Yeremia 32 - Baibuli Ekibono kya Katonda 2014

Yeremia agula ekibandha

¹ Musengwa Katonda yayogera ninze mu mwaka ogweikumi (10) nga Zedekia ni kyabazinga wa Buyudaaya, era ng'ogwo n'ogwali omwaka ogweikumi n'omunaana (18) nga Nebukadinezzari ni kyabazinga wa Babilonia.

² Mu kiseera ekyo, eigye erya kyabazinga w'e Babilonia lyali lirumbye Yerusalemu, nga likizingiiza okukyezunguluza. Era nga nze bansibiire mu luya lw'ekisaagaati kya kyabazinga.

³ Kyabazinga Zedekia n'eyalagira bansibe kuba nalanga nti Musengwa Katonda yakoba ati: “Nja kuleka kyabazinga w'e Babilonia ageme ekibuga kino.

⁴ Ni kyabazinga Zedekia yeena taliwona, balimutwala ye kyabazinga w'e Babilonia oyo, yaayogera naye nga babonagana maiso ku maiso.

⁵ Zedekia balimutwala e Babilonia yaaba eyo okutuusa lwe ndisalagho eky'okumukolera. Ni bw'anaagezaaku atya okulwanisa Abababilonia taja kubaghangula. Nze Musengwa Katonda, ninze nkobye.”

⁶ Agho Musengwa Katonda yankoba ati:

⁷ “Bona eno, muganda wo Hanameli azaalibwa lata wo omuto Shallumu, aidha kwidha y'oli akusabe omuguleku ekibandha kye ekiri mu Anathothi mu kiketezo kya Benjamini kuba niiwe amuliku oluganda einho era niiwe ali n'obukumu okukigula kibe ekikyo.”

⁸ Agho, nga Musengwa Katonda bwe yankoba, Hanameli yaidha ye nali mu luya olw'ekisaagaati kya kyabazinga, yansaba mmuguleku ekibandha kye. Agho naategeera nga bwene Musengwa Katonda n'eyayogera ninze.

⁹ Kale naagula ekibandha ekyo ku Hanameli, naamusasula empiiya edhigheza ebitundu bya feeza ikumi na musanvu.

¹⁰ Naata omukono ku ndagaano, twagisibaku akamanhiso okugikakasa, era naayeta n'abadhulizi baabagho. Agho twapima feeza oyo ku minzaani.

¹¹ Agho naagema endagaano eyo ye twasibaku akamanhiso, eyalimu ebyo bye twaisaniaku ng'amateeka bwe galagira. Era naagema ni kopi etali nsibe ye twakoopolola ku ndagaano eyo,

¹² byombi naabigemya Baruku mutabane wa Neria era nga mwidhukulu wa Mahaseia. Naabimugemya nga ghaligho Hanameli, n'abadhulizi abaata ku ndagaano eyo emikono, era n'abantu abaali batyaime mu luya olw'ekisaagaati kya kyabazinga.

¹³ Era naakoba Baruku, ng'abo boonaboona bawulira, nti:

¹⁴ “Musengwa Katonda Afuga Amagye, Katonda wa Isiraeli, akulagiire otwale endagaano dhino dhombi, ere ye twasibaku akamanhiso n'ere kopi yaayo etali nsibe ye twagikoopololaku, oje obite mu kasugha bisobole okukuumibwa emyaka n'emyaka.

¹⁵ Musengwa Katonda oyo Afuga Amagye, Katonda wa Isiraeli, akobye ati endhu, n'ebibandha, n'amasamba g'emizabbibu, biriiramu kabiri okugulwa mu nsi eno.”

Yeremia asaba Musengwa

¹⁶ Bwenamala okugha Baruku endagaano ey'okugula ekibandha, naasaba nti:

¹⁷ “Aa, Musengwa Katonda wange, niiwe owatonda eigulu n'ensi ng'okozesa obuyinza bwo obungi n'amaani go agataloodheka. Ghazira kintu kikalangufu inho iwe ky'otasobola.

¹⁸ Ogonza enkumi n'enkumi edh'abantu aghazira kulekera, aye ate weesasuuliza ku baana olw'ebibi by'abazaire baibwe. Oli Katonda mukologho era ow'amaani. Niiwe Musengwa Katonda Afuga Amagye.

¹⁹ Okola entegeka edh'amagezi agataloodheka, era waakola eby'amaani. Obona ebintu byonabyona abantu bye bakola, era waabasasulamu ng'ojiira ku bikolwa byaibwe.

²⁰ Wakola ebyewuunhio n'ebyewuninkiriza mu Misiri, era ni ye buli eno okaabikola mu Isiraeli, ni mu maghanga agandi goonagoona. Kale kyaba nti buli ghantu bakwidhi.

²¹ Watoola abantu bo Abaisiraeli mu Misiri ng'okozesa amaani go agataloodheka. Waakola ebyewuunhio n'ebyewuninkiriza, era waaleetera ebintu ebitiisa einho okubaagho.

²² Waabagha ensi eno engimu era erimu ebirungi kamaala, nga bwe wasuubiza badhaadha baibwe.

²³ Aye bwe baatuuka mu nsi eno ni bagitwala n'eba eyaibwe ku bwaibwe, tibaagondera biragiro byo, waire okwebisa nga bwe wabagalagira. Ghazira kye baakolaku ku ebyo bye wabalagira okukola. Kale ni, iwe n'okubaleetaku okuzikirira kuno kwonakwona.

