Yeremia 19 - Baibuli Ekibono kya Katonda 2014

Yeremia amenha akadoome

¹ Agho Musengwa Katonda yankoba ati: “Yeremia, kola oje ogule akadoome ak'eitosi. Otoole ku bakulu b'ebika ni ku bakulira bakabona,

² oje nabo mu kiiko ekyetebwa ekya mutabane wa Hinnomu, ng'obitira mu gwetebwa Omulyango ogw'Engyo. Era eyo y'oidha okukobera abantu obukwenda bwe nnaakugha.

³ Oidha kubakoba oti, ‘Imwe bakyabazinga ab'omu Buyudaaya n'imwe abantu ab'omu Yerusalemu, mumpulirise nze Musengwa Katonda Afuga Amagye era Katonda wa Isiraeli. Nja kuleeta ku kifo kino akabi nga kiisi akawuliraku, amatu ge gamuwaawaala buwaawaale.

⁴ Nja kukola ntyo kuba abantu abo banviireku baayonoona ekifo kino nga baghaayo emisengo eri bakatonda abandi, ate nga beene, waire badhaadha baibwe, oba bakyabazinga b'omu Buyudaaya, tibamanhangaku bakatonda abo naire. Era abantu abo baidhwiza ekifo kino omusaayi ogw'abantu abaziraku musango be baita.

⁵ Era baaja baazimbira omusambwa Baali ebifo ebigulumivu ebisinzibwamu, eby'okwokerangaku abaana baibwe n'omuliro ng'ebigheebwayo ebyokebwa. Ate nga nze tibalagirangaku kukola kintu ekyo, waire okukirowoozaaku obulowooze mu mwoyo gwange.

⁶ Kale ni bona eno, ekiseera kiri kwidha, ekifo ekyo kirekere okwetebwa Tofethi, oba ekiiko kya mutabane wa Hinnomu, aye kyetebwe Ekiiko eky'Okutirimbuliramu.

⁷ Mu kifo ekyo mwe nditabuliratabulira entegeka dhoonadhoona edh'abantu b'omu Buyudaaya n'ab'omu Yerusalemu. Ndireetera abazigu baibwe okubaghangula era baabaitira mu ntalo. Emirambo gyaibwe ndigigabula enhonhi n'ensolo edh'omu nsiko dhaagirya.

⁸ Ndizikiriza ekibuga kino mu nsambo etiisa einho, buli muntu yaakyesimoozanga bwesimooze. Era buli muntu anaabitangagho ensisi eidha kumugemanga olw'okuzikiriza okwo.

⁹ Abazigu balizingiza ekibuga kino okukyezunguluza nga benda okwita abantu baamu. Okuzingiza ekibuga kino kuliba kukambwe inho, abantu abaliba munda baatuuka n'okulya banaibwe, era n'okulya abaana baibwe beene.’ ”

¹⁰ Agho Musengwa Katonda yankoba mmenhe akadoome kale ak'eitosi ng'abantu be naja nabo babona,

¹¹ era mbakobere nti Musengwa Katonda Afuga Amagye akoba ati: “Ntyo bwendizikiriza abantu bano n'ekibuga kino, ng'oti n'omuntu bw'amanhiangula akadoome ak'eitosi, ni katasobola kuyungibwa kukaizaagho kabiri. Abantu baliziika abafu baibwe ni mu Tofethi olw'okubulwa aghandi agh'okubaziika.

¹² Ntyo bwendikola ekibuga kino n'abantu baamu, ng'oti bwe nakola ekifo ky'e Tofethi.

¹³ Endhu edh'omu Yerusalemu, n'edha bakyabazinga ab'omu Buyudaaya, ghalala n'edho dhoonadhoona abantu dhe baaniokezangaku obubbaani ghaigulu ku busolya bwadho nga babuniokereza emuunienie edh'oku igulu, era mwe baafukiranga ebigheebwayo eby'okunhwa eri bakatonda abandi, dhoonadhoona dhiriba nga ti nongoofu ng'oti n'ekifo ky'e Tofethi.”

¹⁴ Agho Yeremia yaira okuva e Tofethi, Musengwa Katonda ye yamutuma okulangirira obukwenda bwe. Yaayemerera mu luya olw'eisinzizo lya Musengwa Katonda, yaakobera abantu boonaboona ati:

¹⁵ “Musengwa Katonda Afuga Amagye era Katonda wa Isiraeli akoba ati, ‘Ndidha kutuukiriza akabi ke nakoba okuleeta ku kibuga kino ni ku bubuga obutono obukiriiraine, kuba mwakalangusa emyoyo gyaimwe, mwaloba kuwulirisa bye mbakoba.’ ”