Yeremia 4 - Baibuli Ekibono kya Katonda 2014

Katonda ayeta Abaisiraeli beenenie

¹ Musengwa Katonda akoba ati: “Imwe Abaisiraeli, oba nga bwene mwenda okukyuka, mukyuke mwire ye ndi. Bwe mutoolagho ebyenhinhalwa byaimwe bye musinza, ni mugumira ku nze aghazira kudaaliima naire,

² era ni muba abatuufu nga mulayira mu mazima era nga muli beesimbu, muti, ‘Nga Musengwa Katonda bw'ali omulamu.’ Olwo amaghanga gaidha kunsabanga ngaghe enkabi, era gampenga ekitiibwa.”

³ Musengwa Katonda akoba abantu b'omu Buyudaaya n'ab'omu Yerusalemu, ati: “Mulime enimiro dhaimwe edhaawuumuzibwaku okulimwa, mutasiga nsigo mu mawa.

⁴ Mukuume endagaano ye mwakola ninze, nze Musengwa Katonda, era mwegheeyo ye ndi, imwe abantu b'omu Buyudaaya n'ab'omu Yerusalemu, ekiruyi kyange kirobe kutumbuka ng'oti n'omuliro omuntu gw'atasobola kuzikiza, olw'ebibi bye mwakola.”

Buyudaaya bagyesoomera okugirumba

⁵ Mulangirire mu Buyudaaya ni mu Yerusalemu, mukobe abantu muti: “Mufuuwe amagwala mu kiketezo ekyo, mwete abantu n'amaani, muti, ‘Mwesoloze, mwidhe tuje tulumukire mu bibuga ebyezungulwirwa ebimante ebigumu.

⁶ Mughanike bendera nga mugiringiriiza e Sioni, mulumuke mwewonie aghazira kugayaala naire; kuba Musengwa Katonda aja kuleeta akabi n'okuzikirira okunene einho, okuva ku luuyi olw'omukono omugooda olw'e buvandhuba.

⁷ Azikiriza amaghanga aviireyo, aviireyo ng'oti mpologoma eva mu kisaka kyayo. Aidhie okufafaagania ensi yaimwe; ebibuga byaimwe biidha kufuuka bifulukwa byereere, nga biziramu bantu babibaamu.

⁸ Kale ni muvaale ekutiya olw'enaku, mulire amaziga era muwowoole; kuba Musengwa Katonda akaatusungughaliire ekibitiriire.’ ”

⁹ Musengwa Katonda akoba ati: “Ku lunaku olwo, kyabazinga n'abakungu baliwaamu amaani. Bakabona balisoberwa inho, n'abalanzi beewuunhia inho.”

¹⁰ Agho naakoba nti: “Wo Musengwa Katonda waife, walimbalimba abantu bano ab'e Yerusalemu, waabakoba oti, ‘Mwidha kubanga mu miraala,’ ng'ate empiima dhiseese okubasaaniagho!”

¹¹ Mu kiseera ekyo balikobera abantu abo ab'e Yerusalemu, bati: “Ghaligho empewo ebabula eri kufuuwa ng'eva ghaigulu ku nsozi edhiziraku kantu edh'omu irungu, ng'eri kwidha ye muli. Aye nga ti n'empewo ey'empolampola efuuwa ebiwusu ku ngaano enkube.

¹² Eno eidha kuba ya maani okusingagho. Nze Musengwa Katonda mwene ninze nja okusalira abantu bange omusango.”

Abazigu beezungulwire Buyudaaya

¹³ Bona, abazigu baabale bali kwidha ng'oti bire. Ebigaali byaibwe eby'omu lutalo birumuka ng'oti mpewo eyeezungulula n'amaani bw'eidha; n'embalaasi dhaibwe dhiziinhuuka okusingaku n'enkookooma. Tukagwireku ife era tuzikiriire!

¹⁴ Imwe ab'e Yerusalemu, munaaze emyoyo gyaimwe mugimalemu ebibi, memale mulokolebwe. Mulituusa li okubanga n'ebirowoozo ebibi mu myoyo gyaimwe?

¹⁵ Ghaligho abakwenda abaviire mu kibuga Dani ni mu nsozi dh'omu Efuraimu, okulangirira akabi akali kwidha.

