Yeremia 27 - Baibuli Ekibono kya Katonda 2014

Yeremia avaala ekikoligo ky'ente mu nkoto

¹ Bwe baali baakamala okufuula Zedekia mutabane wa Yosia abe kyabazinga wa Buyudaaya, Musengwa Katonda yankoba nze Yeremia,

² neekolereyo ekikoligo mu miti nga ngisibye n'enkoba, nkivaale mu nkoto.

³ Memale mpeereze obukwenda eri bakyabazinga bano: ow'e Edomu, n'ow'e Moabu, n'ow'e Ammoni, n'ow'e Tiro, n'ow'e Sidoni, nga mbita mu bakwenda baibwe abaidha e Yerusalemu okubona kyabazinga Zedekia.

⁴ Nkobe abakwenda ba bakyabazinga abo, bakobere bakyabazinga baibwe abo bati, Musengwa Katonda Afuga Amagye Katonda wa Isiraeli, akoba ati:

⁵ “Nze Musengwa Katonda nakozesa obuyinza bwange obungi n'amaani gange agataloodheka, natonda ensi n'abantu baamu, n'ensolo dhaamu dhoonadhoona. Era ensi eyo ngigha oyo ye mba nga nsazeegho okugigha.

⁶ Era mperaano ninze mpaire omugheereza wange, kyabazinga Nebukadinezzari ow'e Babilonia, okufuga amaghanga gano goonagoona. Era naamugha n'ensolo edh'omu nsiko dhoona dhimugheereze.

⁷ Amaghanga goonagoona galimugheereza era gaagheereza ni mutabane we ni mwidhukulu we, okutuusa ekiseera bwe kirituuka eighanga lye ni ligwa. Olwo eighanga lye lyona lyafuuka mugheereza wa amaghanga kamaala ag'amaani, agafugibwa bakyabazinga abakologho.

⁸ “Aye eighanga lyonalyona oba obwakyabazinga, abaliroba okufugibwa Nebukadinezzari, ni baloba okugonda ng'oti n'ensolo bw'egonda n'evaala mu nkoto ekikoligo kya musengwa waayo, ndibabonereza nga mbazikiriza mu ntalo era nga mbasindikira endhala n'endwaire ya kawumpuli bibaite, okutuusa lwe ndireetera Nebukadinezzari oyo okubasaanizaagho irala.

⁹ Mutajiira ku bya balanzi baimwe oba balaguzi baimwe, waire okujiira ku muntu yeenayeena abakoba ati asobola okulagula ebiribaagho ng'abita mu kuvuunula ebirooto, ni mu kukola eby'obulogo n'eby'emizimu. Abantu abo boonaboona babakoba obutaganha kyabazinga w'e Babilonia kubafuga.

¹⁰ Ebyo bye balagula bya buguya, era, imwe, birindeetera nze, okubatwala eghala einho okuva mu nsi yaimwe. Ndibabinga mu nsi yaimwe, mwaja mwazikiririra eyo.

¹¹ Aye abantu ab'eighanga, abaliganha okufugibwa kyabazinga Nebukadinezzari ow'e Babilonia, ni bagonda ng'oti n'ensolo bw'egonda n'evaala mu nkoto ekikoligo kya musengwa waayo, ndibaleka baasigala mu nsi yaibwe, baagirimamu emere era baatyama baatereera. Nze Musengwa Katonda, ninze nkobye.”

¹² Ekintu n'ekirala ekyo, kye nakoba kyabazinga Zedekia ow'e Buyudaaya nti: “Ganha kyabazinga ow'e Babilonia akufuge, ogonde ng'oti n'ensolo bw'egonda n'evaala mu nkoto ekikoligo kya musengwa waayo. Omugheereze mwene n'abantu be, memale obe omulamu.

¹³ Lwaki iwe n'abantu bo mwenda okufiira mu ntalo, oba okulambuka endhala, oba okufa endwaire ya kawumpuli? Ebyo Musengwa Katonda bye yakoba ati n'ebirituuka ku ighanga lyonalyona eririroba okufugibwa kyabazinga w'e Babilonia.

¹⁴ Mutawulirisa bya balanzi ababakoba bati, ‘Mutaganhanga kugheereza kyabazinga w'e Babilonia’. Abalanzi abo balanga bya buguya.

¹⁵ Musengwa Katonda mwene akoba ati tabatumangaku, kale ni bye balanga mu liina lye bya buguya. Era birireetera Musengwa Katonda oyo okubabinga imwe mu nsi yaimwe, mwaja mwazikiririra eyo ghalala n'abalanzi abo ababaguya.”

¹⁶ Agho naakobera bakabona n'abantu abandi nti Musengwa Katonda yakoba ati: “Mutawulirisa bya balanzi abalanga bati, ‘Mubone eno, ebintu by'eisinzizo bali kumpi okubiiza okuva e Babilonia’. Ebyo balanga bya buguya.

¹⁷ Mutawulirisa bye babakoba. Mugondere kyabazinga w'e Babilonia, olwo mwidha kuba balamu. Lwaki ekibuga kino kyandifuuse emungo edh'ebifunfugu?

¹⁸ Bwe baba nga bwenebwene balanzi, era nga bali n'obukwenda obuva ye ndi, kale bansabe nze Musengwa Katonda Afuga Amagye, ndobe kuganha bintu ebyasigala mu isinzizo ni mu kisaagaati kya kyabazinga kutwalibwa Babilonia.”

¹⁹ Musengwa Katonda Afuga Amagye akoba ati, ku bigema ku mpango, ni ku tanka, ni ku bikolo ebityamaku benseni, ni ku bintu ebikozesebwa mu isinzizo ebindi ebyasigala mu kibuga Yerusalemu,

²⁰ ebintu ebyo, kyabazinga Nebukadinezzari ow'e Babilonia by'ataatwala, lwe yatwala mu bunhage Yekonia mutabane wa Yehoiakimu kyabazinga wa Buyudaaya, n'abakungu boonaboona ab'omu Buyudaaya n'ab'omu Yerusalemu.

²¹ Musengwa Katonda akoba ati: “Muwulire bino nze Musengwa Katonda Afuga Amagye bye nkoba, ebigema ku bintu ebyasigala mu isinzizo, ni mu kisaagaati kya kyabazinga wa Buyudaaya e Yerusalemu:

²² Biidha kutwalibwa e Babilonia, era bisigale eyo okutuusa lwe ndiiramu kabiri okubirowoozaaku, ni mbiiza mu kifo kino. Nze Musengwa Katonda, ninze nkobye.”