Yeremia 34 - Baibuli Ekibono kya Katonda 2014

Obukwenda Musengwa Katonda bwe yagheereza Zedekia

¹ Agho Musengwa Katonda yaayogera ninze, mu kiseera kyabazinga Nebukadinezzari owa Babilonia, n'eigye lye, era n'amagye ag'amaghanga agandi goonagoona ge yali afuga, nga bali kulumba Yerusalemu n'ebibuga ebindi ebyali okumpi agho.

² Musengwa Katonda, Katonda wa Isiraeli yankoba nje nkobe kyabazinga Zedekia owa Buyudaaya nti Musengwa Katonda akoba ati: “Bona, nze Musengwa Katonda, Katonda wa Isiraeli nja kughaayo ekibuga kino mu ngalo dha kyabazinga ow'e Babilonia, era aja kukyokya omuliro.

³ Era iwe kyabazinga Zedekia weena toliwona. Balikugema baakutwala ye kyabazinga w'e Babilonia oyo, waayogera naye nga mubonagana maiso ku maiso. Era balimala baakutwala e Babilonia.

⁴ Iwe Zedekia, wulirisa bye nja okukukoba ebikugemaku: Tibalikwitira mu lutalo.

⁵ Olifa bya bulungi mu miraala. Era ng'abantu bwe baaniosanga obubbaani nga baziika badhaadha bo abaali bakyabazinga okukusooka, weena batyo bwe balikuniokeza obubbaani. Baja kukulira nga bakoba bati, ‘Wo Kyabazinga waife atufiireku!’ Nze Musengwa Katonda, ninze nkobye.”

⁶ Kale nze naaja, naakobera kyabazinga Zedekia obukwenda obwo ng'ali mu Yerusalemu.

⁷ Mu kiseera ekyo eigye lya kyabazinga w'e Babilonia lyali lirumbye ekibuga ekyo Yerusalemu, era nga lirumbye n'ebibuga Lakishi ni Azeka, ebyali nga ni byonka ebyali bikaasigairegho mu Buyudaaya ebyezungulwirwa ebimante ebigumu.

Abaisiraeli balekula abairu mu buguya

⁸ Kyabazinga Zedekia yaisania n'abantu ab'omu Yerusalemu ku ky'okulekula abairu babe ba idembe.

⁹ Buli muntu yali n'okulekula abairu be Abaheburayi abasaadha n'abakazi babe ba idembe, ghabule omuntu aba ni Muisiraeli mwine ng'omwiru.

¹⁰ Kale abantu boonaboona n'abakulembeze baibwe, baisania okulekula abairu baibwe abasaadha n'abakazi babe ba idembe, era nga tibakairayo kabiri kubafuula bairu. Agho baabalekula.

¹¹ Aye ate baamala baakyusa ekirowoozo, baiza abairu abo be baali balekwire, era bairamu okubakozesa obwiru kabiri.

¹² Agho Musengwa Katonda, Katonda wa Isiraeli yankoba nkobere abantu nti:

¹³ “Nze Musengwa Katonda nakola endagaano ni badhaadha baimwe, bwe nabatoola mu nsi Misiri ye mwabanga nga muli bairu. Naabakoba nti,

¹⁴ ‘Buli ku nkomerero y'emyaka omusanvu, mwidha kulekulanga Baheburayi banaimwe be mwagula ng'abairu, babe ba idembe, nga bamaze okubagheereza okumala emyaka omukaaga.’ Aye badhaadha baimwe abo baaloba kumpulirisa waire okugondera kye nabakoba.

¹⁵ Ghano dhuuzi imwe mwakola ekyansanhusa, mwakyusa ekirowoozo, mwalangirira okulekula Baisiraeli banaimwe abairu babe ba idembe, era mwakola endagaano mu maiso gange mu isinzizo lino eryange lyene.

¹⁶ Aye kabiri mwakyusa ekirowoozo mwayonoona eriina lyange. Mwaiza abairu abo be mwali mulekwire okuja nga ba idembe nga bwe benda, mwairamu okubakozesa obwiru kabiri.

¹⁷ Nze Musengwa Katonda nkoba nti mwandheemera mwaloba kugha Baisiraeli banaimwe idembe lyaibwe. Kale ni mubone eno, nze ndidha kubagha imwe eidembe ery'okufiira mu lutalo, n'ery'okufa endwaire ya kawumpuli, n'ery'okufa endhala. Ndidha kubafuula ekintu ekitiisa einho abantu boonaboona ku nsi.

^18-19 Abakungu b'omu Buyudaaya n'ab'omu Yerusalemu, n'abagheereza b'omu kisaagaati kya kyabazinga, n'abantu abandi boonaboona abaakola ninze endagaano nga babita ghagati gh'emamba ey'ente ento enume ye baasalamu aghabiri, aye ni bamala batatuukiriza ndagaano eyo, zeena ndibasalamu nga bwe baasala mu mamba ey'ente eyo.

²⁰ Ndibaghaayo mu ngalo dh'abazigu baibwe abenda okubaita, era emirambo gyaibwe giriba mere ya nhonhi, na ya nsolo dha mu nsiko.

²¹ Era ndighaayo kyabazinga Zedekia owa Buyudaaya n'abakungu be mu ngalo dh'abazigu baibwe abenda okubaita. Ndibaghaayo eri eigye lya Babilonia, waire nga lyalekera okubalumba.

²² Nze Musengwa Katonda ndiragira Abababilonia baira okulumba ekibuga kino, era baakirwanisa baakigema, baakyokya omuliro. Ebibuga eby'omu Buyudaaya ndibifuula bifulukwa byereere, ghaabulagho omuntu abibaamu. Nze Musengwa Katonda, ninze nkobye.”