Yeremia 33 - Baibuli Ekibono kya Katonda 2014

Ebindi Musengwa Katonda bye yasuubiza abantu

¹ Bwe baali nga bakansibiire mu luya lw'ekisaagaati kya kyabazinga, Musengwa Katonda yayogera ninze kabiri.

² Musengwa Katonda oyo n'eyakola ensi, n'agiwumba era n'agitengeka mu kifo kyayo. Era eriina lye, ni Musengwa Katonda. Agho yankoba ati:

³ “Bw'onandheta nze Musengwa Katonda, ndidha kukuvugira era nkukobere ebintu ebyewuunhisa ebyagisibwa by'otaidhi.

⁴ Nze Musengwa Katonda, Katonda wa Isiraeli nkoba nti endhu edh'omu Yerusalemu n'ekisaagaati kya bakyabazinga ba Buyudaaya, bija kumenhebwagho. Nga kino kiidha kuva ku bazigu abaja okubunga emungo dh'eitaka edh'okuniiniraku ekibuga Yerusalemu nga bakirumba.

⁵ Abababilonia bali kwidha okulwana, baidhuze endhu edho n'ekisaagaati ekyo emirambo egy'abo be nja okwita mu busungu n'ekiruyi. Ekibuga kino nkirekuliire agho olw'ebikolwa ebibi abantu baamu bye bakola.

⁶ Aye bona eno, ndiizaagho ekibuga kino bukalamu era naakireetera okuwona. Abantu baamu ndibaleetera okuba mu miraala kamaala, ng'ebintu bibajiira bukalamu.

⁷ Abantu b'omu Buyudaaya n'ab'omu Isiraeli ndibaleetera ebintu okwiramu okubajiiranga obukalamu. Ndiiramu okubazimba babe nga bwe baalinga eira.

⁸ Ndibanaazaaku ebibi byaibwe byonabyona bye baakola ye ndi, naabasonigha ensobi dhaibwe n'obudheemu bwaibwe.

⁹ Ekibuga kino Yerusalemu kirindeetera eisanhu n'ekitiisa era kyaneesiimisa. Amaghanga goonagoona ag'omu nsi galitya era gaadhugumira nga baboine nga bwe nkolera abantu b'omu Yerusalemu ebirungi, era nga bwe mbaleetera ebintu okubajiira obukalamu.”

¹⁰ Musengwa Katonda akoba ati: “Abantu bakoba bati ekifo kino kiri ng'oti irungu, era bati kiziramu bantu bakibaamu waire ensolo. Era batuufu okukoba batyo, kuba ebibuga eby'omu Buyudaaya biziramu bantu, n'enguudo edh'omu Yerusalemu nkalu. Ghazira bantu babaamu waire nsolo dhibaamu. Aye mu bifo ebyo oliiramu okuwulira

¹¹ emizira egy'abali mu binhumo ni mu kusagamba, n'egy'abo abali mu mbaga edh'obugole. Era oliwulira abantu abemba nga bali kuleeta ebigheebwayo olw'okwebaza mu isinzizo lyange, nga bakoba bati, ‘Mwebaze Musengwa Katonda Afuga Amagye, kuba Musengwa Katonda oyo mulungi. Okugonza kwe tikukoma, kubaagho byanda na byanda.’ Ndiizaagho ebirungi mu nsi eno, ebe nga bwe yalinga okusooka. Nze Musengwa Katonda, ninze nkobye.”

¹² Musengwa Katonda Afuga Amagye akoba ati: “Ensi eno eri ng'oti irungu, eziramu bantu waire ensolo, eriiramu okubaamu ebyayiro abaayi mwe batwala ensolo dhaibwe okuliira.

¹³ Abaayi baliiramu kabiri okubaliranga ebyayo byaibwe mu bibuga eby'omu biketezo eby'oku nsozi, n'eby'omu biketezo eby'omu biiko, n'eby'omu biketezo bya Buyudaaya ebikalukalu ebiri ku luuyi olw'omukono omusaadha olw'e buvandhuba, ni mu biketezo bya Benjamini, ni mu byalo ebyezungulwire Yerusalemu, ni mu bibuga eby'omu Buyudaaya. Nze Musengwa Katonda, ninze nkobye.”

¹⁴ Musengwa Katonda yaakoba ati: “Bona, ekiseera kiri kwidha ntuukirize ekisuubizo kye nasuubiza abantu ab'omu Isiraeli n'ab'omu Buyudaaya.

¹⁵ Mu kiseera ekyo nditaagho omuntu omutuufu, nga mwidhukulu wa Daudi, yaaba kyabazinga. Kyabazinga oyo alikola amazima n'ebituufu mu nsi.

¹⁶ Abantu b'omu Buyudaaya n'ab'omu Yerusalemu balirokolebwa baaba mu miraala. Era ekibuga ekyo balikyeta eriina ‘Musengwa Katonda n'obulokozi bwaife.’

¹⁷ Nze Musengwa Katonda nsuubiza nti buliidho ghaidha kubangagho omuntu ku baidhukulu ba Daudi, anaabanga kyabazinga wa Isiraeli.

¹⁸ Era buliidho ghaidha kubangagho bakabona ab'omu kika kya Levi abanampeerezanga, nga baghaayo ebigheebwayo ebyokebwa, n'ebigheebwayo eby'emere ey'empeke, n'emisengo.”

¹⁹ Musengwa Katonda yankoba ati:

²⁰ “Nakola endagaano n'omusana era naakola endagaano n'obwire, nti bibengagho mu kiseera kyabyo ekituufu, era endagaano eyo ghazira asobola kugimenhagho.

²¹ Era ntyo bwe nkoze endagaano n'omugheereza wange Daudi, nti buliidho ghaidha kubangagho omuntu ku baidhukulu be anaabanga kyabazinga. Era naakola endagaano nti buliidho ghaidha kubangagho bakabona ab'omu kika kya Levi abanampeerezanga. Era endagaano edho ghazira asobola kudhimenhagho.

²² Ng'emuunienie edh'oku igulu bwedhitabalika, era ng'omusenho ku mbali kw'enhandha bwe gutapimika, zeena ntyo bwe ndireetera baidhukulu ba Daudi omugheereza wange, ni bakabona ab'omu kika kya Levi, okuba abangi einho.”

²³ Musengwa Katonda yankoba ati:

²⁴ “Yeremia, oboine abantu bwe bali kukoba bati nalekulira agho abantu ab'omu Isiraeli n'ab'omu Buyudaaya, endhu edho eibiri dhe nalonda? Kale banhooma abantu bange abo baaloba kubatwala ng'eighanga.

²⁵ Aye nze Musengwa Katonda nakola endagaano n'omusana era naakola endagaano n'obwire, nti bibengagho mu kiseera kyabyo ekituufu. Era endagaano eyo ghazira asobola kugimenhagho.

²⁶ Kale ni ng'endagaano eyo bw'etasobola kumenhebwagho, zeena ntyo bwe ntalisobola kulekulira agho baidhukulu ba Yakobo n'aba Daudi omugheereza wange, ni ntalonda owundi ku baidhukulu be afugenga baidhukulu ba Aburahamu, n'aba Isaaka, n'aba Yakobo. Bwenebwene ndigemerwa abantu bange ekisa, naabaleetera ebintu byairamu okubajiiranga obukalamu.”