Yeremia 23 - Baibuli Ekibono kya Katonda 2014

Eisuubi mu biseera ebiidha

¹ Bakagwireku abakulembeze abo abasansaania abantu ba Musengwa Katonda ni babazikiriza.

² Kale ni, Musengwa Katonda, Katonda wa Isiraeli bino by'akoba ebigema ku bakulembeze abalabirira abantu be, ati: “Imwe timwafaayo naire kulabirira bantu bange. Mwababinga era mwabasansaania. Aye bona eno, nze ndidha kufaayo inho okubona nga imwe mbabonereza olw'ebibi bye mwakola.

³ Nze mwene ndidha kusoloza abantu bange abaliwonagho nga mbatoola mu nsi dhoonadhoona ye nababingira, mbaize mu nsi yaibwe. Balizaalagana baaba kamaala.

⁴ Ndibateeragho abakulembeze okubalabiriranga, abantu bange abo baalekera agho okutya n'okweraliikirira, era ghaaloba kubaagho waire omulala ati abula. Nze Musengwa Katonda, ninze nkobye.”

⁵ Musengwa Katonda era yaakoba ati: “Bona eno, ekiseera kiri kwidha, nteegho omwidhukulu omutuufu owa Daudi abe kyabazinga. Aja kufuganga n'amagezi era aidha kukolanga amazima n'ebituufu mu nsi ye.

⁶ Mu kiseera ky'alifugiramu, abantu b'omu Buyudaaya baliba bukalamu, n'ab'omu Isiraeli baaba mu miraala. Balimweta eriina ‘Musengwa Katonda n'obulokozi bwaife.’ ”

⁷ Musengwa Katonda akoba ati: “Ekiseera kiri kwidha, abantu babe nga tibakaalayira mu liina lyange nga Katonda omulamu eyatoola Abaisiraeli mu nsi Misiri.

⁸ Aye balayirenga mu liina lyange nga Katonda omulamu eyatoola Abaisiraeli mu nsi eri ku luuyi lw'omukono omugooda olw'e buvandhuba, ni mu nsi edhindi dhoonadhoona ye nali mbabingiire. Agho baliba mu nsi eyaibwe yeene.”

Obukwenda bwa Yeremia obugema ku balanzi abaguya

⁹ Omwoyo gumpoiremu, zeenazeena ndi kudhugumira budhugumire, ku lwa Musengwa Katonda, ni ku lw'ebibono bye ebitukuvu. Ndi ng'oti n'omuntu atamiire, omuntu abitiriiza okunhwa omwenge.

¹⁰ Ensi eidhwire abantu abatali beesigwa eri Musengwa Katonda. Bakola ebibi era baakozesa bubi obuyinza bwaibwe. Ensi erira bulire, n'eisubi lyakala mu byayiro, olw'ekikolimo kya Musengwa Katonda.

¹¹ Musengwa Katonda era akoba ati: “Abalanzi ni bakabona tibatya Katonda era nabaagaana nga bakola ebibi ni mu isinzizo mwene.

¹² Kale ni baidha kubanga ng'oti n'abatambulira mu nzikiiza mu ngira etyerera, batyererenga omwo bagwe. Nja kubatuusaaku akabi, kuba ekiseera kyaibwe eky'okubonerezebwamu kiri kwidha. Nze Musengwa Katonda, ninze nkobye.

¹³ Era mboine ekibi abalanzi b'omu Samaria kye baakola: Baalanganga mu liina lya Baali baakiidhamya abantu bange Abaisiraeli.

¹⁴ Aye ate mboine ng'abalanzi b'omu Yerusalemu, bakola ebibi n'okusinga agho: bakola obwenzi era baaguya, baleetera abantu okukola ebibi. Olwo ghaabula akyuka okuva mu bibi bye. Nze mbona nga boonaboona babi ng'oti n'abantu b'e Sodoma n'ab'e Gomorra.”

¹⁵ “Agho ni, nze Musengwa Katonda Afuga Amagye, nkoba abalanzi b'omu Yerusalemu nti: ‘Mubone eno, ndidha kubagha olubiriizi balulye lubakaayire, mbaghe n'amaadhi agalimu eirogo baganhwe; kuba baleeteire abantu boonaboona mu nsi eno obutatya Katonda.’

¹⁶ “Agho Musengwa Katonda Afuga Amagye yaakoba abantu b'e Yerusalemu ati: ‘Mutawulirisa balanzi bye babakoba, nga babasuubiza ebizirayo. Ebyo bye babakobera babiyiiya buyiiye mu myoyo gyaibwe, se ti ebyo nze bye mbakoba.

¹⁷ Buli kaakyeire bakobera abantu abaloba okuwulirisa nze Musengwa Katonda bye nkoba, bati, Mwidha kubanga mu miraala.’ Era baakobera buli muntu akola ebyo omwoyo gwe omukalangufu bye gwenda, bati, ‘Ezira kabi kaidha kukutuukaku naire.’ ”

¹⁸ Aye nze naakoba nti: “Naani ku balanzi abo eyaali amanhieku Musengwa Katonda by'alowooza mule. Era ezira ku abo yaali awulireku bukwenda bwa Musengwa Katonda, waire okutaayo omwoyo ku ebyo Musengwa Katonda oyo by'akoba.

