Yeremia 18 - Baibuli Ekibono kya Katonda 2014

Yeremia aja ew'omuwumbi

¹ Agho Musengwa Katonda yankoba ati:

² “Kola oje mu ndhu ey'omuwumbi, era eyo ye ndidha okukugheera obukwenda bwange.”

³ Kale naaja ew'omuwumbi, naayagaana ng'ali kukola omulimo gwe, ku nkede y'awumbiraku.

⁴ Buli lwe yawumbanga ekintu ni kiroba okuvaamu nga bw'akyenze, ng'olwo eitosi lyakyo aligoita, era ng'alikolamu ekintu ekindi.

⁵ Agho Musengwa Katonda yankoba ati:

⁶ “Imwe Abaisiraeli, mulowooza muti nze tisobola kukola ku imwe ekyo omuwumbi oyo ky'akola ku itosi? Muli mu ngalo dhange ng'eitosi bweriba mu ngalo edh'omuwumbi.

⁷ Bwe nkoba nti nja kwiwululagho, mmenhegho era nzikirize eighanga oba obwakyabazinga,

⁸ aye eighanga eryo ni likyuka okuva mu bibi byalyo, olwo mba tiikole ekyo kye mbaire nsazeegho okukola.

⁹ Ate bwe nkoba nti nja kutaagho era nzimbegho eighanga oba obwakyabazinga,

¹⁰ aye eighanga eryo ni lindheemera era ni likola ebibi, olwo mba tiikole ekyo kye mbaire nsazeegho okukola.

¹¹ Kale ni kobera abantu b'omu Buyudaaya n'ab'omu Yerusalemu, oti ndi kukola entegeka okubakolaku akabi, era neetegeike okubabonereza. Bakobe buli muntu alekere okukola ebibi, era akyuse empisa dhe n'ebikolwa bye ebibi.

¹² “Aye baidha kwiramu bati, ‘Busa, lwaki tukyusa? Ife twidha kusigala nga tukola ebyo emyoyo gyaife emikalangufu era emibi bye gyenda.’ ”

Abantu bava ku Musengwa

¹³ Musengwa Katonda akoba ati: “Mubuuze amaghanga goonagoona oba nga ekintu ng'oti n'ekyo kyali kibaireghooku. Abaisiraeli bakoze ekintu ekitiisa einho!

¹⁴ Empampagama dh'omu mabaale amagulumivu ag'oku nsozi edh'e Lebanoni dhaali dhibeereireku agho nga tidhigwireeku mugozi? Amaadhi amainhogovu agava mu nsozi edho ghalighooku lwe gaalekeraku okukuuluula?

¹⁵ Aye abantu bange baaneeyawulaku, baaniokeza obubbaani ebisinzibwa ebitali Katonda. Baajanga bwe beekontola mu nguudo dhe baatambulirangamu okuva eira, baalekerera enguudo enene; baatambulira mu bugira obw'omu nsiko.

¹⁶ Ensi yaibwe baagifuula ekintu ekitiisa einho, abantu kye baneesimoozanga buliidho. Buli muntu anaagibitangaku aidha kutengeesanga bwa mutwe olw'okutya okungi.

¹⁷ Ndidha kusansaaniza abantu bange y'abazigu baibwe, ng'oti n'empewo eva mu buvandhuba bw'efuuwa enkungu. Akabi bwekalibaidhira, nja kubakuba bwa nkoone, tija kubayamba naire.”

Olukwe olw'okwita Yeremia

¹⁸ Agho abantu beeteesa bati: “Mwidhe tubeeku ni kye tukola Yeremia ono. Ni bwetunaamutoolagho, tituja kubula bakabona ba kutugalagiranga, era tituja kubula bagezi ba kwebuuzangaku, waire okubulwa abalanzi abatukobera obukwenda bwa Katonda. Ka tumuteeku emisango, era tulekere okuwulirisanga by'akoba.”

¹⁹ Agho nze naasaba nti: “Wo Musengwa Katonda, wulira bye nkoba. Wulira abazigu bange bye bandhogeraku.

²⁰ Omuntu akoze ekirungi, bwenebwene agwanira kusasulwamu kibi? Oidhukira nga bwenaidhanga y'oli ni mbawolerezaagho olobe kubamaliraku busungu. Aye ate buti basimye ebiina nga benda ngwemu nfe!

²¹ Wo Musengwa Katonda, kale ni leka abaana baibwe balambuke endhala bafe, obaleke bafiire mu ntalo. Abakazi baibwe ka babuleku abaana era babe banamwandu. Abasaadha ka bafe endwaire ya kawumpuli, abaisuka baitibwe mu ntalo.

²² Basindikire eikuukuubira ery'abanhazi libazinduukirize libagweku, olwo bawowoole mu ndhu dhaibwe; kuba basimye ebiina mbigwemu, bantega n'emitego gingemye.

²³ Aye iwe Musengwa Katonda oidhi enkwe dhaibwe dhoonadhoona edh'okwenda okundhita. Otabasonigha kwonoona kwaibwe, waire okusasaagho ebibi byaibwe n'obyerabira. Batandigire ekigwo ghansi obaghangule, obakoleku n'obusungu bwo.”