Yeremia 31 - Baibuli Ekibono kya Katonda 2014

Abaisiraeli baira ewaibwe

¹ Musengwa Katonda akoba ati: “Ekiseera kiri kwidha, mbe Katonda w'ebika byonabyona ebya Isiraeli, ate beene babe bantu bange.

² Nga bakaali mu irungu nze nagemerwa ekivunika abo abaawonagho ni bataitibwa. Era Abaisiraeli abo bwe beegomba einho okuwuumulaku,

³ nze nababonekera nga ndi ghala okuva ghe baali. Imwe Abaisiraeli, nze nava ira nga mbagonza, era ndidha kweyongeranga okubagonza obutalekera.

⁴ Ndiiramu kabiri okubazimba imwe abantu bange mube eighanga eiyaaka. Muliiramu kabiri okugema obugoma bwaimwe, mwabukuba nga musagamba.

⁵ Muliiramu kabiri okusimba amasamba ag'emizabbibu ku nsozi dh'e Samaria, era abo abaligasimba balirya ku bibala ebigavaamu.

⁶ Bwenebwene ekiseera kiri kwidha, abakuumi beete nga bali ku nsozi edh'e Efuraimu bati, ‘Mwidhe tuniineniine Sioni, tuje eri Musengwa Katonda waife.’ ”

⁷ Musengwa Katonda akoba ati: “Mwembe n'amaani nga musagamba ku lwa Isiraeli. Mukubire emizira eighanga erisinga agandi goonagoona obukologho. Mwembe olwembo lwaimwe olusaaka, mulangirire muti, ‘Musengwa Katonda alokoire abantu be Abaisiraeli abaawonagho.’

⁸ Bona eno, ndibaiza okuva mu bunhage mu nsi eri ku luuyi olw'omukono omugooda olw'e buvandhuba, naabasoloza okuva eghala einho. Abatulu n'abalema, abakazi abali enda n'abali okumpi okuzaala, boonaboona baliidhira ghalala nabo. Baliira baaba eighanga eikologho.

⁹ Abantu bange baliira nga bali kulira amaziga eno nga bwe basaba, nga nze ndi kubaiza ewaibwe. Ndibabisa eri obwiga obulimu amaadhi, era naababisa mu ngira entereevu baaloba kwekontola kugwa; kuba nze, ninze lata w'Abaisiraeli, era Efuraimu ni mutabane wange omuberi.”

¹⁰ Musengwa Katonda akoba ati: “Imwe amaghanga mumpulirise, era mulangirire bye nkoba mubituuse mu biketezo eby'oku nhandha ebiri eghala, muti, ‘Musengwa Katonda mwene n'eyasansaania abantu be. Era mwene oyo n'alibasoloza, n'abakuuma ng'omwayi bw'akuuma ebyayo bye.’

¹¹ Nnunwire Abaisiraeli, naabawonia eighanga ery'amaani.

¹² Baliidha baayemba n'amaani nga basagamba ku lusozi Sioni. Era baaba basangaavu olw'ebirabo bye mbagha: engaano, omwenge ogw'emizabbibu, omuzigo ogw'ebibala eby'emiti emyoliva, entaama, n'ente. Baliba ng'oti n'enimiro efukirirwa amaadhi obukalamu, era nga tibadhulirira kintu kyonakyona.

¹³ Abaghala balisangaala baakina, n'abasaadha abakulu n'abato baasagamba. Ndibagumya, naabaleetera okuseka enseko mu kifo ky'okulira amaziga, naabaleetera eisanhu mu kifo ky'enaku.

¹⁴ Ndigha bakabona emere enhingi einho esinga bulungi, naagha n'abantu bange byonabyona bye beetaaga. Nze Musengwa Katonda, ninze nkobye.”

Musengwa Katonda agemerwa Abaisiraeli ekisa

¹⁵ Musengwa Katonda yaakoba ati: “Mu Rama yaawulikikayo amamiro ag'okugegenga n'okukuba empungu edh'amaani. Rakeli ng'agegenga olw'abaana be era nga tayenda na kusaasirwa, kuba baali nga tibakaaligho.

¹⁶ Aye nze Musengwa Katonda nkoba nti lekera agho okulira, weeyeye amaziga mu maiso. Byonabyona bye wakolera abaana bo biidha kukusasulwamu empeera, kuba baliira okuva mu nsi ey'abazigu.

¹⁷ Eriyo eisuubi mu biseera byaimwe eby'omu maiso. Abaana baimwe baliira mu nsi eyaibwe. Nze Musengwa Katonda, ninze nkobye.

¹⁸ Mpulira ab'omu Isiraeli abalira nga banakughaire, bati, ‘Wo Musengwa Katonda, twalinga ng'oti n'ensolo edhitafugibwangaku, aye iwe waatwegeresa okukugondera. Ganha otwize y'oli, kuba niiwe Musengwa Katonda waife.

¹⁹ Twakuvaaku twadaaliima, aye mangu ago twamala twenenia. Bwe watubonereza twagonda, twakoteka emitwe nga tuswaire inho. Ensoni dhaatugema twaswala, kuba twatoolera okwonoona nga tukaali bato.’

²⁰ Iwe Isiraeli, niiwe mutabane wange andeetera okusangaala, omwana ye nsinga kugonza. Waire ni bwe nkunenia, era nsigala nga nkaakulowooza, naakulumirwa omwoyo, era nakugemerwa ekivunika.