¹⁹ Bona, obusungu bwa Musengwa buli ng'oti kiwunga, era buli ng'oti n'empewo ey'amaani erifuuwa nga yeezungululira ku mitwe gy'ababi.

²⁰ Era obusungu bwa Musengwa tibuja kwika, okutuusa ng'amaze okukola n'okutuukiriza ky'asazeegho okukola. Imwe abantu be, ekyo mulikitegeera bukalamu mu biseera eby'oluvainhuma.”

²¹ Agho Musengwa Katonda yaakoba ati: “Nze tyatuma balanzi abo, aye beene baaja buje. Tyabagha bukwenda naire, aye beene baalanga bulange mu liina lyange.

²² Nguli baali bamanhie bye ndowooza mule, bandikobeire abantu bange obukwenda bwange, era baabakyusa baava mu bikolwa byaibwe ebibi ni mu mpisa dhaibwe embi.

²³ “Nze ndi Katonda aba buli ghantu, se ti mu kifo kirala kyonka.

²⁴ Ghazira muntu asobola kwegisa ghe ntasobola kumubona. Timwidhi nga ndi buli ghantu, mu igulu ni mu nsi?

²⁵ Ndidhi abalanzi abo bye bakoba, abalanga eby'obuguya mu liina lyange, nga bakoba mbu nze nabagha obukwenda bwange nga bali mu birooto byaibwe.

²⁶ Abalanzi abo balikomya li okudaaliimya abantu bange, nga babakobera eby'obuguya bye bayiiya obuyiiye?

²⁷ Balowooza bati ebirooto byaibwe bye bakobera abantu, binaaleetera abantu bange abo okuneerabira, ng'oti ni badhaadha baibwe bwe baaneerabira ni baira mu kusinza omusambwa Baali?

²⁸ Omulanzi aloose ekirooto agwaine akobe ati ekyo kirooto bulooto. Ate omulanzi afunie obukwenda okuva ye ndi agwaine alangirire obukwenda obwo n'obwesigwa. Omusiisi guba mulungi ng'engaano yeene?

²⁹ Obukwenda bwange buli oti muliro, era bwaba ng'oti n'enhundo ekonta amabaale ni gafuuka obumulumulu.

³⁰ Kale ni nkyagha abalanzi abo abatoola ebibono okuva ku banaibwe, memale ni babirangirira ng'obukwenda obuva ye ndi.

³¹ Era nkyagha n'abalanzi abo abatoola ebibono ebyaibwe ku bwaibwe, ni babikobera abantu bati, ‘Musengwa Katonda atyo bw'akoba.’

³² Muwulire nze Musengwa Katonda kye nkoba: Nkyagha abalanzi abo abakobera abantu ebirooto byaibwe ebiidhwire obuguya, ni badaaliimya abantu bange n'obuguya bwaibwe obwo, nga babeesuutiraku. Tibatumangaku, naire okubalagira baje bakole batyo! Era bazira kya makulu kye batwalira bantu abo naire. Nze Musengwa Katonda, ninze nkobye.”

Omugugu gwa Musengwa

³³ Agho Musengwa Katonda yankoba ati: “Yeremia, omuntu yeenayeena, oba omulanzi, oba kabona, bw'aidhanga n'akubuuza ati, ‘Bukwenda ki obuva ye Musengwa?’ Iwe omwirangamu oti, ‘Niiwe omugugu omuzito eri Musengwa Katonda, era Musengwa Katonda oyo akoba ati aidha kukusuula ere.’

³⁴ Omulanzi, oba kabona, oba omuntu owundi yeenayeena alikoba ati, ‘Omugugu gwa Musengwa Katonda,’ ndimubonereza mwene n'ab'omu maka ge.

³⁵ Aye buli muntu aidha kubuuzanga bakagwa be oba aboluganda lwe ati, ‘Musengwa Katonda aizemu atya? Musengwa Katonda akobye ki?’

³⁶ Kale ni batakozesanga bibono ebyo, ‘Omugugu gwa Musengwa Katonda,’ kuba oyo alibikozesa yeenayeena, nja kufuula obukwenda bwange bube omugugu gwene omuzito eri omuntu oyo. Abantu bafuulaniafuulania ebibono byange nze Musengwa Katonda waibwe, Afuga amagye.

³⁷ Iwe Yeremia, oidha kubuuzanga abalanzi oti, ‘Musengwa Katonda akwizeemu atya? Musengwa Katonda akobye ki?’

³⁸ Aye bwe badheemera ekiragiro kyange ni bakozesa ebibono bino, ‘Omugugu gwa Musengwa Katonda,’ olwo oidha kubakobanga oti

³⁹ nze Musengwa Katonda nja kubabbeeda mbasuule ere banve mu maiso. Ndidha kubasuula ere, beene ghalala n'ekibuga kyaibwe kye nabagha era kye nagha ni badhaadha baibwe.

⁴⁰ Era ndidha kubaleetera ensoni okubagemanga, abantu babanhoomenga aghazira kwerabira naire.”