Yeremia 35 - Baibuli Ekibono kya Katonda 2014

Yeremia ayogera n'Abarekabu

¹ Yehoiakimu mutabane wa Yosia bwe yali nga ni kyabazinga wa Buyudaaya, Musengwa Katonda yankoba ati:

² “Yeremia, ja y'ab'ekika kya Rekabu oyogere nabo. Memale obatwale mu kisenge ekindi ku ebyo ebiri ku isinzizo, obaghe ku mwenge ogw'emizabbibu banhwe.”

³ Kale naatoola ab'ekika kya Rekabu boonaboona: Yaazania mutabane wa Yeremia atali nze aye mutabane wa Habazzinia, ni baganda be, ni batabane baibwe boonaboona,

⁴ naabatwala mu isinzizo. Agho naabaingiza mu kisenge ky'abeegeresebwa ab'omulanzi ayetebwa Hanani mutabane wa Igadalia. Ekisenge ekyo kyali ghaigulu gh'ekisenge kya Maaseia mutabane wa Shallumu eyakuumanga omulyango gw'eisinzizo. Era nga kiri kumpi n'ebisenge eby'abakungu abandi ab'omu isinzizo.

⁵ Agho naata ensugha n'ebikopo mu maiso g'Abarekabu abo, nga biidhwire omwenge ogw'emizabbibu, era naabakoba nti: “Munhwe.”

⁶ Aye bairamu bati: “Ife titwidha kunhwa mwenge gwa mizabbibu, kuba dhaadha waife Yonadabu mutabane wa Rekabu, yatukoba ife beene, n'abaana baife, era ni baidhukulu baife, obutanhwanga mwenge gwa mizabbibu.

⁷ Ekindi yatukoba obutazimbanga ndhu, n'obutalimanga nimiro, oba okusimbanga amasamba g'emizabbibu, waire okugagula obugule. Yatulagira tusulenga mu weema buliidho, olwo tusobole okusigala nga tukaali mu nsi eno mwe tuli ng'abasenze.

⁸ Kale tugondera ebyo byonabyona dhaadha waife Yonadabu bye yatulagira. Ife beene, ni bakazi baife, ni batabane baife, era ni baghala baife, titunhwera irala ku mwenge gwa mizabbibu naire.

⁹ Era titwezimbira ndhu dha kubangamu, waire okuba n'amasamba g'emizabbibu, oba enimiro, oba ensigo.

¹⁰ Aye tusula mu weema, era tugondera byonabyona Yonadabu dhaadha waife bye yatulagira.

¹¹ Aye kyabazinga Nebukadinezzari ow'e Babilonia bwe yaidha n'alumba ensi eno, ife twasalagho okwidha e Yerusalemu nga tulumuka amagye ag'Abababilonia n'ag'Abasiria. Kale n'okuba nti buti tuba mu Yerusalemu.”

¹² Agho Musengwa Katonda yankoba ati:

¹³ “Yeremia, Nze Musengwa Katonda Afuga Amagye, Katonda wa Isiraeli nkulagiire oje obuuze abantu b'omu Buyudaaya n'ab'omu Yerusalemu ensonga lwaki baloba okuwulira bye mbalagira ni bye mbagalagira.

¹⁴ Baidhukulu ba Yonadabu mutabane wa Rekabu baagondera ekiragiro kya Yonadabu oyo eky'obutanhwanga mwenge gwa mizabbibu. Era ni ye buli eno tibagunhweraku irala naire. Aye imwe nze buliidho mbakoba aghazira kukoogha naire, aye mwaloba kumpulirisa.

¹⁵ Buliidho mbaire ntumanga ye muli abagheereza bange abalanzi aghazira kukoogha naire, babakobe mulekere okukola ebibi, mukole ebituufu. Era mulobe kujiiranga ku bakatonda abandi nga mubasinza, olwo musobole okusigalanga mu nsi ye nabagha imwe ni badhaadha baimwe. Aye nga imwe timumpulirisa, waire okufaayo ku bye nkoba.

¹⁶ Baidhukulu ba Yonadabu mutabane wa Rekabu baagondera ekiragiro dhaadha waibwe kye yabagha, aye abantu imwe mwadheema okukola bye mbalagira.

¹⁷ Kale ni, nze Musengwa Katonda Afuga Amagye, Katonda wa Isiraeli, nja kutuusa abantu b'omu Buyudaaya n'ab'omu Yerusalemu ku kuzikirira, nga bwe nabeesoomera eira. Kino nja kukikola lwa kuba nayogera n'imwe aye mwaloba kumpulirisa, era naabeeta aye mwaloba kunvugira.”

¹⁸ Agho naakobera ab'ekika kya Rekabu nti: “Musengwa Katonda Afuga Amagye, Katonda wa Isiraeli, akoba ati, ‘Mwagondera ebyo dhaadha waimwe Yonadabu bye yabakoba okukola, era mwajiira ku ebyo byonabyona bye yabalagira ni bye yabagalagira.

¹⁹ Kale ni, nze Musengwa Katonda Afuga Amagye, Katonda wa Isiraeli, nsuubiza nti buliidho ghaidha kubangagho omusaadha ku baidhukulu ba Yonadabu mutabane wa Rekabu, anampeerezanga.’ ”