Yeremia 26 - Baibuli Ekibono kya Katonda 2014

Yeremia bamuleeta okumuwozesa

¹ Yehoiakimu mutabane wa Yosia bwe yali nga yaakamala okufuuka kyabazinga wa Buyudaaya,

² Musengwa Katonda yankoba ati: “Yemerera mu luya olw'eisinzizo, olangirire ebyo byonabyona bye nkulagira okukobera abantu abaidha okusinza, nga bava mu bibuga bya Buyudaaya. Ghatabaagho ky'olekayo naire ekirala kiti.

³ Oba katyo banaawulira, baakyuka baalekayo empisa dhaibwe embi. Olwo nze ndidha kukyusa ekirowoozo kyange, ndobe kubakolaku kabi olw'ebikolwa byaibwe ebibi, nga bwembaire ntegeike okukola.

⁴ “Era bakobe, oti nze Musengwa Katonda mbakobye nti muteekwa okungonderanga nga mujiira ku bye nabeegeresa.

⁵ Era mutenga omwoyo ku ebyo abagheereza bange abalanzi be mbatumira buliidho, bye babakobera. Aye ate imwe timuwulirisa bye babakoba.

⁶ Era bwemutaalekere agho kubanga badheemu, nja kukola eisinzizo lino kye nakola Shilo. Olwo amaghanga goonagoona ku nsi, gaidha kukozesanga eriina ery'ekibuga kino nga gakolima.”

⁷ Bakabona, n'abalanzi, n'abantu abandi boonaboona, bampulira nze Yeremia nga nkoba ebintu ebyo mu isinzizo.

⁸ Era olwamala nti okubyogera, bangwaku bangema nga bwe baasiikana bati: “Ogwaine kwitibwa olw'ebyo by'okobye.

⁹ Lwaki olanze mu liina lya Musengwa Katonda oti eisinzizo lino lija kufuuka nga Shilo, era oti ekibuga kino kija kuzikirizibwa ghabule n'omuntu akibaamu?” Agho abantu boonaboona beesololeza ghe ndi, baaneezungulula mu isinzizo.

¹⁰ Abakungu b'omu Buyudaaya bwe baawulira ebyaligho, baayangugha okuva mu kisaagaati kya kyabazinga, baaja mu isinzizo. Baatyama mu bifo byaibwe, agho ku gwetebwa Omulyango Omuyaaka ogw'eisinzizo.

¹¹ Agho bakabona n'abalanzi baakoba abakungu n'abantu abandi boonaboona, bati: “Omusaadha ono agwaniire kumusalira gwa kumwita, kuba ayogeire bubi ku kibuga kyaife, nga mwena bwe muwuliire n'amatu agaimwe geene.”

¹² Agho naakoba nti: “Musengwa Katonda yantuma okulangirira ebyo byonabyona ebirituuka ku isinzizo lino ni ku kibuga kino, bye muwuliire nga nkoba.

¹³ Kale ni mulongoose empisa dhaimwe n'ebikolwa byaimwe, era mugonderenga Musengwa Katonda waimwe. Olwo Musengwa Katonda oyo aidha kukyusa ekirowoozo kye, alobe kubakolaku kabi nga bw'abaire ategeike okukola.

¹⁴ Nze ku lwange, buti ndi mu ngalo dhaimwe. Munkole kyonakyona kye mubona nga n'ekirungi era nga n'ekituufu.

¹⁵ Aye mukimanhe bukalamu nti bwe mundhita, imwe n'abantu b'omu kibuga kino munaaba mwereeseeku ekibi eky'okwita omuntu aziraku musango, kuba Musengwa Katonda mwene n'eyantuma okwidha okubalabula.”

¹⁶ Agho abakungu n'abantu abandi boonaboona baakoba bakabona n'abalanzi bati: “Omusaadha ono ayogeire n'ife mu liina lya Musengwa Katonda waife, kale tagwaniire kwitibwa.”

¹⁷ Agho abandi ku bakulu b'ebika baasituka baayemerera, baakoba abantu abaali agho nga beesoloiza bati:

¹⁸ “Hezekia bwe yali nga ni kyabazinga wa Buyudaaya, omulanzi Mika eyabanga e Moreshethi yakobera abantu ati Musengwa Katonda Afuga Amagye akoba ati, ‘Olusozi Sioni balirulima ng'oti nimiro; ekibuga Yerusalemu kirifuuka mmungo dha bifunfugu, n'olusozi lwonalwona oluliku eisinzizo lwafuuka kibira.’

¹⁹ Abakulu ab'ebika abo baayongera okukoba bati: Mulowooza muti kyabazinga Hezekia n'abantu b'omu Buyudaaya baamala baita Mika oyo? Busa naire. Mu kifo eky'okumwita, kyabazinga Hezekia oyo yata bwa mu Musengwa Katonda kitiibwa era yaagezaaku okukola ebisiimya Musengwa Katonda oyo. Era Musengwa Katonda yakyusa ekirowoozo kye, yaaloba kubaleetaku kabi ke yali akobye okubaleetaku. Aye ife mperaano tuli kwenda okwereetaku akabi akanene einho.”

²⁰ Era ghaalighooku n'omuntu owundi nga bamweta Uria mutabane wa Shemaia ow'e Kiriathi Yearimu, eyayogera mu liina lya Musengwa Katonda ku kibuga kino ni ku ighanga lino, ng'oti ni Yeremia bwe yakola.

²¹ Kyabazinga Yehoiakimu n'abalwani be ab'amaani, ghalala n'abakungu be, bwe baawulira Uria oyo bye yakoba, kyabazinga yaayenda okumwita. Aye ekyo Uria yaakimanhaku era yaatya inho, kale yaalumukira e Misiri okwewonia.

²² Aye ate kyabazinga Yehoiakimu yaatuma Elinathani mutabane wa Akabori ghalala n'abantu abandi, baje e Misiri okunooniayo Uria oyo.

²³ Era baamwiza, bamutwala ye kyabazinga Yehoiakimu, yaalagira baamwita era omulambo gwe baagusuula ghe baaziikanga abantu ababuliidho.

²⁴ Aye nze Yeremia tibampaayo eri bantu kundhita, kuba Ahikamu mutabane wa Shafani yampolerezaayo inho.