Yeremia 29 - Baibuli Ekibono kya Katonda 2014

Yeremia aghandiikira Abayudaaya embaluwa abaali mu Babilonia

¹ Eno n'embaluwa ye naghandiikira bakabona, n'abalanzi, n'abakulu ab'ebika, n'abantu abandi boonaboona Nebukadinezzari be yatoola e Yerusalemu, n'abatwala e Babilonia mu bunhage.

² Nagighandiika nga kyabazinga Nebukadinezzari oyo amaze okutwala mu bunhage, kyabazinga Yehoiakini, n'inhina wa Yehoiakini oyo, n'abagheereza ghalala n'abakungu b'omu kisaagaati kya kyabazinga, n'abakulembeze b'omu Yerusalemu ni mu Bayudaaya yoonayoona, n'abagheesi, n'abakugu mu mirimo egy'endhawulo.

³ Embaluwa eyo nagigemya Elasa mutabane wa Shafani ni Gemaria mutabane wa Hilikia, kyabazinga Zedekia owa Buyudaaya be yatuma ye kyabazinga Nebukadinezzari ow'e Babilonia. Embaluwa eyo yali ekoba eti:

⁴ “Musengwa Katonda Afuga Amagye, Katonda wa Isiraeli, akoba abo boonaboona be yaganha Nebukadinezzari okubatoola mu Yerusalemu n'abatwala e Babilonia mu bunhage,

⁵ ati, ‘Muzimbe endhu, mudhibeemu mutereere. Musimbe emisiri gy'emere, mulye bye mukungulamu.

⁶ Mufumbiraganwe, muzaale abaana. Muleke n'abaana baimwe boona bafumbiraganwe, bazaale abaana. Muzaale mwale eyo ye muli, mulobe kukendeera.

⁷ Mukolerere obulungi obw'ebibuga ye nabasindika mu bunhage. Mubisabirenga ye ndi, ebintu bisobole okubijiiranga obukalamu, olwo mwena ebintu biidha kubajiiranga bukalamu.

⁸ Nze Musengwa Katonda Afuga Amagye, Katonda wa Isiraeli, ndi kubalabula nti mutaganhanga balanzi ababa mu imwe kubaguya, waire omuntu owundi yeenayeena akoba ati asobola okulagula ebiri mu maiso. Mutawulirisanga birooto byaibwe bye beeroosaloosa.

⁹ Ebyo bye balagula nga bakozesa eriina lyange bya buguya, kuba nze tibatumangaku naire. Nze Musengwa Katonda, ninze nkobye.’ ”

¹⁰ “Musengwa Katonda akoba ati, ‘Emyaka ensanvu gye nagha Babilonia okubafugiramu bwe giriwaaku, imwe ndibooleka nga bwe mbalumirwa, naatuukiriza kye nasuubiza eky'okubaiza eka.

¹¹ Nze mwene zenka, ninze ndidhi kye mbategekeire imwe. Mbategekeire bintu kubajiiranga bukalamu, se ti kubajiiranga bubi. Era ndidha kubatusaaku ebyo byonabyona bye musuubira mu maiso eyo.

¹² Olwo mulindheta okubayamba era mwansaba, naabawulirisa.

¹³ Muliinoonia nze ghe ndi mwambona, kuba muliinoonia n'omwoyo gwaimwe gwonagwona.

¹⁴ Bwenebwene mulimbona, naabaleetera ebintu byairamu okubajiiranga obukalamu. Era naabasoloza okuva mu nsi dhoonadhoona ni mu bifo byonabyona mwe nababingira, naabaiza mu nsi mwe nabatoola okubasindika mu bunhage. Nze Musengwa Katonda, ninze nkobye.’

¹⁵ “Mukoba muti, ‘Musengwa Katonda yatugha abalanzi mu Babilonia.’

¹⁶ Aye muwulire Musengwa Katonda by'ayogera ku kyabazinga afuga obwakyabazinga Daudi bwe yafugaku, ni by'ayogera ku baganda baimwe ababa mu kibuga kino, abataatwalibwa ghalala n'imwe mu bunhage.

¹⁷ Musengwa Katonda oyo Afuga Amagye akoba ati, ‘Ndidha kubaleetaku entalo, n'endhala, n'endwaire ya kawumpuli, bibaite, era mbafuule ng'oti mitiini emibi einho, egitasobola na kuliibwa.

