Yeremia 30 - Baibuli Ekibono kya Katonda 2014

Musengwa Katonda asuubiza abantu be okubaiza eka

¹ Agho Musengwa Katonda yankoba nze Yeremia ati:

² “Ghandiika mu kitabo ebintu byonabyona bye nkukobeire,

³ kuba bona eno, ekiseera kiri kwidha lwe ndireetera abantu bange Abaisiraeli n'Abayudaaya ebintu okwiramu okubajiiranga obukalamu. Ndibaiza mu nsi ye nagha badhaadha baibwe, era bairamu okugitwala yaaba yaibwe ku bwaibwe. Nze Musengwa Katonda, ninze nkobye.”

⁴ Musengwa Katonda akoba abantu b'omu Isiraeli n'ab'omu Buyudaaya ati:

⁵ “Nawulira amamiro g'omuntu ali kudhugumira, omuntu atiire einho era azira miraala naire.

⁶ Buti sooka olowooze era weebuuze! Bwenebwene omusaadha asobola okuzaala omwana? Memale lwaki mbona buli musaadha ng'agemereire enda ye ng'oti n'omukazi ali kulumwa okuzaala? Lwaki buli muntu ayakaanhiriire?

⁷ Tukagwireku! Olunaku olutiisa einho luli kwidha, era ezira lundi lw'olugerangeraniaku. Luliba lwa bulumi ku bantu bange, aye balirubitamu baabaagho.”

⁸ Musengwa Katonda Afuga Amagye, akoba ati: “Olunaku olwo bwe lulituuka ndimenhamenha ebikoligo ebiri mu nkoto dhaibwe, era naakutulakutula n'endhegere dhe baabasiba. Tibaliiramu kabiri kuba bairu ba bamaghanga gandi.

⁹ Aye baidha kumpeerezanga, nze Musengwa Katonda waibwe, era bagheerezenga ni mwidhukulu wa Daudi ye ndibateeragho okuba kyabazinga waibwe.

¹⁰ Kale ni, imwe abantu bange Abaisiraeli, mutatya, waire okweraliikirira. Mubone eno, nze ndibanunula, naabatoola mu nsi eyo ey'eghala, ensi ye mulimu ng'abasibe. Muliira ewaimwe mwatyama mwatereera nga muli mu miraala, era nga ghazira kibatiisa naire.

¹¹ Ndi ghalala n'imwe era ndidha kubalokola. Ndidha kuzikiriza amaghanga goonagoona ye nabasansaaniza. Aye imwe tija kubazikiriza. Waire nga tija kubaleka buleke agho nga tibabonereiza, aye era ndibabonereza ekigwaniire nga mbasaasira. Nze Musengwa Katonda, ninze nkobye.”

¹² Musengwa Katonda era akoba abantu be ati: “Amabwa gaimwe tigasobola kuwonezebwa, gafuuse ga kokolo, tigawonezeka naire.

¹³ Ghazira muntu wa kubalabirira, ghazira bulezi bwa kuta ku mabwa gaimwe, era muzira isuubi lya kuwonezebwa.

¹⁴ Abo be mwakolagananga nabo baabeerabira tibakaabafaaku naire. Nze nabalumba imwe ng'oti ndi bwa muzigu waimwe, naababonereza aghazira kusaasira naire, olw'ebibi byaimwe ebingi n'olw'emisango gyaimwe egitaloodheka.

¹⁵ Mulekere agho okwemuluguunhia olw'obulumi, kuba amabwa gaimwe tigasoboka kuwonezebwa. Nababonereza ntyo olw'ebibi byaimwe ebingi, n'olw'emisango gyaimwe egitaloodheka.

¹⁶ Aye mpegaano imwe abantu bange mulobe kutya: Abo boonaboona ababaita, boona baliitibwa. Abazigu baimwe boonaboona balitwalibwa mu bunhage. Abo boonaboona ababatuntuza, boona balituntuzibwa. N'abo ababanhagaku ebyaimwe, boona balinhagibwaku ebyaibwe.

¹⁷ Ndibalongoosa mwairagho bukalamu nga bwe mwali, era naawonia amabwa gaimwe waire ng'abazigu baimwe bakoba bati, ‘Sioni kiri ng'oti n'omuntu ye baabinga adaagiradaagira eyo atyo. Ghazira akifaaku naire.’ Nze Musengwa Katonda, ninze nkobye.”

¹⁸ Musengwa Katonda era akoba ati: “Bona, ndiizaagho abantu bange, naabaiza mu nsi yaibwe, era buli maka naagagemerwa ekivunika. Ekibuga Yerusalemu baliiramu okukizimba kabiri ku kasozi kaakyo, n'ekisaagaati kyakyo baakiizaagho mu kifo kyakyo.

¹⁹ Abantu abakibaamu balyemba enhembo edh'okwebaza, baakuba emizira nga basagamba. Ndibagha enkabi beeyongera okuba abangi nga tibakendeera naire. Abantu balibaghanga ekitiibwa aghazira kunhoomebwa.

²⁰ Baliiramu okuzaala abaana kamaala nga bwe baalinga eira, n'abantu beesolozanga okusinza mu maiso gange. Era ndibonereza abo ababakiriga.

²¹ Mu ighanga lyaibwe lyene n'omuliva alibafuga; kyabazinga waibwe aliva mu beene. Ndimala kumweta memale yaaseeta ye ndi. Ghaligho akana n'aseeta ye ndi ku bubwe yenka? Nze Musengwa Katonda, ninze nkobye.”

²² Beene baliba bantu bange, nze naaba Katonda waibwe.

²³ Bona, obusungu bwa Musengwa buli ng'oti kiwunga, era buli ng'oti n'empewo ey'amaani. Empewo eyo erifuuwa nga yeezungululira ku mitwe gy'ababi.

²⁴ Era obusungu bwa Musengwa Katonda obubitirivu tibuja kwika, okutuusa ng'amaze okukola n'okutuukiriza ky'asazeegho okukola. Imwe abantu be, ekyo mulikitegeera bukalamu mu biseera eby'oluvainhuma.