Yeremia 22 - Baibuli Ekibono kya Katonda 2014

Obukwenda eri ab'oku lulyo lwa kyabazinga wa Buyudaaya

¹ Agho Musengwa Katonda yankoba nje mu kisaagaati kya kyabazinga wa Buyudaaya, mmukobe nti:

² “Iwe kyabazinga wa Buyudaaya era mwidhukulu wa Daudi atyama ku kityamo eky'obwakyabazinga, wulirisa Musengwa Katonda by'ali kukoba iwe, n'abakungu bo, ghalala n'abantu b'omu Yerusalemu:

³ Musengwa Katonda oyo akoba ati mukolenga amazima n'ebituufu. Omuntu ye batuntuza mumuwonienga ole amutuntuza. Era mutakolanga kibi kyonakyona oba ekikolwa eky'obukambwe ku basenze, oba bamulekwa, oba banamwandu, oba okwitanga abantu abaziraku musango mu ighanga lino.

⁴ Bwe munaatuukirizanga bye mbalagira, olwo baidhukulu ba Daudi n'abanaabanga bakyabazinga. Era nga bali ghalala n'abakungu baibwe, n'abantu baibwe, baidha kwingiranga mu miryango gy'ekisaagaati kino eky'obwakyabazinga, nga bali ku bigaali eby'omu lutalo ni ku mbalaasi.

⁵ Aye bwe mutaagonderenga bye ndagira, nze neerayirira mwene nti ekisaagaati kino eky'obwakyabazinga kija kufuuka bifulukwa byereere. Nze Musengwa Katonda, ninze nkobye.”

⁶ Musengwa Katonda ati bw'akoba ku kisaagaati kya kyabazinga wa Buyudaaya: “Ekisaagaati kya kyabazinga wa Buyudaaya kiboneka bulungi ng'oti n'ensi Gileadi, era ng'oti n'ensozi edh'e Lebanoni. Aye nja kukifuula ekifo ekisigaire obwagho kityo, era ekibuga ekiziramu muntu akibaamu naire.

⁷ Nja kusindika abantu baidhe bakizikirize. Baliidha n'empasa dhaibwe, baatematema empango dhaakyo edh'emivule edhiboneka obulungi einho, baadhisuula mu muliro.

⁸ “Abantu kamaala abamaghanga agandi bwe balibitanga ku kibuga kino, balyebuuzanga bati, ‘Lwaki Musengwa Katonda yakola ekintu ng'oti n'ekyo ku kibuga kino ekikologho?’

⁹ Agho baamala beiramu bati, ‘Lwa kuba abantu baakyo baava ku ndagaano ye baakola ni Musengwa Katonda waibwe, baaja baasinza era baagheereza bakatonda abandi.’ ”

Obukwenda bwa Yeremia obugema ku Yoahazi

¹⁰ Imwe abantu b'omu Buyudaaya, mutalirira kyabazinga Yosia eyafa era mutamulumirwa mwoyo. Aye mulirire inho mutabane we Yoahazi ye bali kutwala nga ti wa kwira; kuba taja kwirayo kubona ku nsi ye yazaalibwamu kabiri.

¹¹ Ebigema ku mutabane wa kyabazinga Yosia eyasikira ise oyo ku bwakyabazinga bwa Buyudaaya, aye ni bamutoola kuno, Musengwa Katonda abyogeraku ati: “Yava kuno, yaaja era takaira.

¹² Aja kufiira eyo mu nsi ye baamutwala. Taja kwirayo kubona nsi eno kabiri.”

Obukwenda bwa Yeremia obugema ku Yehoiakimu

¹³ “Akagwireku oyo azimba endhu ye mu kukupankupania, n'agitaaku n'ebisenge ebya ghaigulu mu kulyaka, ng'akozesa abantu emirimo ku bwereere aghazira kubagha mpeera yaibwe.

¹⁴ Akagwireku oyo akoba mule ati, ‘Ndidha kwezimbira endhu enkologho, ng'eriku ebisenge ebya ghaigulu ebigazi. Ngiteeku amadinisa, ngidholigedholige n'embaawo edh'omuvule, era ngisiige langi ya kasaayisaayi.’