¹⁸ Ndibakiriga n'entalo, n'endhala, n'endwaire ya kawumpuli, era naabafuula ekintu ekitiisa einho abantu boonaboona ku nsi. Yoonayoona ye ndibasansaaniza baidha kubanga kintu kya kukolima, kya kwesimooza, era kya kuvuma.

¹⁹ Ebyo biribatuukaku lwa butagondera bukwenda bwe nabagheerezanga aghazira kukoogha naire, nga mbubisa mu bagheereza bange abalanzi. Aye beene baaloba kuwulira.

²⁰ Kale ni, imwe mwenamwena be nasindika mu bunhage e Babilonia muwulire nze Musengwa Katonda kye ndi kubakoba.’

²¹ “Musengwa Katonda Afuga Amagye, Katonda wa Isiraeli, bino by'ayogera ku Ahabu mutabane wa Kolaia ni ku Zedekia mutabane wa Maaseia, abaja nga babakobera imwe eby'obuguya nga bakozesa eriina lye. Akoba ati alibaghaayo mu ngalo dha kyabazinga Nebukadinezzari ow'e Babilonia, yaabaita nga mubona muti.

²² Era abantu abaatoolebwa e Yerusalemu ni batwalibwa e Babilonia mu bunhage, bwe banaayendanga okukolimira omuntu, baidha kukobanga bati, ‘Musengwa Katonda agwananga yaakukola kye yakola Zedekia ni Ahabu, kyabazinga ow'e Babilonia be yayokya mu muliro ni bafa.’

²³ Ebyo n'ebiribatuukaku kuba beereetaku omusango bwe baakola ebibi ebitakobeka mu Isiraeli. Baayenda ku baka banaibwe, era baayogera eby'obuguya nga bakozesa eriina lya Musengwa Katonda, ate nga Musengwa Katonda oyo tabatumangaku kubyogera. Musengwa Katonda mwene oyo aidhi bye baakola era mwene n'omudhulizi abalumiriza. Musengwa Katonda mwene, n'akobye.”

Embaluwa ya Shemaia

²⁴ Agho Musengwa Katonda yankoba nje nkobe Shemaia ow'e Nehelamu nti

²⁵ Musengwa Katonda Afuga Amagye, Katonda wa Isiraeli, akoba ati: Waghandiika embaluwa ku bubwo iwe mwene, waadhigheereza eri abantu boonaboona mu Yerusalemu, n'eri Zefania kabona mutabane wa Maaseia, n'eri bakabona abandi boonaboona, nga dhikoba dhiti,

²⁶ “‘Musengwa Katonda yakufuula kabona mu kifo kya Yehoiada, buti niiwe akulira eisinzizo. Mulimo gwo okubona nga buli muntu eyeeralusa ni yeefuula okuba omulanzi, bamusiba ku ndhegere era baamuta ekikoligo mu nkoto eky'ekyuma ekigumu einho.

²⁷ Aye lwaki tokoze otyo Yeremia ow'e Anathothi, ate ng'ali kukobera abantu obukwenda ng'omulanzi?

²⁸ Oteekwa okumulekeza, kuba yagheereza abantu abali mu Babilonia obukwenda obukoba buti, obunhage bwe balimu bwidha kutwala entangama. Kale, nga bali n'okuzimba endhu, badhibeemu batereere. Basimbe emisiri gy'emere, balye bye bakungulamu.’ ”

²⁹ Zefania yansomera embaluwa eyo,

³⁰ era agho Musengwa Katonda yankoba ati:

^31-32 “Gheereza abali mu bunhage boonaboona obukwenda buno obugema ku Shemaia ow'e Nehelamu, oti, ‘Nze Musengwa Katonda nja kubonereza Shemaia oyo n'abaana be era n'abaidhukulu boonaboona. Nze timutumangaku naire, aye yayogera n'imwe ng'oti se mulanzi era yaabaikirizisa eby'obuguya. Mu baidhukulu baimwe timuja kubaamu babe. Era talighangaala kutuuka ku kubona bintu birungi bye nja okukolera abantu bange, kuba yakoba abantu bandheemere nze Musengwa Katonda.’ ”