²⁴ Bona, Abababilonia babunze ku kibuga emungo ey'eitaka ey'okuniiniraku, nga benda bakirumbe bakigeme. Olw'okuba ghaligho olutalo, n'endhala, n'endwaire ya kawumpuli, Abababilonia abo baidha kusobola okugema ekibuga kino. Era obona nga bye wakoba byonabyona bituukiriire.

²⁵ Aye ate iwe Musengwa Katonda waife, niiwe wandagira okugula ekibandha nga ghaligho n'abadhulizi, waire nga Abababilonia bali kumpi kugema ekibuga.”

²⁶ Agho Musengwa Katonda yankoba ati:

²⁷ “Bona eno, nze ninze Musengwa Katonda, Katonda w'abantu boonaboona. Ghazira kintu kikalangufu inho nze kye ntasobola.

²⁸ Nja kugha kyabazinga Nebukadinezzari ow'e Babilonia n'eigye lye, ekibuga kino bakigeme.

²⁹ Baidha kukikunaaniaku omuliro bakyokye kyonakyona, ghalala n'endhu edho abantu mwe bansungughalizanga nga baniokeza obubbaani ghaigulu ku busolya bwadho nga babuniokereza omusambwa Baali, era nga bafukira bakatonda baibwe ebigheebwayo eby'okunhwa.

³⁰ Abantu b'omu Isiraeli n'ab'omu Buyudaaya, okuviira irala mu mainhama ag'ebyafaayo byaibwe, tibansiimya naire olw'ebikolwa byaibwe, era bansungughaza busungughaze mu bye bakola.

³¹ Abantu b'omu kibuga kino bansungughaza ebitaloodheka okuviira irala ekibuga kino lwe baakizimba. Kale nsazeegho okukizikiriza,

³² olw'ebibi byonabyona abantu b'omu Isiraeli n'ab'omu Yerusalemu bye baakola. Baakola ebibi ghalala ni bakyabazinga baibwe, n'abakulembeze baibwe, ni bakabona baibwe, era n'abalanzi baibwe.

³³ Nze nga bankuba bwa nkoone, baaloba kukyukira ye ndi. Era waire nga nabagalagiranga aghazira kukoogha naire, aye nga tibenda kuwulirisa beege.

³⁴ Baatoola emisambwa gyaibwe egyenhinhalwa, baagita mu isinzizo lyange, baalyonoona.

³⁵ Era baaja baazimbira omusambwa Baali ebifo ebigulumivu eby'okusinzizaamu, mu kyetebwa Ekiiko ekya mutabane wa Hinnomu, baayokeranga okwo batabane baibwe ni baghala baibwe n'omuliro. Ate nga nze tibalagirangaku kukola kintu kyenhinhalwa ekyo, waire okukirowoozaaku obulowooze mu mwoyo gwange. Kale baaleetera abantu b'omu Buyudaaya okwonoona.”

Musengwa Katonda ata mu bantu eisuubi

³⁶ Agho Musengwa Katonda, Katonda wa Isiraeli yankoba ati: “Yeremia, abantu bali kukoba bati olutalo, endhala, n'endwaire ya kawumpuli bija kuleetera ekibuga kino okugheebwayo mu ngalo dha kyabazinga w'e Babilonia. Aye mpegaano nkoba nti:

³⁷ Bona, ndidha kusoloza abantu bange okuva mu nsi dhoonadhoona ye nabasansaaniza nga mbasungughaliire ebitaloodheka, mbaize mu kifo kino era mbaleetere okukibaamu mu miraala.

³⁸ Baliba bantu bange, nze naaba Katonda waibwe.

³⁹ Ndibaleetera okweyimba ekitole era nga bali n'ekigendererwa kirala, eky'okuntaamu ekitiisa olubeerera ku lw'obulungi bwaibwe beene n'obwa baidhukulu baibwe.

⁴⁰ Ndikola nabo endagaano etaliwaagho. Tirirekeranga kubakolera birungi. Ndibaleetera okuntangamu ekitiisa n'omwoyo gwaibwe gwonagwona, babe nga tibakairayo kunvaaku.

⁴¹ Ndidha kusangaalanga okubakolera ebirungi n'okubaleetera okutyama mu nsi eno nga batereire.

⁴² “Nga bwenaleeta ku bantu bano akabi akanene katyo, era ntyo bwendibatuusaaku ebirungi byonabyona bye nabasuubiza.

⁴³ Abantu bali kukoba bati ensi eno eidha kusigala agho etyo ng'eri bwa bifulukwa byereere, ng'eziramu muntu waire ensolo, era bati eja kugheebwayo mu ngalo dh'Abababilonia. Aye abantu baliiramu kabiri okugulanga ebibandha mu nsi eno.

⁴⁴ Abantu baidha kugulanga ebibandha, batenga ku ndagaano emikono era badhisibengaku obumanhiso nga ghaligho n'abadhulizi. Ebyo biidha kubangagho mu biketezo bya Benjamini, ni mu byalo ebyezungulwire Yerusalemu, ni mu bibuga eby'omu Buyudaaya, ni mu bibuga eby'omu biketezo eby'oku nsozi, ni mu bibuga eby'omu biketezo eby'omu biiko, ni mu bibuga eby'omu biketezo bya Buyudaaya ebikalukalu ebiri ku luuyi olw'omukono omusaadha olw'e buvandhuba. Ndiizaagho abantu mu nsi yaibwe, naabaleetera ebintu kabiri okubajiiranga obukalamu. Nze Musengwa Katonda, ninze nkobye.”