Yeremia 36 - Baibuli Ekibono kya Katonda 2014

Baruku asoma enzingo y'ekitabo mu isinzizo

¹ Mu mwaka ogwokuna nga Yehoiakimu mutabane wa Yosia ni kyabazinga wa Buyudaaya, Musengwa Katonda yankoba ati:

² “Toola enzingo y'ekitabo oghandiikemu ebintu byonabyona bye nkukobeire ebigema ku Isiraeli, ni ku Buyudaaya, ni ku maghanga agandi goonagoona. Ghandiika ebintu byonabyona bye mbairenga nga nkukobera okuviira irala ku lunaku lwe natoolera okwogera n'iwe, nga Yosia ni kyabazinga, okutuusa olwaleero.

³ Oba katyo abantu b'omu Buyudaaya bwe baliwulira ku kuzikirira okwo kwonakwona kwe ndi kutegeka okubasindikira, balikyuka baava mu mpisa dhaibwe embi. Olwo naabasonigha olw'obubi bwaibwe n'ebibi bye bakola.”

⁴ Kale naayeta Baruku mutabane wa Neria. Naayogeranga, eno nga bw'aghandiika mu nzingo y'ekitabo bye ndhogera, ebyo byonabyona Musengwa Katonda bye yankoba.

⁵ Agho naagha Baruku oyo ebiragiro bino nti: “Nze tibakandhikiriza kuja mu isinzizo.

⁶ Kale nhenda iwe ojeeyo ku lunaku abantu lwe baba mu kusiiba. Agho osome enzingo y'ekitabo eyo, abantu boonaboona abali mu isinzizo bawulire bukalamu ebyo byonabyona Musengwa Katonda bye yankoba, era bye ndhogeirenga eno nga bw'obighandiika. Oidha kusoma ebintu ebyo nga n'abantu ab'omu Buyudaaya abava mu bibuga byaibwe ebindi bali kuwulira.

⁷ Oba katyo balitoolera okusabanga Musengwa Katonda, era baakyuka baaleka empisa dhaibwe embi, kuba Musengwa Katonda yeesoomeire okukola ku bantu abo mu busungu n'ekiruyi ebitaloodheka.”

⁸ Kale Baruku yaasomera ebibono bya Musengwa Katonda mu isinzizo, mu nsambo yeene nga bwe namukoba asome.

⁹ Mu mwezi ogwomwenda ogw'omwaka ogwokutaanu nga Yehoiakimu ni kyabazinga wa Buyudaaya, baalangirira ekisiibo olw'okusaba Musengwa Katonda. Abantu boonaboona ab'omu Yerusalemu, n'abo boonaboona abaidha nga bava mu bibuga eby'omu Buyudaaya ebindi, baasiiba.

¹⁰ Agho Baruku yaasoma, ng'abantu boonaboona bali kuwulira, ebyali mu nzingo y'ekitabo bye namukoba okughandiika. Yabisomera mu isinzizo, ng'ali mu kisenge kya Gemaria mutabane wa Shafani era omughandiisi. Ekisenge ekyo kyali ghaigulu gh'oluya olw'eisinzizo, kumpi n'ogwetebwa Omulyango Omuyaaka ogw'eisinzizo.

Enzingo y'ekitabo bagisomera abakungu

¹¹ Agho Mikaia mutabane wa Gemaria era mwidhukulu wa Shafani, yaawulira Baruku ng'asoma mu nzingo y'ekitabo ebyo Musengwa Katonda bye yakoba.

¹² Yaaja mu kisaagaati kya kyabazinga, mu kisenge eky'omughandiisi abakungu boonaboona ye baali nga batyaime: Elishama omughandiisi, ni Delaia mutabane wa Shemaia, ni Elinathani mutabane wa Akabori, ni Gemaria mutabane wa Shafani, ni Zedekia mutabane wa Hanania, n'abakungu abandi boonaboona.

¹³ Mikaia yaabakobera byonabyona bye yawulira nga Baruku asomera abantu.

¹⁴ Agho abakungu abo baatuma Yehudi mutabane wa Nethania, era nga mwidhukulu wa Shelemia, era nga mwidhukulu wa Kushi, aje akobe Baruku abaleetere enzingo y'ekitabo ye yasomera abantu. Baruku yaagibaleetera.

¹⁵ Bamukoba bati: “Tyama otusomere ebiri mu nzingo y'ekitabo eyo.” Baruku yaabibasomera.

