Yeremia 47 - Baibuli Ekibono kya Katonda 2014

Obukwenda bwa Musengwa Katonda obugema ku Filisitia

¹ Agho nga kyabazinga wa Misiri akaali kulumba Gaza, Musengwa Katonda yayogera ninze ebigema ku Filisitia.

² Yaakoba ati: “Bona! Abazigu bali kwesololeza ere ku luuyi olw'omukono omugooda olw'e buvandhuba, nga bali ng'oti n'omwiga oguli kubanda. Baidha kubuutikira ensi n'ebigiriku byonabyona, babuutikire n'ebibuga n'abantu ababibaamu. Abantu baliririra nze mbayambe, buli muntu ali ku nsi aliwowoola amaziga.

³ Baliwulira ebinuulo by'embalaasi nga biri kubbagalya ku itaka, baawulira okupakalania okw'ebigaali eby'omu lutalo, n'okuwoloma okw'enkede dhaabyo. Abazaire tibalikyuka kunona baana baibwe, emikono giribalekuka nga giwoiremu amaani.

⁴ Ekiseera kituuse eky'okuzikiriza Filisitia, okulekeza obuyambi bwonabwona obukaasigairegho, obuva e Tiro n'e Sidoni. Nze Musengwa Katonda ndizikiriza Abafilisiti abo boonaboona abakaasigairegho abaava ku kizinga Kafutori.

⁵ Abantu b'e Gaza bamweire enviiri gha mberi ku mitwe gyaibwe gyaba ng'oti gya mpaata, olw'okunakughala! Ab'e Ashikeloni bafiire baasirika. Abanaki abakaasigairegho, balituusa li okwesalasala ku mibiri gyaibwe olw'okunakughala?

⁶ Mulirira amaziga muti, ‘Wo empiima ya Musengwa Katonda iwe! Olirekera li okuja ng'osaagha? Irayo mu kiruutu kyo osigale omwo owuumule!’

⁷ Aye empiima enaawuumula etya nga ngighaire omulimo ogw'okukola? Ngiragiire okulumba Ashikeloni n'abantu ababa ku mbali kw'enhandha.”