Yeremia 41 - Baibuli Ekibono kya Katonda 2014

¹ Mu mwezi ogwomusanvu mu mwaka gwene ogwo, Ishimaeli mutabane wa Nethania era mwidhukulu wa Elishama, nga wa ku lulyo lulangira era nga n'owundi ku bakungu ba kyabazinga abakologho, yaaja n'abantu ikumi eri Gedalia e Mizipa. Bwe baali eyo nga bali kuliira ghalala emere,

² Ishimaeli ni bale eikumi be yaidha nabo, baasituka, baasowolayo empiima dhaibwe baita Gedalia, kyabazinga w'e Babilonia ye yali aghaire okufuga ensi eyo.

³ Ishimaeli era yaita n'Abayudaaya boonaboona abaali ni Gedalia e Mizipa, n'abaisirukale Abababilonia abaali agho mu kiseera ekyo.

⁴ Olunaku olwairirira, nga kikaali kumanhikana nga batemwire Gedalia,

⁵ abasaadha kinaana baatuuka nga bava e Shekemu, n'e Shilo, n'e Samaria. Baali basazeeku ebirevu byaibwe, nga bakanwire ebivaalo byaibwe, era nga beesazesaze n'emisale ku mubiri. Baali baleese emere ey'empeke n'obubbaani mu isinzizo, ng'ebigheebwayo.

⁶ Agho Ishimaeli yava e Mizipa, yaaja okubasangaaza ng'ali kulira amaziga. Bwe yabatuukaku yaabakoba ati: “Mukole muje mungire, mubone ku Gedalia.”

⁷ Olwangira mu kibuga bati, nga Ishimaeli n'abasaadha be yali nabo baatoolera okubaita, nga bwe basuula emirambo gyaibwe mu nsulo.

⁸ Aye mu abo mwalimu abasaadha ikumi abaakoba Ishimaeli bati: “Tukweghembye otatwita! Tuli n'engaano, ni sayiri, n'omuzigo ogw'ebibala eby'emiti emyoliva, n'omudheenene ogw'endhuki, era twabikwese mu nimiro.” Kale abo yaabaleka, yaaloba kubaita.

⁹ Ensulo Ishimaeli ye yasuulamu emirambo egy'abasaadha be yaita, yali nga n'ere enene kyabazinga Asa owa Buyudaaya ye yasima, bweyalumbibwa kyabazinga Baasha owa Isiraeli. Ishimaeli yaidhuza ensulo eyo emirambo.

¹⁰ Agho baghala ba kyabazinga n'abantu abandi abaali bakaasigairegho e Mizipa, Nebuzaradani omukulu w'abaisirukale be yali agemiisa Gedalia abalabirire, Ishimaeli yaabatwala ng'abasibe, yaasimbira ku luuyi olw'ekiketezo kya Ammoni.

¹¹ Agho Yohanani mutabane wa Karea, n'abakulu ab'ebikunsu eby'abaisirukale boonaboona be yali nabo, baawulira obutemo obwo Ishimaeli bwe yakola.

¹² Kale baaja n'abalwani baibwe boonaboona, baamubingirira era baamwagaana kumpi n'ekidiba ekinene ekiri e Gibeoni.

¹³ Abantu Ishimaeli be yali ali kutwala ng'abasibe, bwe baabona Yohanani n'abakulu ab'ebikunsu eby'abaisirukale boonaboona be yali nabo, baasangaala

¹⁴ era baakyuka baalumuka okwira ye bali.

¹⁵ Aye Ishimaeli n'abasaadha be munaana, baalumukira mu kiketezo kya Ammoni, baawona.

¹⁶ Agho Yohanani n'abakulu ab'ebikunsu eby'abaisirukale boonaboona be yali nabo, baalabirira abantu Ishimaeli be yali atoire e Mizipa ng'abasibe, ng'amaze okutemula Gedalia. Mu abo mwalimu, abaisirukale, n'abakazi, n'abaana, n'abagheereza. Kale baabaiza okuva e Gibeoni.

¹⁷ Baaja baabaaku e Geruthi Kimuhamu, okumpi n'e Bethelehemu nga beetegeka okuja e Misiri.

¹⁸ Baayenda okuja e Misiri olw'okutya Abababilonia, kuba Ishimaeli mutabane wa Nethania yatemula Gedalia mutabane wa Ahikamu, kyabazinga w'e Babilonia ye yali aghaire okufuga Buyudaaya.