Yeremia 3 - Baibuli Ekibono kya Katonda 2014

Abaisiraeli tibaali beesigwa eri Katonda

¹ Musengwa Katonda akoba ati: “Omusaadha bw'abinga mukazi we, omukazi oyo naabayira omusaadha owundi, omusaadha oyo asobola kabiri okwiza omukazi oyo? Olwo ensi eyo eba teyonooneike? Aye imwe Abaisiraeli timwali beesigwa ye ndi, mwaba ng'oti malaaya bw'aba n'abagonzi be abangi. Aye obwo mwenda kabiri kwira ye ndi?

² Mulingirire ghaigulu ku nsozi edhiziraku kantu, mubone oba nga ghaligho waire olulala ku nsozi edho, lwe mutaakoleraku bwamalaaya. Mubwama ku mbali kw'enguudo, mwateega be munaayenda nabo, ng'oti n'abanhazi b'omu irungu bwe beeteega abantu. Mwonoine ensi n'obwamalaaya bwaimwe obutakobeka.

³ Amaadhi amasambya kye gaviire ni gatagwa, n'amatoigo goona ni gasibibwa. Aye ate mwekazakaza mu maiso nga bamalaaya beene, mwaloba na kuswala.

⁴ Mpegaano muva kunkoba mbu, ‘Niiwe iseife eyatugonza okuva obuto.

⁵ Memale oja kutusungughalira byanda na byanda? Ekiruyi kyo tikija kuwaagho naire?’ Mutyo bwe mukoba, aye mwaja bwa mu maiso n'okukola ebibi nga bwe musobola.”

Abaisiraeli n'Abayudaaya bateekwa okwenenia

⁶ Yosia bwe yaba nga ni kyabazinga, Musengwa Katonda yankoba nti: “Oboine abantu abo Abaisiraeli abatali beesigwa ng'oti n'omukazi malaaya, kye baakola? Banvaaku ng'oti n'omukazi malaaya bw'ava ku iba, baajanga ku buli lusozi olugulumivu na buli ghansi mu kinsense eky'omuti omuzibirivu, baasinziza eyo.

⁷ Naalowooza nti bwe balimala okukola ebyo byonabyona, baliira ye ndi. Aye tibaamala ni baira. Ni baganda baibwe ab'omu kiketezo ky'e Buyudaaya, boona abataali beesigwa, baabibona ebyo byonabyona.

⁸ Baabona nga mminga Abaisiraeli abo naabagha n'embaluwa ebabinga, olw'obutaba beesigwa ng'oti n'omukazi malaaya. Aye ab'e Buyudaaya abo baganda b'Abaisiraeli, tibaatya naire. Boona baaja buje, baafuuka abatali beesigwa ng'oti n'omukazi malaaya,

⁹ baaloba kugemwa na nsoni. Olwo baaleetera ensi okwonooneka, olw'obutaba beesigwa ye ndi, ni baja basinza obw'amabaale n'emiti.

¹⁰ Era ng'ebyo byonabyona bimaze okubaagho, Abayudaaya abo abataali beesigwa era baganda ba Abaisiraeli, baaloba okukyuka okwira ye ndi n'omwoyo gwaibwe gwonagwona. Aye beefuula bwefuule okuba ng'abakyuse. Nze Musengwa Katonda, ninze nkobye.”

¹¹ Agho Musengwa Katonda yankoba ati: “Waire nga Abaisiraeli tibaali beesigwa ye ndi, aye beeyoleike ng'omusango ogwaibwe mutono ku gw'Abayudaaya abo abaguya.

¹² Kale ja olangirire bino eri Abaisiraeli oti, ‘Imwe Abaisiraeli abatali beesigwa, Musengwa Katonda akoba ati mwire y'ali. Taidha kubalingirira na bukambwe, kuba mwene asaasira. Era taidha kubasungughalira byanda na byanda.

