Yeremia 46 - Baibuli Ekibono kya Katonda 2014

Misiri bagighangulira mu lutalo e Karikemishi

¹ Agho Musengwa Katonda yaayogera ninze ebigema ku maghanga,

² ng'atoolera ni Misiri. Bino bye yayogera ku igye lya kyabazinga Neko ow'e Misiri, Nebukadinezzari kyabazinga w'e Babilonia lye yaghangulira e Karikemishi okumpi n'omwiga Eufurate, mu mwaka ogwokuna nga Yehoiakimu ni kyabazinga wa Buyudaaya:

³ “Abaduumizi Abamisiri baakaabuka bati, ‘Mugeme engabo dhaimwe enene n'entono, mwetegekere okuja mu lutalo.

⁴ Imwe abavuzi b'embalaasi, musibe ebigaali byaimwe eby'omu lutalo ku mbalaasi dhaimwe. Mughagale amafumo gaimwe, muvaale enkuufiira dhaimwe edh'ekyuma, n'ebivaalo eby'omu kifuba eby'ekyuma. Muniine ku bigaali eby'omu lutalo ebyo, musimbe enhiriri.’ ”

⁵ Aye Musengwa Katonda yeebuuza ati: “Kiki kye ndi kubona? Batiire inho era bali kwira einhuma! Abalwani baibwe ab'amaani baghangwirwa, baaziinhuuka embiro nga bagwidhubana, aghazira kulinga na inhuma. Era buli ghantu ghali ntiisa ndhereere!

⁶ Ni bale abasinga kuziinhuuka mbiro tibasobola kulumukagho; abalwani ab'amaani abo tibasobola okwewonia. Ere ku luuyi olw'omukono omugooda olw'e buvandhuba, okumpi n'omwiga Eufurate, bagangaliime baagwa.

⁷ Naani ono ali kusituka ng'oti kwefuukuula kwa mwiga Kiyira, ng'oti n'omwiga ogwidhwire ni gubanda?

⁸ Ensi Misiri n'eri kusituka ng'oti kwefuukuula kwa mwiga Kiyira, ng'oti n'omwiga ogwidhwire ni gubanda. Ensi eyo Misiri n'eyakoba eti, ‘Ndidha kusituka ng'oti kwefuukuula kwa mwiga Kiyira, mmaamire ensi yoonayoona. Era nzikirize ebibuga n'abantu ababibaamu.

⁹ Muduumire embalaasi dhije dhirumbe, n'ebigaali eby'omu lutalo biwuluguke embiro! Imwe abalwanisa engabo ab'e Ethiopia n'ab'e Puti, muje mulumbe. N'imwe abakugu mu kulasa obusaale ab'e Ludi, muje mulumbe.’ ”

¹⁰ Luno n'olunaku lwa Musengwa Katonda afuga Amagye, olunaku olw'okwesasuuza nga yeesasuuliza ku bazigu be. Empiima ye eja kubalya eigute, era enhwe omusaayi gwaibwe okutuusa ku nkooye; kuba Musengwa Katonda oyo Afuga Amagye aja kubaghaayo ng'oti musengo, ere mu nsi eri ku luuyi olw'omukono omugooda olw'e buvandhuba kumpi n'omwiga Eufurate.

¹¹ Imwe abantu ab'omu Misiri, muje e Gileadi mufuneyooku ku bulezi obuwonia! Mukozeisa obulezi ebika n'ebika aye nga tibukola. Timukaasobola kuwonezebwa.

¹² Amaghanga kamaala gaawulira bwemwaswala, buli muntu yaabawulira nga mulira amaziga. Abalwani baabandagana beene na beene, boonaboona baagwa ghansi.

Okwidha kwa Nebukadinezzari

¹³ Kyabazinga Nebukadinezzari ow'e Babilonia bwe yaidha okulumba Misiri, Musengwa Katonda yayogera ninze. Yankoba ati:

¹⁴ “Mulangirire mu nsi Misiri ni mu bibuga byamu, Migidoli, Menfisi, ni Tahapanhesi, muti, ‘Mwetegeke okwerwanaku. Byonabyona bye muli nabyo baja kubizikiriza mu lutalo.

