Yeremia 25 - Baibuli Ekibono kya Katonda 2014

Abazigu abaliva ku luuyi olw'omukono omugooda olw'e buvandhuba

¹ Mu mwaka ogwokuna nga Yehoiakimu mutabane wa Yosia ni kyabazinga wa Buyudaaya, nafuna obukwenda bwa Musengwa Katonda, nga bugema ku bantu boonaboona ab'omu Buyudaaya. Ogwo n'ogwali omwaka ogusooka nga Nebukadinezzari ni kyabazinga w'e Babilonia.

² Agho naakoba abantu b'omu Yerusalemu ni mu Buyudaaya boonaboona nti:

³ “Okuva ku mwaka ogweikumi n'esatu (13) nga Yosia mutabane wa Amoni ni kyabazinga wa Buyudaaya okutuuka ni ye buli eno, giri emyaka abiri n'esatu nga Musengwa Katonda ampa obukwenda bwe. Era mbakoberanga obukwenda obwo aghazira kukoogha naire, aye imwe mwaloba kutaayo mwoyo.

⁴ Mwaloba okuwulirisa waire okufaayo, ate nga Musengwa Katonda oyo yatumanga abagheereza be abalanzi ye muli aghazira kukoogha naire,

⁵ abaabakobanga bati, ‘Buli muntu alekere okukola ebibi era akyuse empisa dhe embi. Memale olwo musigale nga muli mu nsi Musengwa Katonda ye yabagha, imwe ni badhaadha baimwe, ebenga yaimwe ku bwaimwe.

⁶ Mutasinzanga waire okugheerezanga bakatonda abandi. Era mutasoononkerezanga Musengwa Katonda ni mumuleetera kusungughala nga musinza ebintu obuntu imwe beene bye mwekolera. Bwe muligondera Musengwa Katonda oyo, talibakolaku kabi koonakoona.’

⁷ Aye Musengwa Katonda mwene akoba ati mwaloba okumuwulirisa, mwamusoononkereza mwamuleetera okusungughala nga musinza ebintu obuntu imwe beene bye mwekolera, olwo mwereetera okwerumya imwe beene.

⁸ “Agho ni, nga bwe mwaloba okumuwulirisa, Musengwa Katonda oyo Afuga Amagye akoba ati,

⁹ ‘Bona, nja kwetesa abantu boonaboona ababa ku luuyi olw'omukono omugooda olw'e buvandhuba, era ndhetese n'omugheereza wange Nebukadinezzari kyabazinga w'e Babilonia. Memale mbaleete balwanise abantu b'omu Buyudaaya, n'ab'omu maghanga goonagoona agaliiraine agho. Nja kuzikiriza nsaaniegho eighanga lino Buyudaaya ghalala n'amaghanga agaliiraine agho, mu nsambo etiisa einho, buli muntu ageesimoozenga bwesimooze era agavumirirenga ebyanda n'ebyanda. Nze Musengwa Katonda, ninze nkobye.

¹⁰ N'ekindi, nja kusirisa emizira egy'abali mu binhumo ni mu kusagamba, nsirise n'egy'abo abali mu mbaga edh'obugole. Tibaliba na mafuta ga kwasa ntaala, waire okuba n'emere ey'empeke ey'okusa ku mmengo.

¹¹ Ensi eyo yoonayoona eja kufuuka bifulukwa byereere mu nsambo etiisa einho, era amaghanga agaliiraine agho galigheerezanga kyabazinga wa Babilonia okumala entangama ya myaka nsanvu.

¹² Emyaka ensanvu egyo bwe giriwaayo, ndibonereza kyabazinga w'e Babilonia n'ab'omu ighanga eryo olw'ebibi byaibwe, naazikiriza ensi yaibwe yaasigala agho etyo ng'eri bwa bifulukwa byereere, ebyanda n'ebyanda.

¹³ Ndituusa ku Babilonia buli kabi akaaghandiikibwa mu kitabo kino, ke neesoomera okusindikira amaghanga goonagoona, nga bwe nayogera nga mbita mu Yeremia.

¹⁴ Ndyesasuliza ku Bababilonia olw'ebyo bye baakola. Era amaghanga kamaala ni bakyabazinga abakologho balifuula Abababilonia abo okuba abairu baibwe.’ ”

Katonda Asalira amaghanga omusango

¹⁵ Agho Musengwa Katonda, Katonda wa Isiraeli yankoba ati: “Toola ekikopo kye ngemye mu ngalo dhange eky'omwenge ogw'emizabbibu ogw'obusungu bwange. Okitwale okighe amaghanga goonagoona ye nnaakutuma, bakinhweku.

¹⁶ Bwe galimala okukinhwaku, galitagala gaagwa n'eiralu olw'olutalo lwe nja okugasindikira.”

¹⁷ Kale naatoola ekikopo mu ngalo dha Musengwa Katonda, naakitwala naakigha abantu boonaboona Musengwa Katonda oyo be yantuma okukigha, baakinhwa.

¹⁸ Ab'omu Yerusalemu n'ab'omu bibuga byonabyona ebya Buyudaaya, ghalala ni bakyabazinga n'abakungu baabyo baakinhwa. Olwo, ebibuga ebyo bisobole okufuuka ebifulukwafulukwa mu nsambo etiisa einho. Era olwo abantu babyesimoozenga bwesimooze era babikolimirenga, nga bwekiri ni ye buli eno.

