Yeremia 38 - Baibuli Ekibono kya Katonda 2014

Yeremia bamusuula mu nsulo eziramu maadhi

¹ Agho Shefatia mutabane wa Mattani, ni Gedalia mutabane wa Pashuhuri, ni Yehukali mutabane wa Shelemia, ni Pashuhuri mutabane wa Malakia, baawulira nga nkobera abantu nti:

² “Musengwa Katonda akoba ati, ‘Omuntu yeenayeena anaasigala mu kibuga kino aidha kwitirwa mu lutalo, oba okufa endhala, oba okufa endwaire ya kawumpuli. Aye anaakifuluma ni yeeghaayo eri Abababilonia, aidha kuwoniagho obulamu bwe.’

³ Era naakobera abantu nti Musengwa Katonda akoba ati, ‘Bwenebwene nze Musengwa Katonda nja kughaayo ekibuga kino eri Abababilonia bakigeme.’ ”

⁴ Agho abakungu baaja ye kyabazinga, baamukoba bati: “Omusaadha ono bamwite bwite, kuba ensambo y'ali kwogeramu emala mu baisirukale amaani abali mu kibuga kino, era n'abantu abandi abakaasigaire mu kibuga kino. Tali kukolerera bulungi bwa bantu bano, aye ali kubaitaitana bwitaitane.”

⁵ Kyabazinga Zedekia yairamu ati: “Wuuyo ali mu ngalo dhaimwe, nze tiidha kubalobera.”

⁶ Kale bangema bantwala, bandhisa n'emigugha mu nsulo eyali mu luya olw'ekisaagaati kya kyabazinga, nga mwene yo n'omulangira Malakia. Ensulo eyo tiyaliimu maadhi, aye yalimu bwa bitosi. Era naadimira mu bitosi omwo.

⁷ Agho Ebedimeleki Omwethiopia omulaawe, eyagheerezanga mu kisaagaati kya kyabazinga, yaawulira nga bantaire mu nsulo. Mu kiseera ekyo, kyabazinga yali atyaime ku gwetebwa Omulyango gwa Benjamini ng'ali mu lwekobaano.

⁸ Kale Ebedimeleki oyo yaaja y'ali, yaamukoba

⁹ ati: “Isebantu kyabazinga, abantu bano bakoze bubi inho. Bataire Yeremia mu nsulo mw'aidha okufiira endhala, kuba mu kibuga timukaali mere.”

¹⁰ Agho kyabazinga yaalagira Ebedimeleki afuneyo abasaadha basatu, baidhe bantooleyo mu nsulo nga nkaali kufa.

¹¹ Ebedimeleki yaaja n'abasaadha abo mu iterekero ery'omu kisaagaati kya kyabazinga, yaatoolayo ebigoye ebikaire ebikanufukanufu, yaabinsuulira mu nsulo ng'akozesa emigugha.

¹² Yankoba ati: “Toola ebigoye ebyo obizingirire mu nkwagha dho, emigugha girobe kukusala.” Zeena naakola ntyo.

¹³ Bampaluza bantoolayo mu nsulo. Era baamala bankuumira mu luya olw'ekisaagaati kya kyabazinga.

Zedekia yeebuuza ku Yeremia amughe ku magezi

¹⁴ Agho kabiri kyabazinga Zedekia yandhetesa bantwale ye yali ku mulyango ogwokusatu ogw'eisinzizo. Bwe natuukayo yankoba ati: “Nja kukubuuza ekibuuzo, era nhenda onkobere amazima geene nga tolekaayo.”

¹⁵ Naamwiramu nti: “Isebantu kyabazinga, bwe nnaakukobera amazima oidha kundhita bwite. Era ni bwenaakugha amagezi toidha kumpulirisa.”

¹⁶ Kyabazinga Zedekia oyo yandayirira mu kaama ati: “Nga Musengwa Katonda bw'ali omulamu, Katonda oyo eyatugha obulamu, tiidha kukwita waire okukughaayo y'abo abenda okukwita.”

¹⁷ Agho naamukobera nti: “Musengwa Katonda Afuga Amagye, Katonda wa Isiraeli, akoba ati, ‘Bwoneeghaayo eri abakungu ba kyabazinga w'e Babilonia, tibaja kukwita, n'ekibuga kino tibaja kukyokya muliro. Baja kukuleka iwe n'ab'omu maka go musigale nga mukaali balamu.

¹⁸ Aye bw'onaaloba okweghaayo eri abakungu ba kyabazinga w'e Babilonia, Musengwa Katonda aja kughaayo ekibuga kino eri Abababilonia bakyokye omuliro, era n'iwe weena olobe kubawona.’ ”

¹⁹ Aye kyabazinga yairamu ati: “Nze ntya Bayudaaya banaife abaamala okweghaayo ni baira ku luuyi lw'Abababilonia. Abababilonia basobola okumpaayo eri Abayudaaya abo bandeetera okulumizibwa nga bandaazadaaza.”

²⁰ Nze naamukoba nti: “Abababilonia tibaidha kukuwaayo eri Bayudaaya abo. Nkweghembye gondera obukwenda bwa Musengwa Katonda bwe ndi kukukobera, olwo byonabyona biidha kukujiira bukalamu era baidha kukuleka osigale ng'okaali mulamu.

²¹ Aye bw'onaaloba okweghaayo, bino n'ebija okukutuukaku Musengwa Katonda bye yandholeka mu kubonekerwa:

²² Mu kubonekerwa okwo nabona abakazi boonaboona abaali basigaire mu kisaagaati kya kyabazinga wa Buyudaaya, ng'abaisirukale bali kubatwalira abakungu ba kyabazinga w'e Babilonia. Era nga bali kuja bwe bakoba bati, ‘Bakagwa ba kyabazinga be yeesiganga n'abaamubuzaabuza, baamuwubisawubisa; mpegaano bwe baboine ng'atubiire mu bitosi bamulekuliire bw'agho.’ ”

²³ Agho naayongeraku kino nti: “Abaisirukale baja kutoola bakazi bo boonaboona n'abaana bo, babatwale e Babilonia. N'iwe mwene toja kubawona, baja kukugema bakugheeyo eri kyabazinga w'e Babilonia, n'ekibuga kino bakyokye omuliro.”

²⁴ Agho Zedekia yankoba ati: “Otamanhisaaku muntu yeenayeena ku bibono ebyo, olwo ezira kabi kanaakutuukaku.

²⁵ Abakungu bwe banaawulira nga ndhogeire n'iwe, baidha kwidha bakubuuze kye twogeire, nga bakusuubiza obutakwita bw'onaabakobera byonabyona.

²⁶ Aye iwe bakobe bukobe oti obaire oli kuneeghemba ndobe kukwizaayo kukusibira mu ndhu ya Yonathani, na kufiira eyo.”

²⁷ Agho abakungu boonaboona baidha bambuuza, era zeena naabakobera byenebyene kyabazinga bye yankoba okubakoba. Kale bandeka, ghazira muntu yawuliraku bye twayogera.

²⁸ Agho nze bankuumira mu luya olw'ekisaagaati kya kyabazinga, okutuusa ku lunaku abazigu lwe baagema Yerusalemu.