Yeremia 17 - Baibuli Ekibono kya Katonda 2014

Musengwa Katonda abonereza Abayudaaya olw'ebibi byaibwe

¹ Musengwa Katonda yakoba ati: “Imwe abantu b'omu Buyudaaya, ebibi byaimwe tibibavaaku naire. Biri ng'oti byaghandiikibwa ku myoyo gyaimwe ni ku bintu ebiri ng'oti mayiga ga nsolo ebiri ku nsonda eina edh'alutaari dhaimwe. Ebibi byaimwe biri ng'omuntu bweyandibighandiise ku bipande n'ekalaamu ey'ekyuma ekigumu einho eri n'omunwa ogw'eibaale ery'omughendo eryetebwa diamondi.

² Abantu baimwe tibeerabiranga kusinziza Ashera omusambwa omukazi, ku alutaari dhaibwe, ni buli ghansi mu kinsense eky'omuti omuzibirivu, ni ku buli kasozi,

³ ni ku buli lusozi olugulumivu oluli mu irungu. Eby'obukombe byaimwe n'ebintu byaimwe eby'omughendo, nja kubighaayo abazigu babinhage olw'okusasulamu ebibi ebingi bye mukoze mu nsi eno.

⁴ Mulirekula ensi ye nabagha ng'omugabo ogwaimwe, abazigu baagitwala. Nja kubafuula bagheereza ba bazigu baimwe eyo mu nsi ye mutaidhi naire, kuba obusungu bwange butumbwike ng'oti muliro era tiguja kuzikira.”

Ebyogerwa mu ndheso

⁵ Musengwa Katonda akoba ati: “Omuntu yeenayeena akyuka n'anvaaku nze Musengwa Katonda, ni yeesiga omuntu obuntu era n'amwesiguliraku, akolimirwe.

⁶ Omuntu oyo aba ng'oti muti oguli mu irungu, ogukulira eyo enkalu ku itaka ery'oluunhu, ezira kintu kindi kisobola kukulirayo. Omuntu oyo azira kikalamu ky'afuna naire.

⁷ Aye wa nkabi oyo aneesiga nze Musengwa Katonda era n'asuubirira mu nze.

⁸ Ali ng'oti n'omuti ogwasimbibwa ku mwiga, ogukunkunia emizi gyagwo ni gituuka ku maadhi. Tigutya musana ni bwe gwaka okwaga gha, kuba amakaba gaagwo gasigala nga ti maniavu. Ghazira kigweraliikiriza oba amaadhi gagwa oba tigagwa, kuba buli kiseera gutaaku ebibala.”

⁹ “Naani asobola okutegeera omwoyo gw'omuntu? Ezira kirimbalimba nga gwene; mubi inho ebitaloodheka.

¹⁰ Nze Musengwa Katonda neekebeedha ebidhuubo by'abantu era naaleba emyoyo gyaibwe. Ngabira buli muntu nga njiira ku neebisa ye ni ku bikolwa bye.”

¹¹ Omuntu afuna eby'obukombe mu bukupankupania, aba ng'oti n'enhonhi egonera amagi g'etaabiika; kuba eby'obukombe ebyo bimuwaaku mangu ng'akaali na kukairigha, olwo ku nkomerero ya byonabyona yaasigala agho nga musiru.

¹² Ekifo kyaife ekitukuvu kiri ng'oti kityamo kya bwakyabazinga eky'ekitiisa, kye baata ghaigulu ku lusozi oluleeyi okuviira irala mu mainhama.

¹³ Wo Musengwa Katonda, niiwe wenka eisuubi ly'Abaisiraeli. Ensoni dhija kubagema abo boonaboona abakuvaaku, baswale, era amaina gaibwe gaja kughandiikibwa mu nkungu olw'okukweyawulaku, ate nga iwe Musengwa Katonda oli ng'oti n'ensulo ey'amaadhi ag'obulamu.

Yeremia asaba Musengwa Katonda amuyambe

¹⁴ Wo Musengwa Katonda, nkweghemba omponie, ndidha kuwonera irala; era nkusaba ondokole, ndidha kulokolebwa irala, kuba niiwe ye nsaaka.

