bwayo bwazikirizibwa. Nze Musengwa Katonda, ninze nkobye.”

Ensi Moabu baligiisa ghansi yeewombeeka

²⁶ Musengwa Katonda yaakoba ati: “Mutamiize Moabu, etuuke n'okwegalangula mu biseseme byayo, kuba yandheemera. Olwo efuuke enseko dh'abalamu.

²⁷ Iwe Moabu, lwaki mwasekerera Abaisiraeli? Lwaki mwababisa ng'oti ni be mugemeire mu kikuukuulu eky'abaibi nga bali kunhagulula?

²⁸ “Imwe abantu b'e Moabu, muve mu bibuga byaimwe, muje mubenga mu mbaalebaale. Mube ng'oti mayemba agazimba mu ndhatika edhiba mu gabaale.

²⁹ Nawulira abantu b'e Moabu nga bwe beekuluntaza. Beekuluntaza inho, beetwala okuba aba ghaigulu, beedundeeza, beedunkumaza, era beebona inho bonka.

³⁰ Nze Musengwa Katonda ndidhi okwekuluntaza kwaibwe. Bye beesuuta nabyo biziramu makulu. Ni bye bakola biziramu nsa.

³¹ Kale ni ndidha kulira amaziga olw'ensi Moabu, mpowoole olw'abantu boonaboona ab'e Moabu, era ngegenge olw'abantu b'e Kiriheresi.

³² Ndidha kulira abantu b'e Sibuma okusingaku bwe ndira abantu b'e Yazeri. Iwe ekibuga Sibuma, oli ng'oti muzabbibu oguli n'ensaga endeeyiriri edhituuka ku Nhandha Eyomuunhu, ni dhituukira irala n'e Yazeri. Aye mperaano ole azikiriza agwire mu bibala byaimwe eby'ekyengera n'emizabbibu gyaimwe, yaabizikiriza.

³³ Ntoiregho okusangaala n'okusagamba mu nsi engimu ey'e Moabu. Era naalekeza omwenge ogw'emizabbibu okudhuluudha okuva mu bikunhiro eby'omwenge ogw'emizabbibu. Tighakaaligho bakunha mwenge gwa mizabbibu nga bwe baasiikana olw'eisanhu. Okwasiikana okuligho buti tikwa isanhu naire.

³⁴ “Abantu ab'e Heshiboni n'ab'e Eleale balikuba empungu dhaaja dhaatuukira irala n'e Yahazi. Abantu b'e Zoari, n'ab'e Horonaimu, n'ab'e Egulathi Shelishiya, baliwulira empungu edho. N'akaiga ak'e Nimurimu kalikala.

³⁵ Nja kulekeza abantu ab'omu Moabu okughangayo emisengo egyokebwa mu bifo byaibwe ebigulumivu eby'okusinzizaamu, era ndekeze n'okuniokezanga bakatonda baibwe obubbaani. Nze Musengwa Katonda, ninze nkobye.

³⁶ “Kyenva ni ndira amaziga olw'abantu ab'e Moabu, era naalira olw'abantu ab'e Kiriheresi, nga ndi ng'oti n'ole afuuwa olwembo olw'enaku ku ndere. Ndira, kuba buli kintu kye baali nakyo kizikiriire.

³⁷ Boonaboona bamweire enviiri ku mitwe gyaibwe, baasalaku n'ebirevu byaibwe. Era beesazesaze emisale ku mikono gyaibwe, baavaala n'ekutiya olw'enaku.

³⁸ Ghaigulu ku ndhu edh'e Moabu ni mu mpya edh'ebibuga byayo, eriidhula kulira maziga, kuba nja kusaaniagho Moabu ng'oti n'omuntu bw'amaniangula ensugha eziraku agyenda.

³⁹ Moabu bagimaniangwire! Abantu bali kulira bwa maziga! Mpegaano efuuse ekintu ekitiisa einho, era yaafuuka nseko dha balamu. Nze Musengwa Katonda, ninze nkobye.”

Moabu ezira gh'eja kuwonera

⁴⁰ Musengwa Katonda akoba ati: “Eighanga lirirumba Moabu lyagigwaku ng'oti n'enkookooma eyandhulwiza amaghagha gaayo.

⁴¹ Abazigu baligema ebibuga n'ebifo byayo eby'okwewogomamu. Ku lunaku olwo, abalwani ba Moabu ab'amaani baliidhula okutya ng'oti n'omukazi ali kulumwa okuzaala.

⁴² Moabu baligizikiriza, yaalekera agho okuba eighanga, olw'okuba yandheemera.

⁴³ Entiisa, n'ebiina, n'emitego, n'ebirindiriire abantu b'e Moabu. Nze Musengwa Katonda, ninze nkobye.

⁴⁴ Buli aligezaaku okulumuka okwewonia entiisa, aligwa mu biina. Ate oyo aliniina n'ava mu biina, aligwa ku mutego, olw'okuba nze Musengwa Katonda namala okutaagho ekiseera eky'okuzikirizaamu Moabu.

⁴⁵ Abalirumuka ni bawonagho balyewogomaku mu kibuga Heshiboni nga bawoiremu amaani, nga benda babeeku mu kibuga ekyo kyabazinga Sihoni kye yafugaku. Aye balyagaana Heshiboni nga kiri kubbeibbera muliro. Omuliro guliba gumaze okwokya ebiketezo eby'oku nsalosalo dh'ekibuga n'ebiketezo eby'oku nsozi eby'abantu b'e Moabu abenda einho okulwana entalo.

⁴⁶ Okagwireku iwe ensi Moabu! Abantu abasinza omusambwa Kemoshi abazigu babazikiriiza, batabane baibwe ni baghala baibwe baabatwala mu banhage.

⁴⁷ “Aye mu biseera eby'oluvainhuma, nze Musengwa Katonda ndireetera ebintu okwiramu okujiiranga Abamoabu obukalamu.” Ebyo byonabyona, Musengwa Katonda bye yakoba okutuuka ku nsi Moabu.