²¹ Muteegho obumanhiso ghe mubita, mumanhe engira ye mwagema nga muja. Mwire imwe Abaisiraeli, mwire ewaimwe mu bibuga bye mwavaamu.

²² Imwe abantu abatali beesigwa, mulirekera li okudaaliimira eno n'ere? Nze Musengwa Katonda ntonzeegho ekintu ekiyaaka ku nsi era nga kya ndhawulo, eky'omukazi okuba nga n'omukuumi w'omusaadha.”

Ebintu birijiiranga abantu ba Katonda bukalamu

²³ Musengwa Katonda Afuga Amagye, Katonda wa Isiraeli, akoba ati: “Bwendiiza abantu bange mu nsi yaibwe, mu Buyudaaya ni mu bibuga byayo, ni mbaleetera ebintu kabiri okubajiiranga obukalamu, baliiramu okukobanga bati, ‘Musengwa Katonda akughe enkabi iwe olusozi olutukuvu, iwe ekifo ekitukuvu Musengwa Katonda mw'aba.’

²⁴ Abantu baliba mu Buyudaaya ni mu bibuga byakyo byonabyona. Mulibaamu abalimi n'abaayi nga bali n'ebyayo byaibwe.

²⁵ Ndiizaamu amaani abo abakooye, era naigusa emere abo boonaboona abaanafugha olw'endhala.

²⁶ Agho abantu balikobanga bati, ‘Najiire naatenduka, era nzuuse nga ndhizeemu amaani.’

²⁷ “Nze Musengwa Katonda nkoba nti ekiseera kiri kwidha, ndidhuze Isiraeli ni Buyudaaya abantu n'ensolo.

²⁸ Era nga bwe nakola einho okubabonereza, n'okubaiwululagho, n'okubamenhamenha, n'okubaleetera okughangulwa, n'okubazikiriza, era ntyo bwe ndifaayo einho okubasimba n'okubazimba.

²⁹ Ekiseera ekyo bwe kirituuka abantu baliba tibakaakoba bati, ‘Abazaire baalya emizabbibu egikaagha, aye ate abaana n'abaagemwa engigina ku maino.’

³⁰ Buli anaalyanga emizabbibu egikaagha, mwene n'anaagemwanga engigina ku maino. Era buli muntu aidha kufanga lwa bibi bye mwene.”

³¹ Musengwa Katonda akoba ati: “Bona eno, ekiseera kiri kwidha nkole endagaano empyaka n'abantu ab'omu Isiraeli n'ab'omu Buyudaaya.

³² Teriba ng'oti n'ere ye nakola ni badhaadha baibwe, lwe nabagema ku mukono ni mbatoola e Misiri kuba waire nga nze nali Musengwa Katonda waibwe, aye era tibaakuuma ndagaano eyo

³³ Ekiseera ekyo bwe kirituuka, eno n'endagaano ye ndikola n'Abaisiraeli: Ndibataamu amateeka gange, naagaghandiika ku myoyo gyaibwe. Nze ndiba Katonda waibwe, beene baaba bantu bange.

³⁴ Kiriba tikikeetaagisa muntu kwegeresa mwine amanhe Musengwa Katonda, kuba boonaboona baliimanha okuviira irala ku basembayo ghansi okutuukira irala ku babbede beene. Ndibasonigha ebibi byaibwe era neerabirira irala okwonoona kwaibwe. Nze Musengwa Katonda, ninze nkobye.”

³⁵ Musengwa Katonda yataagho endhuba emuliikirirenga omusana. Era yaataagho omwezi n'emuunienie byakenga obwire. Era mwene oyo n'asiikuula enhandha n'agireetera okuwolomboka nga yeekuluumulula. Eriina lye ni Musengwa Katonda Afuga Amagye.

³⁶ Yasuubiza ati ekiseera obutonde bw'ensi kye bulimala nga buligho, era n'ekirala ekyo n'Abaisiraeli kye balimala nga bakaali ighanga.

³⁷ Nga bwekitasoboka muntu kupima igulu ghaigulu eyo, waire okuja ni yeekebeedha emisingi egy'ensi eyo ghansi, era kityo bwekitasoboka Musengwa Katonda okulekulira agho Abaisiraeli, waire nga baakola ebibi kamaala. Musengwa Katonda mwene n'akobye.

³⁸ Musengwa Katonda era akoba ati: “Ekiseera kiri kwidha bairemu okuzimba ekibuga Yerusalemu, okuva ku kituuti ekyetebwa ekya Hananeli mu bugwandhuba, okutuuka ku gwetebwa Omulyango ogw'omu Nsonda.

³⁹ Era ensalosalo yaakyo eja kweyongerayo okuva agho, eje etuuke ku kasozi Garebu, memale yeetooloole etuuke e Goa.

⁴⁰ Ekiiko kyonakyona kye baziikamu abafu era kye basuulamu n'ebikaba, n'enimiro dhoonadhoona okutuuka ku kaiga Kiduroni n'okutuuka ku gwetebwa Omulyango ogw'Embalaasi mu buvandhuba, biidha kubanga byange era nga bitukuvu. Ekibuga tikiriiramu kabiri kumenhebwagho waire okuzikirizibwa.”