¹⁹ Abandi abaali n'okunhwa ku kikopo ekyo ni bano: kyabazinga wa Misiri, n'abagheereza be, n'abakungu be, n'abantu be boonaboona

²⁰ abasenze boonaboona abaali mu Misiri, ni bakyabazinga ab'omu nsi Uzi, ni bakyabazinga boonaboona ab'omu bibuga eby'Abafilisiti eby'e Ashikeloni, n'e Gaza, n'e Ekuroni, n'abandi abasigairegho ab'e Ashidodi

²¹ abantu ab'omu Edomu, n'ab'e Moabu, n'ab'omu Ammoni

²² bakyabazinga boonaboona ab'e Tiro n'ab'e Sidoni, ni bakyabazinga ab'ebiketezo eby'oku nhandha

²³ bakyabazinga b'ebibuga Dedani, ni Tema, ni Buza, n'abantu boonaboona abaasalanga ku nviiri dhaibwe

²⁴ bakyabazinga boonaboona ab'e Buwarabu, ni bakyabazinga boonaboona ab'abantu ababa mu irungu

²⁵ bakyabazinga boonaboona ab'e Zimuri, n'e Elamu, n'e Media

²⁶ ni bakyabazinga boonaboona ababa ku luuyi olw'omukono omugooda olw'e buvandhuba ab'okumpi n'eghala. Boonaboona abo balinhwa, mulala mulala nga banonaganwa. N'obwakyabazinga obundi bwonabwona obuli ku nsi bulinhwa. Abo bwebalimala, olwo kyabazinga ow'e Babilonia yeena yaanhwa.

²⁷ Agho Musengwa Katonda yankoba ati: “Kobera abantu oti nze Musengwa Katonda Afuga Amagye Katonda wa Isiraeli, nkoba nti, ‘Munhwe mutamiire mutuuke n'okwegoga, era mugwe ghansi nga timukaasobola na kusituka, olw'olutalo lwe nja okubasindikira.’

²⁸ Bwe baliroba okutoola ekikopo ekiri mu ngalo dho okukinhwaku, olibakoba oti, ‘Musengwa Katonda Afuga Amagye akoba ati muteekwa okukinhwaku,

²⁹ kuba bona, nja kusookera mu kibuga kyange mwene okukola akabi. Balowooza bati beene baliwona okubonerezebwa? Busa, tibaliwona kubonerezebwa naire, kuba nja kusindika olutalo ku bantu boonaboona ab'oku nsi. Nze Musengwa Katonda Afuga Amagye, ninze nkobye.’

³⁰ “Agho ni, iwe Yeremia oteekwa okulangirira ebintu byonabyona bye ndhogeire ebiri kubaidhira, obakobe oti, ‘Musengwa Katonda aliwologoma ng'ali mu igulu, era yaakaabuka ng'ali mu kifo kye ekitukuvu. Aliwologomera abantu be n'amaani, yaayasiikana ng'oti n'abakunha emizabbibu okugikolamu omwenge. Abantu boonaboona abali ku nsi balimuwulira.

³¹ Amamiro ge baligawulira eyo yoonayoona ensi y'ekanga, kuba ghaligho omusango Musengwa Katonda oyo gw'avunaana amaghanga. Aliwozesa abantu boonaboona, yaabaghaayo baabaita.’ ”

³² Musengwa Katonda Afuga Amagye akoba ati: “Bona, akabi kali kwidhira amaghanga irala ku irala, nga kava ku lino kaaja ku lire. Kiwunga ow'amaani ali kusiikuuka ere eghala ensi y'ekanga.

³³ “Ku lunaku olwo, emirambo gy'abo Musengwa Katonda b'aliita, girisansaanira woonawoona okuva ensi y'eva okutuuka y'ekanga. Abantu abo tighalibaagho abalira waire atoolagho mirambo gyaibwe kuja kugiziika. Balisigala agho ku itaka ng'oti mmungo dha busa.

³⁴ Muwowoole imwe abakulembeze, mulire amaziga. Imwe abalabirira abantu bange, mwevulunge mu nkungu. Ekiseera kituuse eky'okubaita, babasalesale ng'oti bwe baita entaama enume enungi einho.

³⁵ Muzira ghe mulirumukira imwe abakulembeze, waire okubaaku ghe muliwonera imwe abalabirira abantu.

³⁶ Wulira abakulembeze bwe bali kulira, n'abo abalabirira abantu bwe bali kuwowoola. Musengwa Katonda azikiriiza eighanga lyaibwe,

³⁷ era ensi yaibwe eyabangamu emiraala agirese agho etyo ng'eri bifulukwa byereere, olw'obusungu bwe obubitirivu.

³⁸ Musengwa Katonda alekuliire agho abantu be, ng'oti n'empologoma bw'eva mu mpuku yaayo. Ebitiisa eby'omu lutalo n'obusungu bwa Musengwa Katonda obubitirivu, bireeteire ensi yaibwe okufuuka ng'oti bwa irungu.”