Yeremia 24 - Baibuli Ekibono kya Katonda 2014

Ebiibo ebibiri ebyalimu emitiini

¹ Agho Musengwa Katonda yandeetera okubonekerwa ebiibo bibiri nga birimu emitiini, nga biri agho emberi w'eisinzizo lye. Ekyo kyaligho nga Nebukadinezzari kyabazinga w'e Babilonia amaze okutoola e Yerusalemu kyabazinga Yekonia mutabane wa Yehoiakimu, yaamutwala e Babilonia mu bunhage ghalala n'abakungu b'omu Buyudaaya, n'abagheesi, n'abakugu mu mirimo egy'endhawulo.

² Ekiibo ekindi kyalimu emitiini emirungi einho ng'oti n'egyo egisookereza okwenga ku muti. Aye ekiibo ekindi kyabaamu emitiini nga mibi inho, egitasobola na kuliibwa.

³ Agho Musengwa Katonda yambuuza ati: “Yeremia, kiki ky'oli kubona?” Naamwiramu nti: “Ndi kubona emitiini emirungi einho, era naabona n'emibi, nga mibi inho egitasoboka na kuliibwa.”

⁴ Agho Musengwa Katonda yankoba ati:

⁵ “Nze Musengwa Katonda, Katonda wa Isiraeli mbona ng'abantu be nasindika e Babilonia mu bunhage, bali ng'oti n'emitiini egyo emirungi, era ndidha kubabisanga bukalamu n'ekivunika.

⁶ Ndidha kubalabiriranga, mmale mbaize mu nsi eno. Ndibazimba, mu kifo ky'okubasansula, era naabasimba, mu kifo ky'okubaiwululagho.

⁷ Ndidha kubaleeteranga okuumanha nga ninze Musengwa Katonda. Olwo beene babenga bantu bange, ate nze mbenga Katonda waibwe, kuba baja kukyuka baire ye ndi n'omwoyo gwaibwe gwonagwona.

⁸ “Aye kyabazinga Zedekia owa Buyudaaya, n'abakungu be, n'abantu b'omu Yerusalemu abaasigala mu nsi eno, n'abo abaalumukira e Misiri, nze Musengwa Katonda abo boonaboona ndibabisa ng'oti n'emitiini egyo emibi einho, egitasobola na kuliibwa.

⁹ Ndidha kubafuula ekintu ekitiisa einho abantu boonaboona ku nsi, bafuuke eky'okwogerwaku era eky'okuyeeyereza. Baidha kubanga kivumo era kikolimo, eyo yoonayoona ye ndibasansaaniza.

¹⁰ Ndibaleetera entalo era naabasindikira endhala n'endwaire ya kawumpuli, okutuusa lwe balizikirira ni bawaagho mu nsi ye nabagha beene ni badhaadha baibwe.”