¹⁵ Olowooza oti okuzimbisa omuvule, kikufuula kyabazinga inho okusinga bakyabazinga abandi? Lata wo yalyanga era yaanhwanga ng'akola amazima n'ebituufu. Era ebintu byamujiiranga bukalamu.

¹⁶ Yasaliranga abaavu n'abali mu bwetaavu emisango mu butuufu, era ng'ebintu bimujiira bukalamu. Okwo kwe beeta okumanha Musengwa Katonda.

¹⁷ Aye iwe weemalira mu bya kufuna mu bukyamu byonka, waita abantu abaziraku musango, era waatuntuza abantu b'ofuga n'obukambwe.”

¹⁸ Kale ni, Musengwa Katonda bino by'akoba ebigema ku Yehoiakimu mutabane wa Yosia, era kyabazinga wa Buyudaaya: “Tibalimulirira mbu, ‘Wo muganda wange!’ Oba mbu, ‘Wo mwanhinaze!’ Tibaligegenga mbu, ‘Wo musengwa wange!’ Oba mbu, ‘Wo kyabazinga wange!’

¹⁹ Balimuziika nga bwe baziika endogoyi: balimukwekwebya bukwekwebye, baamusuula kuliya kw'emiryango gya Yerusalemu.”

Obukwenda bwa Yeremia obugema ku birituuka ku Yerusalemu

²⁰ “Imwe ab'e Yerusalemu, muje ku nsozi dh'e Lebanoni mwasiikane, muje mu nsi y'e Bashani mulire; muje ku nsozi dh'e Moabu muwowoole, kuba abo be mwakolagananga nabo boonaboona bazikiriziibwa.

²¹ Musengwa Katonda yayogera n'imwe ng'ebintu bikaabajiira bukalamu, aye mwaloba kuwulirisa. Era mutyo bwe mubaire mukolanga buliidho, mwalobera irala okugondera by'akoba.

²² Abakulembeze baimwe boonaboona balitwalibwa ng'oti n'ebikaba empewo bw'ebifuuwa ere. Abo be mwakolagananga nabo balitwalibwa mu bunhage. Olwo ensoni dhaabagema mwaswala olw'ebibi byonabyona bye mwakola.

²³ Imwe buti mweyagalira mu mivule egyava e Lebanoni, aye muja kusaasirwa inho ng'obulumi bubatuuseeku, obulumi obuli ng'oti bwa mukazi ali kulumwa okuzaala.”

Katonda asalira Yehoiakini omusango

²⁴ Musengwa Katonda akoba ati: “Nga bwendi omulamu, iwe kyabazinga Konia mutabane wa Yehoiakimu kyabazinga wa Buyudaaya, ni bwe wandibaire ng'oli mpeta eba ku lwala lwange ku mukono omusaadha, eriku akamanhiso ak'obwakyabazinga, era nandikutoireku.

²⁵ Nandikughaireyo y'abantu b'otya, abenda okukwita. Era ndikughaayo eri Nebukadinezzari kyabazinga w'e Babilonia, n'eri abaisirukale be.

²⁶ Ndidha kukutoola mu nsi eno ng'oli ghalala n'inhoko akuzaala, nje mbasuule mu nsi ye mutaazaalibwamu, era mwembi eyo ye mulifiira.

²⁷ Mulyegomba okwira mu nsi eno kabiri, aye timuliira naire.”

²⁸ Agho naakoba nti: “Omusaadha ono Konia afuuse ng'oti nsugha eyamenheka ni bagisuula ere ng'eziraku agyenda? Eyo n'ensonga lwaki mwene n'abaana be baabingibwa baasuulibwa mu nsi ye bataidhi?”

²⁹ Iwe nsi, iwe ensi, ensi yaife, wulira Musengwa Katonda bw'akoba, ati:

³⁰ “Omusaadha ono mumughandiike mu kitabo eky'abaziraku baana, abe ng'oti tabangaku na mwana naire. Era abe ng'oti n'omuntu atalifuna kalungi mu bulamu; kuba taja kubaaku na mwana oba mwidhukulu aja kwiramu kufuga Buyudaaya ng'omusika wa Daudi. Nze Musengwa Katonda, ninze nkobye.”