Yeremia 40 - Baibuli Ekibono kya Katonda 2014

Yeremia asigala ni Gedalia

¹ Agho Musengwa Katonda yaayogera ninze, nga Nebuzaradani omukulu w'abaisirukale amaze okunsibulula mu ikomera e Rama. Eyo baali bantwaireyo nga bansibye ku ndhegere, ghalala n'abantu boonaboona abaatoolebwa mu Yerusalemu ni mu Buyudaaya nga bali kutwalibwa e Babilonia mu bunhage.

² Omukulu w'abaisirukale oyo yandhiza gha mbali, yankoba ati: “Musengwa Katonda wo yeesoomera okuleetera ensi eno okuzikirira.

³ Era mperaano akituukiriiza kye yakoba okukola. Ebyo byonabyona bibairegho, lwa kuba abantu bo baakola ebibi eri Musengwa Katonda era baamudheemera.

⁴ Bona, mperaano ndi kukusibululaku endhegere dhino ku mikono obe wa idembe. Bw'oba oyenda okuja ninze e Babilonia, idha tuje, era ndidha kukulabiriranga bulungi. Aye bw'oba toyenda kuja, otaidha. Bona, ensi yoonayoona eri agho ekuteegereire. Londaku gh'oyenda okuja woonawoona, oje.”

⁵ Agho yankoba ati: “Bw'oba ng'onaasigala, irayo ye Gedalia mutabane wa Ahikamu era mwidhukulu wa Shafani, kyabazinga w'e Babilonia ye yagha okufuga Buyudaaya. Osobola okusigala n'oyo, olwo waaba ng'osigaire mu bantu be bataatwala Babilonia mu bunhage, oba okuja aghandi woonawoona gh'oyenda okuja.” Agho omukulu w'abaisirukale oyo yampa eby'okulya era yampa n'ekirabo, memale yandeka naaja.

⁶ Naaja ye Gedalia e Mizipa, naabanga eyo ghalala naye mu bantu be bataatwala Babilonia mu bunhage.

Gedalia omufuzi wa Buyudaaya

⁷ Ghaaligho abandi ku bakulu mu magye ga Buyudaaya n'abaisirukale baibwe abaali mu irungu, nga bakaali kweghaayo kwira ku luuyi lwa kyabazinga w'e Babilonia. Bwe baawulira nga kyabazinga w'e Babilonia aghaire Gedalia mutabane wa Ahikamu okufuga ensi yaibwe n'abantu boonaboona abasembayo okuba abaavu abataatwalibwa Babilonia mu bunhage, baidha eri Gedalia oyo e Mizipa.

⁸ Abaidha baali bano: Ishimaeli mutabane wa Nethania, ni Yohanani mutabane wa Karea, ni Seraia mutabane wa Tanhumethi, ni batabane ba Efai ow'e Netofa, ni Yezania mutabane w'omusaadha ow'e Maaka. Era baidha nga bali ghalala n'abaisirukale baibwe.

⁹ Gedalia yaabalayirira ghalala n'abaisirukale baibwe, ng'akoba ati: “Mutatya kugheereza Bababilonia. Imwe musigale mu nsi eno mugheereze bugheereze kyabazinga w'e Babilonia, byonabyona biidha kubajiira bukalamu.

¹⁰ Nze mwene ndidha kuba e Mizipa nsobole okuboogereragho imwe nga Abababilonia baidhie ye tuli. Aye imwe muje mube mu byalo byaimwe, musoloze era mutereke omwenge ogw'emizabbibu, n'ebibala eby'ekyengera, n'omuzigo ogw'ebibala eby'emiti emyoliva.”

¹¹ Mu nsambo n'endala, Abayudaaya abandi abaali mu Moabu, ni mu Ammoni, ni mu Edomu, ni mu nsi edhindi, baawulira nga kyabazinga ow'e Babilonia yaganha Abayudaaya abandi okusigala mu Buyudaaya era nga Gedalia ni ye yabagha okubafuga.

¹² Kale baava eyo yoonayoona ye baali basansaaniire, baira mu Buyudaaya. Baaja e Mizipa ye Gedalia era baasoloza omwenge ogw'emizabbibu n'ebibala eby'ekyengera kamaala.

Gedalia bamutemula

¹³ Agho Yohanani mutabane wa Karea, n'abakulu ab'abaisirukale abaali mu irungu abaaloba okweghaayo okwira ku luuyi lwa kyabazinga w'e Babilonia, baidha ye Gedalia e Mizipa.

¹⁴ Baakoba Gedalia bati: “Oidhi nga kyabazinga Baalisi owa Ammoni yatuma Ishimaeli aidhe akutemule?” Aye Gedalia yaaloba kukiikiriza.

¹⁵ Agho Yohanani yaamukoba mu kyama ati: “Ka nje ndhite Ishimaeli, ghazira aidha kumanha amwise. Lwaki tumuganha okukutemula? Ekyo kiidha kuleetera Abayudaaya boonaboona abeesololeza ghano gh'oli okusansaana, era kireeta akabi ku abo abaasigala mu Buyudaaya boonaboona.”

¹⁶ Aye Gedalia yaamwiramu ati: “Otakikola. Ebyo bye muli kwogera ku Ishimaeli ti bituufu naire.”