¹⁵ Abantu bankoba bati: “Musengwa Katonda bye yatwesoomera okutukola biri gha? Ka bituukirire tubone!”

¹⁶ Aye nze tikupikirizangaku iwe obasindikire akabi koonakoona, era tibendezangaku batuuke ku buzibu. Ekyo iwe Musengwa Katonda okiidhi bukalamu. Bye nayogera byonabyona obiidhi.

¹⁷ Otanfuukira ekintu ekitiisa, kuba niiwe ekifo kyange eky'okwewogomamu mu kiseera ekizibu.

¹⁸ Abo abankiriga bagwananga baaswala, aye nze, iwe Musengwa Katonda, mponia okuswala. Beene n'ababe beeraliikirirenga, aye nze otandekanga kweraliikirira. Basindikire akabi kabasaanizeegho irala.

Okukuza Sabbato

¹⁹ Agho Musengwa Katonda yankoba ati: “Yeremia, ja ku gwetebwa Omulyango gwa Benjamini bakyabazinga ba Buyudaaya mwe babita nga bangira era nga bafuluma mu Yerusalemu, olangirire obukwenda bwange. Era omale oje ni ku miryango egindi gyonagyona egya Yerusalemu, yoona olangirireyo.

²⁰ Koba bakyabazinga n'abantu ab'omu Buyudaaya boonaboona, ni boonaboona ababa mu Yerusalemu abaingirira mu miryango egyo, bawulire bye nkoba.

²¹ Bakobe oti oba nga benda obulamu bwaibwe, batabbeedanga bintu ku lwa Sabbato, era batabibisanga mu miryango gya Yerusalemu.

²² Era batafulumyanga kintu kyonakyona mu ndhu dhaibwe ku lwa Sabbato, waire okukolanga omulimo gwonagwona ku lunaku olwo. Balukuumenga nga lutukuvu, nga bwe nalagira badhaadha baibwe.

²³ Aye badhaadha baibwe baaloba kumpulirisa waire okugondera bye nabalagira, beeyongera bwa kukalangusa myoyo gyaibwe na butenda kugalagirwa.

²⁴ “Koba abantu abo oti bateekwa okugonderanga ebiragiro byange byonabyona. Balobe kubbeedanga kintu kyonakyona kukibisa mu miryango egy'ekibuga kino ku lwa Sabbato, waire okukolanga omulimo gwonagwona. Aye bakuumenga olunaku olwo nga lutukuvu.

²⁵ Olwo bakyabazinga baibwe n'abakungu, baidha kwingiranga mu miryango gya Yerusalemu nga bali n'obukumu obw'okufuga nga Daudi bwe yali nabwo. Nga bali ghalala n'abantu b'omu Buyudaaya n'ab'omu Yerusalemu, baidha kuvuganga ebigaali by'omu lutalo, bajiirenga ni ku mbalaasi, era ekibuga Yerusalemu kinaabanga kiidhuvu kya bantu.

²⁶ Abantu baidha kuvanga mu bibuga by'omu Buyudaaya ni mu byalo ebyezungulwire Yerusalemu, baidhenga mu Yerusalemu. Abandi baidha kuvanga mu biketezo bya Benjamini, ni mu biketezo eby'omu biiko, ni mu biketezo eby'oku nsozi, ni mu biketezo bya Buyudaaya ebikalukalu ebiri ku luuyi olw'omukono omusaadha olw'e buvandhuba. Baidha kuleetanga mu isinzizo ebigheebwayo ebyokebwa, n'emisengo, n'ebigheebwayo eby'emere ey'empeke, n'obubbaani, ghalala n'ebigheebwayo olw'okwebaza.

²⁷ Aye bateekwa okungonderanga n'okukuumanga olunaku lwa Sabbato nga lutukuvu. Batabbeedanga kintu kyonakyona ni bakibisa mu miryango gya Yerusalemu ku lunaku olwo. Aye bwe balikola ekyo kye mbalobeire, nja kukunaania omuliro ku miryango egyo. Omuliro ogwo gulyokya ebisaagaati bya bakyabazinga eby'omu Yerusalemu, era tighalibaagho muntu asobola kuguzikiza.”