¹⁶ Baidhie okulabula amaghanga n'okukobera ab'omu Yerusalemu, bati: “Musengwa Katonda akoba ati abazigu bali kwidha nga bava mu nsi ey'eghala. Balirangirira olutalo ku bibuga bya Buyudaaya.

¹⁷ Balizingizanga Yerusalemu okukyezunguluza, ng'oti n'abakuuma enimiro bwe bakola, kuba abantu baamu bandheemera. Nze Musengwa Katonda, ninze nkobye.

¹⁸ Imwe Abayudaaya, niimwe beene abeereetera ebyo, olw'ensambo ye mwebisangamu n'ebintu bye mwakolanga. Ebibi byaimwe n'ebyabaleetera okudaagadaaga okwo, era bibafumitiire irala ku mwoyo.”

Enaku egema Yeremia olw'abantu be

¹⁹ Obulumi bwe ndi nabwo bwenda bwa kundhita! Omwoyo guunumirira era gwampakukapakuka! Kino tisobola kukisirikira, kuba mpulira amagwala agali kuvuga, n'enduulu edh'olutalo.

²⁰ Akabi oluba okuvaagho kati ng'akandi kairagho; ensi yoonayoona efuuse bifulukwa byereere. Okuja okutemya n'okuzibula nga weema dhaife badhizikiriiza, nga n'ensuubo dhaamu badhikanwirekanwire mu kaseera buseera.

²¹ Ndituusa li okulingiriranga bendera dh'olutalo, n'okuwuliranga okuvuga okw'amagwala?

²² Musengwa Katonda akoba ati: “Abantu bange basiru tibandidhi naire. Basiru ng'oti bwa baana bato; baziramu kutegeera naire. Bakugu mu kukola ebibi, aye tibaidhi kukola birungi.”

Yeremia abonekerwa okuzikirira okuli kwidha

²³ Nalingirira ensi, naabona nga ndhereere era nga ntabuletabule; ate naalinga ku igulu nga kuzira kyaka naire.

²⁴ Nalingirira ensozi, naabona nga dhiri kutengeeta, n'obusozi bwonabwona nga buli kwewuubira eno n'ere.

²⁵ Naalingirira nti, naabona nga ghaziragho muntu naire omulala ati; nga n'enhonhi dhoonadhoona dhigulwike dhaaja.

²⁶ Naalingirira nti, naabona ng'ensi eyali engimu efuuse irungu; nga n'ebibuga byamu babizikiriiza byafuuka bifulukwa byereere. Kuba Musengwa Katonda yabasungughalira ekibitiriire.

²⁷ Musengwa Katonda akoba ati: “Ensi eyo yoonayoona eidha kusigala agho etyo, ng'eri bwa bifulukwa byereere. Aye era tirigizikiriza yoonayoona kuwaagho.

²⁸ ‘Ekyo kirireetera ensi okulira, ni ku igulu kwairugala; kuba nze kye ndhogeire tiidha kukikyusaamu naire, era kye nsazeegho tiidha kukivaaku naire.’

²⁹ Abantu b'omu bibuga oluliwulira empindo dh'abavuzi b'embalaasi n'edh'abalasa obusaale, ng'olwo boonaboona balumukamu. Abandi balyekuba mu bibira, ate abandi baniina ghaigulu mu gabaalebaale. Ebibuga byonabyona birisigala bwagho bityo nga biziramu bantu naire.

³⁰ Iwe Yerusalemu ye balekuliire obwagho, obwo bwene okuvaala ebivaalo eby'ebitiibwa ebya kasaayisaayi oba otegeeza ki, era n'okuvaala amadholobera aga zaabu oba otegeeza ki? Lwaki osiiga amaiso go langi okugalungiya? Weewoomeza bwereere! Abo be weegonzanga nabo buti bakunhooma bunhoome, era benda na kukwita.

³¹ Mpuliire okusinda ng'oti n'okw'omukazi ali kulumwa okuzaala, era naawulira okwana ng'oti n'okw'omukazi ali kuzaala omwana we omuberi. Okwo n'okulira kwa Yerusalemu ali kusika omuuka nga tigwidha, n'ayandhuluza emikono ng'akoba ati: ‘Nkagwireku nze! Abatemo bali kwenda kundhita!’”