¹³ Aye mwikirize nga muli n'omusango olw'okudheemera nze Musengwa Katonda waimwe, ni mweghaayo okusinza bakatonda abagwira buli ghansi mu kinsense eky'omuti omuzibirivu. Era mwaloba kumpulira na kugondera biragiro byange. Nze Musengwa Katonda, ninze nkobye.

¹⁴ Imwe abantu abatali beesigwa, mwire ye ndi, kuba ninze musengwa waimwe. Ndidha kutoolanga omuntu mulala mulala okuva mu buli kibuga, era ntoole abantu babiri babiri okuva mu buli maka, mbaleete e Sioni.’ ”

¹⁵ Musengwa Katonda era akoba ati: “ ‘Ndidha kubaghanga abakulembeze abakola bye nhenda, babalabirirenga nga baidhwire okumanha n'okutegeera, ng'oti n'omwayi bw'alabirira ebyayo bye.

¹⁶ Bwe mulizaalagana ni mweyongera okuba abangi mu nsi eyo, olwo abantu baliba tibakaayogera ku Sanduuku ya Ndagaano ya Musengwa kuba baliba tibakaagirowoozaaku waire okugiidhukira. Tighalibaagho muntu awulira mule ng'agyetaaga ebeegho, era tibaja kukolayo yindi kabiri.

¹⁷ Mu kiseera ekyo Yerusalemu kiriba kyetebwa ekityamo eky'obwakyabazinga ekya Musengwa Katonda. Abantu abamaghanga goonagoona balyesololeza eyo okunsinza nze Musengwa Katonda, nga tibakairayo kukola ebyo emyoyo gyaibwe emikalangufu era emibi bye gyenda.

¹⁸ Mu nnaku edho abantu b'omu Buyudaaya balyeyimba ku b'omu Isiraeli, baajiira ghalala okuva mu bunhage mu nsi eri ku luuyi olw'omukono omugooda olw'e buvandhuba, baingira mu nsi ye nagha badhaadha baimwe nga yaibwe ku bwaibwe.”

Abantu ba Katonda basinza ebitali Katonda

¹⁹ “Musengwa Katonda era akoba ati: ‘Imwe Abaisiraeli, nze nayenda inho okubatwala ng'abaana abange, mbaghe ensi esanhusa era esingira irala okuboneka obulungi mu maghanga goonagoona, ebe yaimwe ku bwaimwe. Era naalowooza nti munandhetanga, Lata, mulobe kukyuka kunvaaku.

²⁰ Aye imwe bwenebwene mwakyuka mwaloba kuba beesigwa ye ndi, ng'oti n'omukazi ava ku iba n'aloba okuba omwesigwa y'ali. Nze Musengwa Katonda, ninze nkobye.’

²¹ Amamiro gawulikika ghaigulu eyo ku nsozi edhiziraku kantu. Ago n'amamiro ag'Abaisiraeli abali kulira amaziga nga beenenia, olw'okudaaliima ni bava mu ngira entuufu, ni beerabira Musengwa Katonda waibwe.

²² Musengwa Katonda akoba nti: ‘Imwe abatali beesigwa, mwire ye ndi, ndidha kubawonia mbafuule beesigwa.’ Ate imwe mukoba muti: ‘Bona eno, twidhie y'oli, kuba niiwe Musengwa Katonda waife.

²³ Okusinza kwe twasinzanga ku busozi, n'okwasiikana kwe twayasiikananga ku nsozi, bwenebwene byali bya kwerimba. Mu butuufu Musengwa Katonda waife ni yenka alokola Isiraeli.’

²⁴ “Okuva mu buto bwaife, omusambwa oguswaza n'okuswaza gujiire nga gumalagho ebintu badhaadha baife bye baafaabiikanira: embuzi dhaibwe, n'ente dhaibwe, ni batabane baibwe, ni baghala baibwe.

²⁵ Twidha kulambaala mu nsoni, okuswala kwaife kutubwike ng'oti mwebwiko kuba ife ni badhaadha baife twakola ebibi eri Musengwa Katonda waife, okuva mu buto okutuusa ni ye buli eno, twaloba kugondera Musengwa Katonda waife by'akoba.”