Yeremia 43 - Baibuli Ekibono kya Katonda 2014

Yeremia bamutwala e Misiri

¹ Bwe namala okukobera abantu ebyo byonabyona Musengwa Katonda waibwe bye yantuma okubakobera,

² Azaria mutabane wa Hoshaia, ni Yohanani mutabane wa Karea, n'abasaadha abandi abeetwala okuba aba ghaigulu, bankoba bati: “Oli kulimba. Musengwa Katonda waife tiyakutuma iwe kwidha kutukoba tulobe kuja mu Misiri kuba eyo.

³ Aye Baruku mutabane wa Neria n'akupikiriiza otute mu ngalo dh'Abababilonia, basobole okutwita oba okututwala e Babilonia mu bunhage.”

⁴ Kale Yohanani, n'abakulu ab'ebikunsu eby'abaisirukale boonaboona, era n'abantu abandi boonaboona, baaloba kugondera kiragiro kya Musengwa Katonda eky'okusigala mu Buyudaaya.

⁵ Era Yohanani n'abakulu ab'ebikunsu eby'abaisirukale boonaboona, baatwala e Misiri abantu boonaboona abaali basigaire mu Buyudaaya, ghalala n'abo boonaboona abaali baize okuva mu maghanga ye baali basansaaniire.

⁶ Mu abo mwalimu abasaadha, n'abakazi, n'abaana, ni baghala ba kyabazinga, n'abantu abandi boonaboona Nebuzaradani omukulu w'abaisirukale Abababilonia, be yali agemiisa Gedalia okubalabirira. Era mu abo baatwaliramu ni Baruku, ninze.

⁷ Kale baadheemera batyo ekiragiro kya Musengwa Katonda, baaja e Misiri era baatuukira irala ere mu kibuga ekyetebwa Tahapanhesi.

⁸ Bwe twali nga tuli eyo e Tahapanhesi, Musengwa Katonda yankoba ati:

⁹ “Toola amabaale amanene ng'abandi ku Bayudaaya babona, ogaziike ogakweke mu nkokoto, ghansi agh'amabaale ge baayaliira agali gha mulyango ogw'ekisaagaati kya kyabazinga ekya ghano e Tahapanhesi.

¹⁰ Memale obakobe oti nze Musengwa Katonda Afuga Amagye, Katonda wa Isiraeli, ndyetesa ghano omugheereza wange Nebukadinezzari kyabazinga ow'e Babilonia. Yaidha yaata ekityamo kye eky'obwakyabazinga ghano ku mabaale gano ge nziise, era yaagasimbaku ni weema ye ey'obwakyabazinga.

¹¹ Nebukadinezzari oyo aliidha yaalwanisa Misiri era yaagighangula. Abo abaategekerwa okufa endwaire ya kawumpuli balifa endwaire ya kawumpuli, abo abaategekerwa okutwalibwa mu busibe balitwalibwa mu busibe, n'abo abaategekerwa okufiira mu lutalo balifiira mu lutalo.

¹² Ndikunaania omuliro ku masabo aga bakatonda b'e Misiri, era kyabazinga w'e Babilonia alyokya bakatonda abo, oba yaababbeeda yaaja nabo. Era ng'omwayi bw'alondalonda ensekere ku kivaalo kye n'adhimaliraku irala, ni kyabazinga w'e Babilonia atyo bw'alirondalonda buli kantu mu nsi Misiri, n'agitukuza. Memale yaatambula yaaja nga ghazira n'amukobaku.

¹³ Kyabazinga oyo alimenhamenha empango dh'amabaale edh'ebiidhukizo edhiri e Heliopoli mu nsi Misiri, era yaayokya n'amasabo ga bakatonda baayo.”