¹⁵ Lwaki Apisi katonda waimwe ow'amaani yagwa? Lwa kuba Musengwa Katonda yamukuba yaamugwisa ghansi.’

¹⁶ Abalwani baimwe baagangalima baagwa, buli muntu yaakoba mwine ati, ‘Situka, tuje eka y'abantu baife, tulumuke empiima y'omuzigu.’

¹⁷ Mutuume kyabazinga wa Misiri eriina eiyaaka muti ni, ‘Kyasiikano, ayasiikana obwasiikane. Eyaleka omukisa gwe ni guja obuje gutyo.’

¹⁸ Nze Musengwa Katonda Afuga Amagye, ninze kyabazinga, era ninze Katonda omulamu. Ng'olusozi Tabori bwe lweruupiise ghaigulu okusinga ensozi edhindi dhoonadhoona, era ng'olusozi Karumeli bwe lugungumaire ku mbali kw'enhandha, n'amaani g'oyo aja okubalumba imwe gatyo bwe galisinga ag'omuntu owundi yeenayeena.

¹⁹ Imwe abantu b'e Misiri, mwetegeke okutwalibwa mu bunhage. Abazigu balizikiriza Menfisi kyafuuka bifulukwa, ghaabulagho omuntu akibaamu.

²⁰ Ensi Misiri eri ng'oti n'ente ento eboneka obulungi, erumbiibwa ekisukuma ekiviire ku luuyi olw'omukono omugooda olw'e buvandhuba.

²¹ N'abalwani ba Misiri abapangise boona bali bw'agho batyo, ng'oti n'ente entototo empiite ensavu, ghazira kye basobola kukola. Baalemwa okwesimbagho okulwana, boonaboona baakyuka baalumuka bulumuke; kuba olunaku lwaibwe olw'okubonerezebwa lwali lutuuse, era nga n'olunaku lwaibwe olw'okuzikirira.

²² Abamisiri baalumukagho nga badhwira ng'oti musota, ng'eigye ery'abazigu liri kuseeta. Abazigu balibalumba n'empasa ng'oti n'abantu abaja okutema emiti,

²³ baatema ekibira kya Misiri, waire nga kizibirivu inho. Kuba eigye ery'abazigu abo lirimu abalwani kamaala inho abatabalika, abasinga n'enzige obungi.

²⁴ Ndita abantu b'e Misiri mu ngalo dh'abantu ab'oku luuyi olw'omukono omugooda olw'e buvandhuba, baabaghangula. Olwo naaleetera Abamisiri abo okuswazibwa. Nze Musengwa Katonda, ninze nkobye.”

²⁵ Musengwa Katonda Afuga Amagye, Katonda wa Isiraeli, akoba ati: “Nja kubonereza Amoni katonda ow'ekibuga Thebesi, ghalala n'ensi Misiri yoonayoona ni bakatonda baayo, era ni bakyabazinga baayo. Nja kutoola kyabazinga wa Misiri n'abo abamwesiga,

²⁶ mbagheeyo y'abo abenda okubaita, mbate mu ngalo dha kyabazinga Nebukadinezzari ow'e Babilonia n'eigye lye. Aye nga ghabiseeghooku entangama, abantu baliirayo baaba mu Misiri nga bwe baalinga eira. Nze Musengwa Katonda, ninze nkobye.”

Musengwa Katonda asuubiza okununula abantu be

²⁷ “Aye imwe abantu bange Abaisiraeli, mutatya, waire okweraliikirira. Mubone eno, nze ndibanunula naabatoola mu nsi eyo ey'eghala, ensi ye muli ng'abasibe. Muliira ewaimwe mwatyama mwatereera nga muli mu miraala, era nga ghazira kibatiisa naire.

²⁸ Ndi ghalala n'imwe era ndidha kubalokola. Ndidha kuzikiriza amaghanga goonagoona ye nabasansaaniza. Aye imwe tija kubazikiriza. Waire nga tija kubaleka buleke agho nga tibabonereiza, aye era ndibabonereza ekigwaniire nga mbasaasira. Nze Musengwa Katonda, ninze nkobye.”