¹⁶ Bwe baamala okubiwulira byonabyona, baalingaganaku nga batiire, era baamukoba bati: “Ebyo tuli n'okubikobera kyabazinga.”

¹⁷ Agho baabuuza Baruku bati: “Aye tukobere, wasobola otya okughandiika ebyo byonabyona? Yeremia n'eyabikukoberanga, eno nga bw'obighandiika?”

¹⁸ Baruku yairamu ati: “Yeremia n'eyabinkoberanga, eno nga bwe mbighandiika ni bwino mu nzingo eno ey'ekitabo.”

¹⁹ Agho baamukoba bati: “Iwe ni Yeremia muje mwegise, mulobe kuganha muntu yeenayeena kumanha ghe muli.”

Kyabazinga ayokya enzingo y'ekitabo

²⁰ Abakungu baata enzingo y'ekitabo mu kisenge kya Elishama omughandiisi. Baamala baaja mu luya lwa kyabazinga, era baakobera kyabazinga byonabyona.

²¹ Kyabazinga yaatuma Yehudi okunona enzingo y'ekitabo eyo. Yehudi yaaja yaagitoola mu kisenge kya Elishama, yaagisomera kyabazinga n'abakungu boonaboona abaali beemereire agho okumwezungulula.

²² Gwali mwezi gwa mwenda, nga kyabazinga atyaime mu ndhu ye y'abaamu mu biseera eby'ekiinhogogo, ng'ali kwota muliro.

²³ Agho Yehudi bwe yamalanga okusoma ebitundu ebibiri oba ebina ku nzingo y'ekitabo eyo, nga kyabazinga abisalaku n'akambe akatono, ng'abisuula mu muliro. Yaakola atyo okutuusa enzingo y'ekitabo yoonayoona bweyawaagho okuya.

²⁴ Aye k'abe kyabazinga mwene, oba abakungu be abaawulira ebyo nga bisomebwa, tighaaligho naire omulala ati eyatya oba eyakanulamu ebivaalo bye okwoleka nga bw'anakughaire.

²⁵ Era waire nga Elinathani, ni Delaia, ni Gemaria beeghemba kyabazinga alobe kwokya nzingo ya kitabo eyo, kyabazinga oyo tiyabawulirisa naire.

²⁶ Agho yaalagira omulangira ayetebwa Yerahameeli ghalala ni Seraia mutabane wa Azarieli, ni Shelemia mutabane wa Abudeeli, batugeme nze n'omughandiisi wange Baruku. Aye Musengwa Katonda yaatugisa.

Yeremia aghandiisa enzingo y'ekitabo eyindi

²⁷ Nga kyabazinga Yehoiakimu amaze okwokya enzingo y'ekitabo omwali bye nayogeranga eno nga Baruku bw'abighandiika, Musengwa Katonda yankoba ati:

²⁸ “Toola enzingo y'ekitabo eyindi, oghandiikeku byonabyona ebyali ku nzingo y'ekitabo ere, kyabazinga Yehoiakimu owa Buyudaaya ye yayokya.

²⁹ Era kyabazinga oyo omukobe oti, ‘Wayokya enzingo y'ekitabo era waabuuza Yeremia lwaki yaghandiika ati kyabazinga ow'e Babilonia aliidha yaazikiriza ensi eno, era yaita abantu baamu n'ensolo dhaamu.’

³⁰ Kale ni, nze Musengwa Katonda nkukoba iwe kyabazinga Yehoiakimu nti toliba na mwidhukulu yeenayeena alifuga bwakyabazinga bwa Daudi. Omulambo gwo baligusuula kuliya, akasana kaagwokya omusana ate empewo ey'ekiinhogogo yaagufuuwa obwire.

³¹ Ndikubonereza iwe, n'abaana bo, ni baidhukulu bo, n'abakungu bo, olw'ebibi mwenamwena bye mukola. Ndibaleetaku akabi ke neesoomera okubatuusaaku imwe, n'abantu b'omu Yerusalemu, n'ab'omu Buyudaaya, kuba nabalabula aye mwaloba kufaayo naire.”

³² Agho naatoola enzingo y'ekitabo eyindi, naagigha omughandiisi wange Baruku. Yaaghandiika bire byonabyona, bye nayogeranga eno nga bw'abighandiika, ebyali mu nzingo y'ekitabo kyabazinga Yehoiakimu ye yayokya. Era ku ebyo yaayongeraku n'obukwenda obundi obufaanana n'obwo.